ޑިމާންޑާ އެއްވަރަށް އައްޑޫއަށް ދަތުރު ނޭޅޭ ނަމަ ސަރުކާރުން ހިތުހުރިގޮތެއް ނުހަދައި އެހެން ބަޔަކަށް ފުރުސަތު ދޭންޖެހޭ: މެންބަރު އަބްދުއްރަހްމާން
މާލެއާއި އައްޑޫ ސިޓީއާ ދެމެދު ދަތުރުކުރާ ފްލައިޓުތަކުން ޖާގަ ނުލިބޭތީ އާއި ޑިމާންޑާ އެއްވަރަށް ދަތުރުތައް އިތުރު ނުކުރާތީ، މީދޫ ދާއިރާގެ މެންބަރު އަބްދުއްރަހްމާން ވަނީ ކަންބޮޑުވުން ފާޅު ކުރައްވާފައި. ގައުމީ އެއާލައިނަށް މި ޚިދުމަތް އެކަށީގެންވާ ގޮތެއްގައި ނުދެވޭނަމަ އެހެން ބަޔަކަށް ފުރުސަތު ދޭންޖެހޭ ކަމަށާއި، ސަރުކާރުގެ ބޭފުޅުންގެ އަމިއްލަ ބޭނުންތަކަށް ފްލައިޓް ޝެޑިއުލްތަކަށް ބަދަލު ގެނައުމުގެ ސަބަބުން ރައްޔިތުންނަށް ބޮޑެތި ތަކުލީފުތަކެއް ކުރިމަތިވަމުންދާކަން އޭނާ ފާހަގަކުރެއްވި. މީގެ އިތުރުން، އައްޑޫގެ ތަރައްގީއަށް ވެފައިވާ ވައުދުތައް ނުފުއްދޭތީ އާއި، އިންތިޚާބުތަކާ ދިމާކޮށް ދައްކާ ވާހަކަތަކާ އެއްގޮތަށް އަމަލީ މަސައްކަތް ނުފެންނާތީ މެންބަރު ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފައި.
ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު އަބްދުއް ރަހުމާން (އައްދު)- ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަނީ. | ރާއްޖެއެމްވީ
ޑިމާންޑާ އެއްވަރަށް އައްޑޫ ސިޓީ އަށް ދަތުރު ބޭއްވުމުގެ ގާބިލްކަން ނެތްނަމަ އެހެން ބަޔަކަށް ފުރުސަތު ދޭން ޖެހޭ ކަމަށާއި، ނަމަވެސް މިސަރުކާރުން އައްޑޫގެ ރައްޔިތުންނަށް ހަދަނީ ހިތުހުރި ގޮތެއް ކަމަށް އައްޑޫ މީދޫ ދާއިރާގެ އަމިއްލަ މެންބަރު އަބްދުއްރަހްމާން ވިދާޅުވެއްޖެ އެވެ.
ޑިމާންޑާ އެއްވަރަށް އައްޑޫ ސިޓީއަށް ދަތުރުކުރާ ފްލައިޓުތައް އިތުރުނުކުރާތީ ކަންބޮޑުވުންފާޅު ކުރައްވައި، މެންބަރު އަބްދުއްރަހްމާން ސޯޝަލް މީޑީއާގައި ކުރެއްވި ޕޯސްޓެއްގައި ވިދާޅުވީ، އައްޑުއާއި މާލެއާއި ދޭތެރޭ ދަތުރުކުރަން މިފަހަކަށް އައިސް މޯލްޑިވިއަން ފްލައިޓުން ޖާގަ ނުލިބޭ ކަމަށާއި، ފްލައިޓްތަށް އިތުރު ނުކުރާ ކަމަށެވެ. އަދި އެހެން ބަޔަކަށް އުދުހުމުގެ ފުރުސަތު ވެސް ނުދޭ ކަމަށް މެންބަރު ވިދާޅުވި އެވެ.
ފަހު ދިހައިގަ އަދި އީދަށް އާއިލާ ކައިރިއަށް އަންނަން ތިބި އައްޑޫ މީހުންނަށް ފުރުސަތު ނުލިބޭކަން ފާހަގަކުރައްވައި މެންބަރު އަބްދުއްރަހްމާން ވިދާޅުވީ، އީދަށް މަޑުކުރަން ބޭނުން އެތައް ބަޔަކު ޖާގަ ނުލިބުމުގެ ސަބަބުން އީދުގެ ކުރިން ފުރަން ޖެހޭ ކަމަށާއި، މިއީ ވަކި ޗުއްޓީއެއް ވެގެން މިހާރު ވާ ކަމެއް ނޫން ކަަމަށެވެ.
