އީރާނުގެ ހަމަލާތަކުގައި އެމެރިކާ ސިފައިންގެ 200 އަށްވުރެ ގިނަ މީހުން މަރުވެ ނުވަތަ ޒަޚަމްވެއްޖެ ކަމަށް އީރާނުން ބުނެފި

އީރާނުގެ ހަތިޔާރު އެޅި ފައުޖުތަކުން ބަދަލުހިފުމުގެ ގޮތުން ދިން ހަމަލާތަކުގައި އެމެރިކާ ސިފައިންނަށާއި އެ ގައުމުގެ މުދަލަށް ލިބުނު ގެއްލުންތަކުގެ އެންމެ ފަހުގެ މައުލޫމާތު ޚާތަމް އަލް-އަންބިއާ ސެންޓްރަލް ހެޑްކުއާޓާސްގެ ތަރުޖަމާނު ހިއްސާކޮށްފިއެވެ. ތަރުޖަމާނު ބުނި ގޮތުގައި މި ހަމަލާތަކުގައި އެމެރިކާ ސިފައިންގެ 200 އަށްވުރެ ގިނަ މީހުން ވަނީ މަރުވެ ނުވަތަ ޒަޚަމްވެފައެވެ.

ވޭތުވެދިޔަ 24 ގަޑިއިރުގެ ތެރޭގައި ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ދިން ވަރުގަދަ ހަމަލާތަކުގައި، އިސްތިއުމާރީ އެމެރިކާ ސިފައިންނާއި ކޮމާންޑަރުންނަށް ބޮޑެތި ގެއްލުންތަކެއް ލިބިފައިވާކަން ހޮނިހިރު ދުވަހު ތަރުޖަމާނު އިއުލާން ކުރިއެވެ.

"އޮޕަރޭޝަން ޓްރޫ ޕްރޮމިސް 4" ގެ ދަށުން އީރާނުން ދިން މި ހަމަލާތަކުގައި، އެ ސަރަހައްދުގައި ހުރި އެމެރިކާގެ އަސްކަރީ އުމްރާނީ ވަސީލަތްތަކަށާއި ވަސީލަތްތަކަށް ބޮޑެތި ގެއްލުންތަކެއް ދީފައިވާކަންވެސް އޭނާ ފާހަގަކުރިއެވެ.

އީރާނުގެ ތަރުޖަމާނު ހާމަކުރި ގޮތުގައި، އެ ސަރަހައްދުގައި އޮންނަ އެމެރިކާގެ ފިފްތު ފްލީޓުން 21 ސިފައިން މަރުވެ، ގިނަ ބަޔަކަށް ވަނީ އަނިޔާވެފައެވެ. އަދި އަލް ދާފްރާ އެއާ ބޭސްއިން އެމެރިކާގެ ގާތްގަނޑަކަށް 200 މީހުން މަރުވެ ނުވަތަ ޒަޚަމްވެފައިވާއިރު، ޕާޝިއަން ގަލްފުގެ އުތުރު ސަރަހައްދުން އެމެރިކާއަށް ނިސްބަތްވާ ތެޔޮ ޓޭންކަރަކަށްވެސް ވަނީ ހަމަލާދީފައެވެ.

ޚާތަމް އަލް-އަންބިއާ ސެންޓްރަލް ހެޑްކުއާޓާސްއަކީ އީރާނުގެ ހަތިޔާރު އެޅި ފައުޖުތަކުގެ ޖެނެރަލް ސްޓާފްގެ ދަށުން ހިންގާ، އީރާނުގެ އަސްކަރީ އެކި ޔުނިޓްތައް ބައިވެރިވާ އޮޕަރޭޝަންތައް ރޭވުމާއި އިންތިޒާމުކުރުމުގެ މަސްއޫލިއްޔަތު އަދާކުރާ އިދާރާއެކެވެ.

ފެބްރުއަރީ މަހުގެ 28 ވަނަ ދުވަހު އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީގެ އިތުރުން، އަސްކަރީ އިސް ކޮމާންޑަރުންނާއި އާންމުން ޝަހީދު ކޮށްލުމާ ގުޅިގެން، އެމެރިކާއާއި ޒަޔަނިސްޓް އިޒްރޭލުން ވަނީ އީރާނާ ދެކޮޅަށް ނުރައްކާތެރި އަސްކަރީ ކެމްޕޭނެއް ފަށާފައެވެ.

މި ކެމްޕޭނުގެ ދަށުން އަސްކަރީ މަރުކަޒުތަކަށާއި އާންމުން ދިރިއުޅޭ ސަރަހައްދުތަކަށް އަމާޒުކޮށް ގިނަ ހަމަލާތަކެއް ދީފައިވާއިރު، މީގެ ސަބަބުން ގިނަ ބައެއްގެ ފުރާނަ ގެއްލި، ބޮޑެތި ގެއްލުންތަކެއް ވަނީ ލިބިފައެވެ.

އީރާނުގެ ހަތިޔާރު އެޅި ފައުޖުތަކުން ވަނީ ބަދަލުހިފުމުގެ ގޮތުން ވަރުގަދަ ހަމަލާތަކެއް ދީ، އިޒްރޭލުން ހިފާފައިވާ ބިންތަކާއި ސަރަހައްދީ ގައުމުތަކުގައި ހުރި އެމެރިކާއާއި އިޒްރޭލުގެ އަމާޒުތަކަށް ގިނަ އަދަދެއްގެ މިސައިލާއި ޑްރޯން ހަމަލާތައް ފޮނުވާލާފައެވެ.