ގިނަ އޮފާ ތަކަކާއެކު ރާއްޖޭގެ ފުރަތަމަ އެޕަލް މޮނޯ ސްޓޯރ މާލޭގައި ހުޅުވައިފި

މޯބައިލް ފޯނާއި އިލެކްޓްރޯނިކް ސާމާނުގެ ވިޔަފާރި ރާއްޖޭގައި ފުޅާ ދާއިރާއެއްގައި ކުރަމުން އަންނަ އެލް މޯބައިލްގެ ފަރާތުން ރާއްޖޭގެ ފުރަތަމަ އެޕަލް މޮނޯ ސްޓޯރ މާލޭގައި ހުޅުވައިފި އެވެ.

އެލް ސްޓޫޑިއޯ ގެ ނަމުގައި ބުރާސްފަތި ދުވަހުގެ ރޭ ހުޅުވި މި ފިހާރަ ހުންނަނީ މަޖީދީ މަގު ޑިލައިޓް ފިހާރަ ކައިރީގަ އެވެ.

އެލް ސްޓޫޑިއޯ އަކީ އެޕަލް ކުންފުނިން ފަރުމާކޮށްފައިވާ މާހައުލެއްގައި، ހަމައެކަނި އެ ކުންފުނީގެ އުފެއްދުންތަކާއި އެކްސެސަރީޒް ވިއްކުމަށް ޚާއްސަކޮށް، ހުއްދަދެވިފައިވާ ރީޓެއިލް ފިހާރައެ ކެވެ. މިފަދަ މޮނޯ ސްޓޯރ ތަކަކީ އެޕަލްގެ ވިޔަފާރި ފުޅާކުރުމަށްޓަކައި އެ ކުންފުނިން ހުއްދަދީފައިވާ ޕާޓްނަރުން މެދުވެރިކޮށް ހިންގާ ތަންތަނެވެ.

މި ފިހާރައިން ވިޔަފާރި ކުރާ ކަސްޓަމަރުންނަށް ވަނީ ވަރަށް ހާއްސަ އޮފާތަކެއް ހުޅުވާލާފަ | އެލް މޯބައިލް

މި ފިހާރަތަކުން އެޕަލްގެ ބްރޭންޑް ރަމްޒުކޮށްދޭ ފެންވަރުމަތީ ޚިދުމަތްތަކާއި، ފިހާރަ ފަރުމާކުރުމުގައި ގެންގުޅޭ ވަކި ޚާއްސަ އުސޫލުތަކާއި، ފިހާރައިގެ ފިކްސްޗަރތަކުގެ އިތުރުން ކަމާބެހޭ މާހިރުންގެ އެހީތެރިކަން ކަސްޓަމަރުންނަށް އެއްގޮތަކަށް ލިބޭނެކަން ކަށަވަރުކޮށްދެ އެވެ.

އެލް ސްޓޫޑިއޯ ހުޅުވުމާ ގުޅިގެން، މި ފިހާރައިން ވިޔަފާރި ކުރާ ކަސްޓަމަރުންނަށް ވަނީ ވަރަށް ހާއްސަ އޮފާތަކެއް ހުޅުވާލާފަ އެވެ. އެގޮތުން މި ފިހާރައިން އެޕަލް އައިފޯން 17 ސީރީޒް އެންމެ ފުރަތަމަ ބައްލަވައިގަންނަވާ 50 ކަސްޓަމަރުންނަށް އެއަރޕޮޑް 4 ހިލޭ ލިބިގެންދާނެ އެވެ. އަދި މި ފިހާރަ އިން އެޕަލް އައިފޯން 17 ސީރީޒް ބައްލަވައިގަންނަވާ ފުރަތަމަ 100 ކަސްޓަމަރުންނަށް ހިލޭ ސްކްރީން ގާރޑްގެ އިތުރުން 20 ވޮޓްގެ އެޑެޕްޓަރެއް ވެސް ހިލޭ ލިބިގެންދާނެ އެވެ.

އެލް މޯބައިލް ގެ މާކެޓިންގ އެގްޒެކެޓިވް އަލީ އައިހަމް ރާއްޖެ އެމްވީ އަށް މައުލޫމާތު ދެއްވަނީ | އެލް މޯބައިލް

އިތުރު އޮފާތަކާ ގުޅޭ ގޮތުން މައުލޫމާތު ދެއްވަމުން އެލް މޯބައިލްގެ މާކެޓިންގ އެގްޒެކެޓިވް އަލީ އައިހަމް ވިދާޅުވީ، ރާއްޖޭގެ ފުރަތަމަ އެޕަލް މޮނޯ ސްޓޯރގެ ގޮތުގައި އެލް ސްޓޫޑިއޯ ހުޅުވުމަކީ އެލް މޯބައިލްގެ އިތުރުން ޖުމްލަ ގޮތެއްގައި މުޅި ދިވެހި ރައްޔިތުންނަށް ލިބުނު ބޮޑު ހިތްހަމަޖެހުމެއް ކަމަށެވެ.

އެޕަލްގެ އޮތަރައިޒްޑް ޑިސްޓްރިބިއުޓަރ އެއް ކަމަށްވާ މި ފިހާރަ އިން ޓްރޭޑް ކުރާ ކޮންމެ ފޯނަކަށް 1000 ރުފިޔާގެ ކޭޝް ބެކް ލިބިގެންދާނެ ކަމަށް އައިހަމް ވިދާޅުވި އެވެ. އަދި މި ފިހާރައިން ގަންނަ ބައެއް ސީރީޒްތަކުގެ އެޕަލް މެކް ބުކް އަދި އައިޕެޑަށް 8 އިންސައްތަ ޑިސްކައުންޓެއް ލިބިގެންދާނެ ކަމަށް އައިހަމް ވިދާޅުވި އެވެ.

މި ފިހާރައިން އެޕަލް އައިފޯން 17 ސީރީޒް އެންމެ ފުރަތަމަ ބައްލަވައިގަންނަވާ 50 ކަސްޓަމަރުންނަށް އެއަރޕޮޑް 4 ހިލޭ ލިބިގެންދާނެ | އެލް މޯބައިލް

ގަންނަ ކޮންމެ މެކް ބުކަކާ އެކު 8 އިންސައްތަ ޑިސްކައުންޓްގެ އިތުރުން ބެލްކިންގެ ފައިވް އިން ވަން ޔޫއެސްބީ ހަބެއް ވެސް ހިލޭ ލިބޭނެ ކަމަށް އައިހަމް ވިދާޅުވި އެވެ.

މި ފިހާރަ ހުޅުވުމުން ރާއްޖޭގައި އެޕަލް އުފެއްދުންތަކަށް ބޭނުންވާ ކަސްޓަމަރުންނަށް ބައިނަލްއަގުވާމީ ފެންވަރުގެ ޚިދުމަތާއި ފުރިހަމަ ތަޖުރިބާއެއް ލިބިގެންދާނެ ކަމަށް ބެލެވެ އެވެ.