މެންބަރު އަބްދުއްރަހްމާން ވިދާޅުވީ، ޑިމާންޑާއި އެއްވަރަށް ދަތުރު ބޭއްވުމުގެ ގާބިލްކަން ސަރުކާރު އަދި މޯލްޑިވިއަންގަ ނެތްނަމަ އެހެން ބަޔަކަށް އުދުހުމުގެ ފުރުސަތު ދޭން ޖެހޭ ކަމަށެވެ. ނަމަވެސް މިސަރުކާރުން އައްޑޫ ރައްޔިތުންނާ ދޭތެރޭގައި ހިތުހުރި ގޮތެއް ހަދަމުންދާ ކަމަށާއި، ސަރުކާރުގެ ބޭފުޅުން ބޭނުންވީމަ އަމިއްލަ ދޯންޏަށް ހަދާ ގޮތަށް ކެންޕޭން ދަތުރަށް ބޯޓުތަކުގެ ޝެޑިއުލްއަށް ބަދަލު ގެންނަ ކަމަށެވެ. އަދި ވިދާޅުވީ މިގޮތަށް މިކަން ކުރުމުގެ ސަބަބުން ހުރިހާ ގެއްލުމެއް ލިބެނީ ރައްޔިތުންނަށް ކަމަށެވެ.
މޮނޮޕޮލީއެއް ކުޅެ މޯލްޑިވިއަން އިން އައްޑޫ ރައްޔިތުން ފެލާ ރައްޔިތުންނާއި ދޭތެރޭ ހިތުހުރި އެއްޗެއް މިހަދަނީ ސަރުކާރުން. ފްލައިޓްތަކުގެ ދަތިކަން މިހާއޮންނައިރު މި ބޭފުޅުން އަމިއްލަ ދޯންޏަކަށް ހަދާ ގޮތަށް ކެމްޕޭން ދަތުރަށް ބޯޓުތަކުގެ ޝެޑިއުލް މި ބޭފުޅުންގެ ކޮންވިނިއަންސަށް އެބަ ބަދަލުކުރޭ، މިހެން ހެދުމުން އެންމެ ބޮޑު ގެއްލުމެއް ލިބެނީ ކަނެކްޓިން ފްލައިޓްތަކަށް އަރަން ތިބި މީހުންނަށް. ފްލައިޓް ލަސް އެބަކުރޭ ވަޒީރާއި މެންބަރު ފެންވަރާ ނިމެންދެން. މީޓިން ނިމެންދެން.ކޮފީ ނިމެންދެން.އައްޑޫ މީދޫ ދާއިރާގެ އަމިއްލަ މެންބަރު އަބްދުއްރަހްމާން
މީގެ އިތުރުން މެންބަރު އަބްދުއްރަހްމާން ވިދާޅުވީ ކޮންމެ އިންތިޚާބަކާއި ދިމާކޮށް އައްޑޫ ރައްޔިތުންނަށް އުޑުން ތަރި ބާލަދޭ ކަމަށެވެ. ނަމަވެސް އައްޑޫ އިސްކުރަނީ ވާހަކަ އިން ކަމަށާއި، ވެރި ކަމަށް ދެއަހަރަށް ވުރެ ގިނަ ދުވަސްވީއިރު، އެއްވެސް އިސްކަމެއް ދީފައިނުވާ ކަމަށް އޭނާ ވިދާޅުވި އެވެ.
އައްޑޫ ސިޓީ އަށް ތަރައްގީ ބޭނުންވާކަން ފާހަގަކުރައްވައި މެންބަރު އަބްދުއްރަހްމާން ވިދާޅުވީ އައްޑޫ އަށް ހަމައެކަނި ބޭނުންވަނީ މަގާއި ކަރަންޓުގެ ޚިދުމަތް ނޫން ކަމަށެވެ. މިއާއެކު، މަސް ފެކްޓަރީ، ބްރިޖް، ބޭހާއި، ބޭސްފަރުވާ، އައްސޭރި ޓުއަރިޒަމުން 10 ހާސް ވަޒީފާ އައްޑޫ ރައްޔިތުން ބޭނުންވާ ކަމަށް އޭނާ ވިދާޅުވި އެވެ.
މެންބަރު އަބްދުއްރަހްމާން ވިދާޅުވީ، ރައީސް ޑރ. މުހައްމަދު މުއިއްޒު ވައުދުވެވަޑައިގެންނެވި ކަންކަން ނުވާ ކަމަށްވާނަމަ އެ ވާހަކަތައް ދައްކާނެ ކަމަށެވެ. އަދި އައްޑޫގެ މެޖޯރިޓީ އަކީ ވަޒީފާއެއް ދަށުވެ ނުވަތަ އަމިއްލަ އެދުމާއެކު، ތިބި ބައެއް ކަމަށް ސަރުކާރުން ދެކިގެން ނުވާނެ ކަމަށާއި، ސަރުކާރަށް ސަނާ ކިޔަން ޖެހޭ ސަބަބެއް ނެތް ކަމަށް މެންބަރު އަބްދުއްރަހްމާން ވިދާޅުވި އެވެ.
