ޕެޓްރޯލާއި ޑީސަލްގެ އަގު ބޮޑުކުރީ ރަމަޟާން މަހުގެ ކަރަންޓު ބިލުން ދޭ ޑިސްކައުންޓަށް ބޭނުންވާ ފައިސާ ހޯދަން: ބިގޭ

ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ވިއްކާ ޑީސަލާއި ޕެޓްރޯލްގެ އަގު ބޮޑު ކުރީ ރަމަޟާން މަހުގައި ގޭބިސީތަކުން ދޭ ކަަރަންޓު ބިލުގެ ޑިސްކައުންޓަށް ކަނޑާ ފައިސާ ހޯދުމަށް ކަމަށް ރައްޔިތުންގެ މަޖިލީހުގެ އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސެއިން (ބިގޭ) ވިދާޅުވެއްޖެ އެވެ.

ހުކުރު ދުވަހުގެ ރޭ އެމްޑީޕީން ބޭއްވި ހަރުގެ ބައްދަލުވުމުގައި ބިގޭ ވިދާޅުވީ މެދުއިރުމަތީގެ ހަމަނުޖެހުމާއި ގުޅިގެން ރާއްޖޭގައި ވިއްކާ ޑީސަލާއި ޕެޓްރޯލުގެ އަގު ބޮޑު ކޮށްފައި ވަނީ އަގު ބޮޑު ކުރަން ޖެހޭ ހާލަތް ކުރިމަތިވެގެން ނޫން ކަމަށެވެ. އަދި މިސަރުކާރުގެ އިކޮނޮމިކް މިނިސްޓަރު ސައީދު ވެސް ތެލުގެ އައު ޝިޕްމަންޓެއް މިހާރުވެސް ރާއްޖެއަށް ދަތުރުކުރަމުންދާ ކަމަށާއި، މުދާ އުފުލާ ރޫޓުތަކަށް އެއްވެސް ހުރަހެއް ނެތް ކަމަށް ވިދާޅުވެފައިވާއިރު، އަގު ބޮޑު ކުރުން ބަލައި ނުގަނެވޭ ކަމަށް އޭނާ ވިދާޅުވި އެވެ. 

 މިރަމަޟާން މަހުގެ ކަރަންޓު ބިލު، ޑޮމެސްޓިކް ރޭޓުން ބިލް ކުރާ ކޮންމެ ގެއަކަށް ނަގާނީ އެންމެ ގިނަވެގެން 400 ރުފިޔާ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާތީ އެކަމަށް އިޝާރާތް ކުރައްވައި ބިގޭ ވިދާޅުވީ، އަގުހެޔޮ ޝިޕްމަންޓަކުން ޑީސަލާއި ޕެޓްރޯލުގެ އަގުު ބޮޑު ކުރީ ކަރަންޓު ބިލުތަކަށް ކަނޑާ ޑިސްކައުންޓްތަކަށް ފައިސާ ހޯދުމަށް ކަމަށް މައުލޫމާތު ލިބިފައިވާ ކަމަށެވެ. 

އަޅުގަނޑަށް މައުލޫމާތު ލިބިފައިވާ ގޮތުގައި 400 ރުފިޔާއަށް ކަރަންޓު ބިލު ކޮންމެ ގެއަކަށް ކުޑަ ކުރަނީ އޭ ވިދާޅުވެވުނީ ވެސް އަމިއްލަ ފުޅަށް އޮޅުމަކުން. އަސްލު ވިދާޅުވާން އުޅުނީ 400 ޔުނިޓޭ ވިދާޅުވާން އުޅުނީ. ދެން އެތަން ކޮޅު ފޫ ބެއްދުމަށްޓަކައި ތެލުގެ އަގަށް ރައްޔިތުންގެ އަތުން އެބައި އިތުރަށް ހޯދުމަށްޓަކައި މިހާރު ކުރެވޭ މަސައްކަތެއް. އެހެންވީމަ ރައްޔިތުންނަށް އިހުލާސްތެރިކަމާއެކު ލުޔެއް ދިނުމުގެ ނިޔަތުގައި ކުރައްވާ ހަމަ އެއްވެސް ކަމެއް އަޅުގަނޑުމެންނަށް ނުފެނޭ. މިހާރު އަޅުގަނޑުމެންނަށް މި އިވެނީ މިއޮތްހާ ދުވަހު ކާޑުން އަޅުގަނޑުމެން ދެމުންދިޔަ ސަބްސިޑީ. އެގޮތުން ހަކުރުގެ އެބައި އުނިކޮށްލުމަށް. ހަކުރަކީ އާއްމު ރައްޔިތުން އާއްމު ދިރިއުޅުމުގައި ބޭނުން ކުރާ އެއް ބާވަތް ރާއްޖޭގައި ކާޑުގެ ބާވަތްތަކުގެ ތެރެއިން. އެހެން ނަމަވެސް އޭގެން ރައްޔިތުންނަށް ދެމުން އަންނަ ހަރަދު ކުޑަ ކުރުމުގެ ގޮތުން އެއަށް ލައިދެމުން އަންނަ ބައި ކަނޑާލުމުގެ ވާހަކަ ހެލްތް މިނިސްޓަރު ދެއްކެވި އަޑު އެހިން.

ރައްޔިތުންގެ މަޖިލީހުގެ އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސެއިން (ބިގޭ) 

ބިގޭ ވިދާޅުވީ މިސަރުކާރުން ރައްޔިތުންނަށް ލުޔެއް ދިނުމަށް އެއްވެސް މަސައްކަތެއް ނުކުރާނެ ކަމަށާއި، މިހާތަނަށް ފެނިފައިވަނީ އެމަންޒަރު ކަމަށެވެ. ރައްޔިތުންނަށް އާމްދަނީގެ ގޮތުގައި އިތުރަށް އެއްޗެއް ލިބޭނެ ގޮތެއް ނެތްއިރު، ހަރަދުތައް އިންތިހާއަށް މައްޗަށް އުފުލިގެންދާ ކަމަށް އޭނާ ވިދާޅުވި އެވެ. އަދި ވިދާޅުވީ މިސަރުކާރުގައި ރައްޔިތުން ދަނީ ދުވަހަކަށް ވުރެ ދުވަހެއް ބޮޑަށް ބިކަވެ ނިކަމެތިވަމުން ކަމަށެވެ.