މާލޭގެ ރައްޔިތުންގެ ކިބައިން އެދޭ އެދުމަކީ މި ދޮގުހަދާ ސަރުކާރަށް ނޫނެކޭ ބުނުން: އާޒިމް

މާލޭގެ ރައްޔިތުންގެ ކިބައިން އެދޭ އެދުމަކީ މި ދޮގުހަދާ ސަރުކާރަށް ނޫނެކޭ ބުނުންކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

އާޒިމް އެފަދައިން ވިދާޅުވީ އެމްޑީޕީ އިން ކުރިއަށް ގެންދާ ދޮރުން ދޮރަށް ޙަރަކާތުގައި ހެންވޭރު މެދު ދާއިރާގައި ވާހަކަ ދައްކަވަމުންނެވެ.  

އާޒިމް ވިދާޅުވީ، އެމްޑީޕީގެ އަމާޒަކީ ވީހާވެސް ގިނަ ރައްޔިތުންނާ ބައްދަލުކޮށް ރާއްޖޭގެ ޙާލަތާއި މާލީ ޙާލަތުގެ ވާހަކަ ކިޔައިދިނުން ކަމަށެވެ. އަދި ވިދާޅުވީ، އެމްޑީޕީގެ ވާދަވެރި ފަރާތްތަކުން ވައުދު ނުފުއްދާ ކަމަށާއި، އެކަން މިއަދު ރައްޔިތުންނަށް ވެސް އެނގޭ ކަމަށެވެ.

  އެންމެންނަށްވެސް އެނގޭ ވައުދެއް ނޫންކަން ވަނީ ހަދަނީ ދޮގުކަން، މިހާތަނަށް ވެސް އެ ވަމުންދަނީ ދޮގު ވަޢުދުކަން ދިވެހި ރައްޔިތުންނަށް އެބަ އެނގޭ. އެހެންކަމުން އަޅުގަނޑު މި އެދެނީ މާލޭގެ ރައްޔިތުންގެ ކިބައިން މި ދޮގުހަދާ ސަރުކާރަށް ނޫނެކޭ ބުނަން

މާލެ ސިޓީ މޭޔަރު އާދަމް އާޒިމް 

މި ސަރުކާރުން ހަދަމުންދާ ދޮގުތަކަށް އަލިއަޅުވައިލައްވައި އާޒިމް ވިދާޅުވީ، އެހާ ގިނަ ދޮގު ހަދާ ބަޔަކަށް ވޯޓު ދޭން ޖެހޭ އެއްވެސް ސަބަބެއްވެސް ނޯންނާނެ ކަމަށެވެ.

މީގެ އިތުރުން، އެމްޑީޕީއަކީ ސިޔާސަތުތަކެއް ހިފައިގެން ރައްޔިތުންނަށް ކަންކަން ކޮށްދިނުމަށް ވައުދުވެގެން އަންނަ ޕާޓީއެއްކަމަށް ވެސް އާޒިމް ވިދާޅުވިއެވެ. އަދި ވިދާޅުވީ، އެމްޑީޕީއަކީ ތަފާތު ކުރުމެއް ނެތި ހުރިހާ ރައްޔިތުންނަށް ޚިދުމަތް ކޮށްދޭނެ ޕާޓީއެއްކަން ތާރީޚުން ވެސް ސާބިތު ކޮށްދީފައިވާކަމަށެވެ.

އާޒިމް ވިދާޅުވީ، އެމްޑީޕީން ގެންނަ އެކިއެކި ސިޔާސަތުތަކަކީ ވެސް މުޅި ރައްޔިތުންގެ ފައިދާއަށް ބިނާކޮށް އެކުލަވާލާ ސިޔާސަތުތަކެއް ކަމަށެވެ.

އާޒިމް އިތުރަށް ވިދާޅުވީ، މި ސަރުކާރަށް އާނއެކޭ ބުނުމުގެ މާނައަކީ ރާއްޖޭގައި މަޝްރޫއުތައް ވެސް ހިނގާކަމަށް ބުނުން ކަމަށާއި، ނަމަވެސް ހަގީގަތް އޮތީ އެހެން ނޫން ކަމަށެވެ. އެގޮތުން ރަށްރަށުގެ މަޝްރޫއުތައް ވެސް ހުއްޓާފައިވާކަން އާޒިމް ފާހަގަ ކުރެއްވިއެވެ.

އާޒިމް ވިދާޅުވީ، ހެންވޭރު ހުޅަނގު ދާއިރާގެ ހުރިހާ ރައްޔިތުން ނުކުމެވަޑައިގެން އެމްޑީޕީގެ ކެންޑިޑޭޓުން ހޮވައިދެއްވުމަށް ވަރަށް ބޮޑަށް އެދިލައްވާ ކަމުގައެވެ. އެއީ ރައްޔިތުންގެ ކަންތައްތައް ގާތުން ބަލައި، ކައުންސިލަށް ގެންގޮސް ވަކާލާތު ކޮށްދޭނެތީކަމަށް ވެސް އާޒިމް ވިދާޅުވިއެވެ.