100 އަހަރު ވާން ކައިރި ވެފައިވާ ބަންޑާރަ މިސްކިތް ތަޅާލުން މި ސަރުކާރަށް ހަމަ އޯކޭ؟
7 މާރިޗު 2026 | ހޮނިހިރު 14:51މާލޭގައި ހުރި އާސާރީ ބިނާއެއް ކަމަށްވާ ބަންޑާރަ މިސްކިތް ތަޅާލައި، އެ ބިމުގައި އަމިއްލަ ފަރާތެއްގެ އެހީގައި ޒަމާނީ މިސްކިތެއް އެޅުމަށް ސަރުކާރުން ނިންމުމާ ގުޅިގެން އާންމުންގެ ބޮޑެތި ފާޑުކިޔުންތަކެއް ވަނީ އަމާޒުވެފަ.
ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީން | ޔުމްނާ މައުމޫން
ފެށުނީއްސުރެ މި ސަރުކާރުން ބުނަމުން ދަނީ މިއީ ނިކަން ދީނާއި ޤައުމިއްޔަތަށް އިސްކަން ދޭ ބައެއް ކަމަށެވެ. ބައެއް ފަހަރު ދިވެހިންގެ އާސާރު ދަމަހައްޓާނެ ހަމައެކަނި ބަޔަކީ މިވެރިންނޭ ބުނާހެން ހީވާކަހަލަ އެވެ. އެކަމަކު އަމަލުތައް ފެންނަނީ އެއާއި ދިމާ އިދިކޮޅަށޭ ބުންޏަސް ދޮގަކަށް ނުވާނެ އެވެ.
ދައްކަން މިއުޅެނީ ބަންޑާރަ މިސްކިތް ނުވަތަ މަސްޖިދުއްސުލްތާން މުހައްމަދު ޝަމްސުއްދީންގެ ވާހަކަ އެވެ. އެ މިސްކިތް ތަޅާލާ ވާހަކަ ދެއްކުމުން އެތައް ބަޔަކު އެކަމަށް ފާޑު ކިޔުން އަމާޒުކުރި އެވެ. މި ސަރުކާރުން ނުކުތީ އެ އާސާރު ހަލާކުކޮށްލުމުގެ ދިފާއުގައި ވާހަކަދައްކާށެވެ.
ބަންޑާރަ މިސްކިތް ތަޅާލާ ވާހަކަ ސަރުކާރުން ދެއްކި އިރު ފަހަރުގައި މިސްކިތްތައް ތަޅާލުމަކީ މި ސަރުކާރުން މާ ގަޔާވާ ކަމަކަށް ވެދާނެ އެވެ. އެހެން މި ބުނަން ޖެހުނީ ށ. މިލަންދޫގައި ހުރި މިސްކިތެއް ވެސް މި މޭރުމުން ތަޅާލާފައިވާތީ އެވެ. ށ. ފޯކައިދޫގައި ވެސް ކަން ހިނގީ ހަމަ އެހެންނެވެ. މިސްކިތެއް އެޅުމުގެ ނަމުގައި މި މިސްކިތްތައް ތަޅާލުމަށް ފަހު އާ މިސްކިތް ނޭޅި އެތައް ދުވަހެއް ހޭދަ ވެއްޖެ އެވެ.
ވަޒީރު ޝަހީމު ވިދާޅުވީ ބަންޑާރަ މިސްކިތް ހުންނަ ބިމުގައި ޒަމާނީ ބޮޑު މިސްކިތެއް އެޅުމަށް ނިންމާފައިވާ ކަމަށެވެ. އަމިއްލަ ފަރާތެއްގެ އެހީތެރިކަމާއި އެކު އެ މަސައްކަތް ކުރުމަށް ނިންމާފައިވާ ކަމަށް ވެސް ޝަހީމް ވަނީ ވިދާޅުވެފަ އެވެ.
އެތައް އަހަރެއް ވެފައިވާ އާސާރެއް މިފަދަ ގޮތަކަށް ތަޅާލުން މިއީ އާސާރަށް ލޯބި ކުރާ ބަޔަކު ކުރަން ހެޔޮ ވާ ވަރުގެ ކަމެއް ނޫނެވެ. ސަޤާފީ ތަރިކަ ހިމާޔަތް ކުރުމަށް އާ ވުޒާރާ އެއް ހެދުމަށް ފަހު މިހާރު މިކަން ކުރާ ގޮތުން ސަގާފަތާއި އާސާރަށް މާބޮޑު ލޮތްބެއް އޮތް ހެނެއް ހިއެއް ނުވެ އެވެ.
98 އަހަރު ވެފައިވާ މި ފަދަ މިސްކިތެއް ނައްތާލުމަކީ އެއީ ގަދީމީ ތަންތަނާއި މެދު އާއްމު އުސޫލުން ވެސް ދުނިޔޭގައި ކަންކުރާ ގޮތެއް ނޫނެވެ. މިކަމަށް ފާޑު ކިޔުމުން އެ ތަނަކީ އާސާރީ ތަނެއް ކަމަށް ވެސް ނުވި އެވެ. ފުރަތަމަ ވިދާޅުވީ އެއީ އާސާރީ ތަނެއް ނޫން ކަމަށެވެ. ފާޑުކިޔުން ބޮޑުވުމުން ފަހުން ރާގު ބަދަލުކުރައްވާ އެތަނުގެ އަސްލު ނުގެއްލޭ ގޮތަށް މަސައްކަތް ކުރައްވާނެ ކަަމަށް ޝަހީމް ވަނީ ވިދާޅުވެފަ އެވެ. އެއީ މުޤައްދަސް ތަނެއް ނޫން ކަމަށް ވެސް ވަޒީރު ވަކާލާތު ކުރެއްވި އެވެ.
ބަންޑާރަ މިސްކިތް ތަޅާ ނުލެވިގެން އުޅޭހާ ވަރެއް އަދި ނުވެ އެވެ. އާ މިސްކިތެއް އަޅާނެ ތަނެއް ނެތީކީ ނޫނެވެ. މާލޭގައި އަދިވެސް މިސްކިތް އެޅިދާނެ ތަންތަން އެބަ ހުއްޓެވެ. އެކަމަކު ކުއްލިއަކަށް ބަންޑާރަ މިސްކިތް ތަޅާނުލެވިގެން ނޫނީ އެތަން ބަދަލުކޮށް ނުލެވިގެން އުޅެން ޖެހޭ ސަބަބެއް ވިސްނާ ވިސްނާ ވެސް ނޭނގުނެވެ. ފަހަރުގައި އެކަމުގެ ފަހަތުގައި ވެސް ފޮރުވިފައިވާ ސިއްރެއް އޮތީ ކަމަށް ވެދާނެ އެވެ.
