ދާއިރާގެ ނިކަމެތިންނަށް ފްލެޓް ނުލިބުނުގޮތް ސާފުކުރުމަށް ރިފާއު ސިޓީއެއް ފޮނުއްވައިފި
17 ސެޕްޓެމްބަރު 2017 | އާދީއްތަ 14:35ފްލެޓް ދިނުމުގެ ކަންކަން ހިންގާފައި އޮންނަންވާނީ ހަމަޔާއި އިންސާފްގެ ތެރެއިން އެންމެ ނިކަމެތިމީހާއަށް ފުރުސަތު ތަނަވަސްވާ ގޮތެއްގެ މަތިން
މެންބަރު ރިފާއު:ފްލެޓް ދިނުމުގައި މައްސަލަތައް އެބަހުރި
މާފަންނު ދެކުނު ދާއިރާއިން ފްލެޓަށް ކުރިމަތިލާފައިވާ ނިކަމެތި ރައްޔިތުންނަށް ފްލެޓް ނުލިބުނުގޮތް ސާފުކޮށް ދެއްވުން އެދި އެދާއިރާގެ ޕީޕީއެމަށް ނިސްބަތްވާ ޢަބްދުﷲ ރިފާއު (ބޮޗޭ) ހައުސިން މިނިސްޓަރ ޑރ މުހައްމަދު މުއިއްޒުއަށް ސިޓީއެއް ފޮނުއްވައިފިއެވެ.
ޝަކުވާތަކެއްގެ މައްޗަށް ބިނާކޮށް ރިފާއު މިފަދަ ސިޓީއެއް ފޮނުއްވާފައި މިވަނީ ފްލެޓް ދިނުމުގައި އެއްވެސް އިންސާފެއް ހަމަހަމަކަމެއް ނެތްކަމާއި ރައީސް ޔާމީންގެ ކެމްޕެއިން އޮފީހުން ކަނޑައެޅި ބަޔަކަށް ފްލެޓްތައް ދީފައިވާ ކަމަށް ބުނެ ރައްޔިތުން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ.
ރިފާއު ފޮނުއްވި ސިޓީގައި ވިދާޅުވެފައި ވަނީ އެމެންބަރު ނިސްބަތްވާ ދާއިރާގެ ރައްޔިތުންނާއި އެފަރާތާއި އެކިގޮތްގޮތުން ގުޅިފައިވާ ރައްޔިތުންގެ ތެރެއިން "ގެދޮރުވެރި ކުރުން" ޕްރޮގްރާމްގެ ދަށުން ދޫކުރަން ހަމަޖެހިފައިވާ ފްލެޓަށް ކުރިމަތިލީ ފަރާތްތަކުގެ ތެރެއިން ހައުސިންގ މިނިސްޓްރީން ކޮށްފައިވާ އިއުލާންގައި ހިމަނާފައިވާ ލިސްޓަށް ނަން އަރާފައި ނުވާތީ އެކަން ވީގޮތެއް ސާފުކޮށްދިނުމަށް އެދި އެމެންބަރަށް ޝަކުވާ ހުށަހަޅާފައިވާ ކަމަށެވެ.
ރިފާއު ވިދާޅުވީ އެމެންބަރު އަބަދުވެސް ޤަބޫލް ކުރާ ހަމަޔަކީ އެކަން ހިންގާފައިވާންވާނީ ހަމަޔާއި އިންސާފްގެ ތެރެއިން އެންމެ ނިކަމެތިމީހާއަށް ފުރުސަތު ތަނަވަސް ގޮތެއްގެ މަތިން ކަމަށެވެ. އެހެން ނަމަވެސް ހިތާމަޔާއެކު ދަންނަވަން ޖެހެނީ އެދާއިރާގެ ވަރަށް ނިކަމެތި ދިރިއުޅުން އުޅެމުންދާ އެތައް ފަރާތެއްގެ ލިސްޓަގައި ހިމަނާފައި ނުވާކަމަށް ކަމުގައި ރިފާއު ވިދާޅުވެފައި ވެއެވެ. އަދި ރިފާއުގެ ސިޓީގައި ވަނީ އެފަދަ ބައެއްގެ ފޯމް ނަމަބަރުގެ ލިސްޓެއް ހުށަހަޅުއްވާފައެވެ.
ރިފާއު ވަނީ އެލިސްޓުގައިވާ ފަރާތްތަކުގެ މައުލޫމާތު ޗެކްކޮށްދެއްވައި މިފަހަރުގެ ލިސްޓުގައި ނުހިމެނުނީ ކީއްވެކަން އަންގަވައިދެއްވުން އެދިލައްވާ ކަމަށެވެ.
ފްލެޓް ލިބޭ މީހުން ހާމަކުރިއިރު ސަރުކާރަށާއި ހައުސިން މިނިސްޓްރީން އިންސާފުން އެއްކިބާވެފައިވާކަމަށް ބުނެ ރައްޔިތުން އެތައް ޝަކުވާއެއް ހުށަހަޅަމުން ދަނިކޮށް ރިފާއު އެސިޓީގައި ވިދާޅުވެފައިވަނީ އެމެންބަރު ޔަޤީންކުރަން ބޭނުންވަނީ ސަރުކާރުން މިއަދާހަމައަށްވެސް ރައްޔިތުންނަށް ގެނެސްދެއްވާ ތަރައްޤީއާ ދެއްވަމުންދާ ޚިދުމަތްތައްވަނީ ސިޔާސީ ފިކުރެއް ނުބައްލަވާ ހަމަހަމަކަމާއިއެކު އިންސާފުންކަމަށްވާއިރު އެކަންވެސް ގެންދަވާނީ އެހަމައިން ކަމަށް ކަމަށެވެ. އަދި ރިފާއު ހުށަހެޅުއްވި ޝަކުވާއާއި ލިސްޓާ ގުޅިގެން ހުށަހަޅާފައިވާ އެހެން ޝަކުވާތަކެއް ބެއްލެވުމަށް ފަހުގައި މެނުވީ ދާއިމީ ލިސްޓެއް ނުނެރުމަށް ވެސް އެދިލައްވާކަމަށް ވިދާޅުވެފައިވެއެވެ.
ރިފާއު މިސިޓީ ފޮނުއްވާފައިވާއިރު އިދިކޮޅު ޕާޓީއަށް ނިސްބަތްވާ ރައްޔިތުންގެ މަޖިލީހުގެ މާލޭގެ މެންބަރުންނާއި މާލޭ ސިޓީ ކައުންސިލްގެ މެންބަރުންވެސް ވަނީ ހައުސިން މިނިސްޓްރީއަށް ވަޑައިގެން ކަންބޮޑުވުން ފާޅުކުރައްވާފައެވެ.
