އެމްޑީޕީގެ ކެންޑިޑޭޓުން ރައްޔިތުންނާއެކު ކުރަމުންދާ މަސައްކަތް އިންތިޚާބަށްފަހުވެސް މެދުނުކެނޑި ކުރިއަށް ދާނެ: ނާޒިލް

އެމްޑީޕީގެ ކެންޑިޑޭޓުން ރައްޔިތުންނާއެކު ކުރަމުންދާ މަސައްކަތް އިންތިޚާބަށް ފަހު ވެސް މެދުނުކެނޑި ކުރިއަށް ގެންދާނެކަމުގެ ޔަޤީންކަން ދެއްވާކަމަށް އެމްޑީޕީގެ ޕާލަމެންޓްރީ ގްރޫޕް ލީޑަރު އިބްރާހިމް ނާޒިލް ވިދާޅުވެއްޖެ އެވެ.

ނާޒިލް އެފަދައިން ވިދާޅުވީ އެމްޑީޕީ އިން ހެންވޭރު މެދު ދާއިރާގައި ކުރިއަށް ގެންދިޔަ ދޮރުން ދޮރަށް ޙަރަކާތުގައި ވާހަކަ ދައްކަވަމުންނެވެ.

ނާޒިލް ވިދާޅުވީ، މަސައްކަތް ކުރަނީ ކޮން ބައެއްކަން އަދި ރައްޔިތުންގެ ހާލު ބަލަނީ ކޮން ބައެއްކަން ރައްޔިތުންނަށް މިއަދު ސާފުވާނެ ކަމަށެވެ. އަދި ވިދާޅުވީ، އެމްޑީޕީގެ ކެންޑިޑޭޓުން ރައްޔިތުންނާއެކު ކުރަމުންދާ މަސައްކަތް އިންތިޚާބަށް ފަހު ވެސް މެދުނުކެނޑި ކުރިއަށް ގެންދާނެކަމުގެ ޔަޤީންކަން ދެއްވާ ކަމަށެވެ.

  މަސައްކަތް ކުރަނީ ކޮން ބައެއްކަން އަދި ރައްޔިތުންގެ ހާލު ބަލަނީ ކޮން ބައެއްކަން ރައްޔިތުންނަށް މިއަދު ސާފުވާނެ. ރައްޔިތުންނާ އެކީގައި މި މަސައްކަތުގައި އަޅުގަނޑުމެން ވޯޓަށް ފަހުގައިވެސް ދެމި ތިބޭނެކަމުގެ ޔަޤީންކަން އަޅުގަނޑު އަރުވަން.

އެމްޑީޕީގެ ޕާލަމެންޓްރީ ގްރޫޕް ލީޑަރު އިބްރާހިމް ނާޒިލް

ނާޒިލް ވިދާޅުވީ، ރައްޔިތުންނަށްޓަކައި އެމްޑީޕީން ކުރަމުންދާ މަސައްކަތަކީ އެ ރައްޔިތުންނަށް ހެޔޮ ރަނގަޅު ގޮތް ހޯދައިދިނުމުގެ މަޤްސަދުގައި ކުރަމުންދާ މަސައްކަތްތަކެއް ކަމަށެވެ. އަދި އެކަން އެމްޑީޕީ ނޫން ބަޔަކު ކޮށްދޭނެކަމަށް ވެސް މިއަދު ރައްޔިތުން ޤަބޫލު ނުކުރާކަމަށް ނާޒިލް ވިދާޅުވިއެވެ.

ނާޒިލް އިތުރަށް ވިދާޅުވީ، މާލެއަށް ގެނެވޭ ތަރައްޤީއާއި ލުއިފަސޭހަކަމުގެ އަސަރު ރާއްޖޭގެ ހުރިހާ ކަންކޮޅެއްގައި ތިބޭ ރައްޔިތުންނަށް ވެސް ކުރާނެ ކަމަށާއި، އެހެންކަމުން އެ ތަރައްޤީ ގެނައުމަށްޓަކައި ތިލަފަތުގެ ކެންޑިޑޭޓުންނަށް ވޯޓު ދިނުން ނުހަނު މުހިއްމު ކަމަށެވެ.

ނާޒިލް ވަނީ އޭޕްރިލް 4 ގައި ބާއްވާ އިންތިޚާބުގައި ތިލަފަތަށް ވޯޓު ދިނުމަށް ހުރިހާ ރައްޔިތުންގެ ކިބައިންވެސް އެދިވަޑައިގެންފައެވެ.