ތެހެރާނުގެ ސުކޫލަކަށް އެމެރިކާ އާއި އިޒްރޭލުން ހަމަލާދީފި، މިއީ ހަމަލާ ދިން ހަތަރު ވަނަ ސްކޫލް

އީރާނުގެ ވެރިރަށް ތެހެރާންގެ ނީލޫފަރު މައިދާނުގައި ހުންނަ ފަށާ ތަޢުލީމުދޭ ސުކޫލަކަށް، އެމެރިކާއާއި އިޒްރޭލުން ދިން ހަމަލާތަކެއް އަމާޒުވެފައިވާ ކަމަށް އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވެއްޖެއެވެ.

ހުކުރު ދުވަހު އެކްސްގައި ބަޣާއީ ހިއްސާކުރެއްވި ވީޑިއޯއަކުން ފެންނަނީ "ޝަހީދު ހަމަދާނީ" ސުކޫލަށް ހަމަލާދިނުމުގެ ކުރިންނާއި ފަހުން ދަރިވަރުން އެތަނުގައި ތިބި މަންޒަރެވެ. ނަމަވެސް، މި ހަމަލާ ހިނގަން މެދުވެރިވި ގޮތުގެ ތަފްސީލެއް ނުވަތަ މި ހާދިސާގައި މަރުވި މީހުންނާއި އަނިޔާވި މީހުންގެ ސީދާ އަދަދެއް އޭނާ ހާމަކުރައްވާފައެއް ނުވެއެވެ. މި ހަމަލާ ކަށަވަރުވެއްޖެ ނަމަ، މިއީ ހަނގުރާމަ ފެށުނު ފަހުން އީރާނުގައި ހަމަލާ އަމާޒުވި ހަތަރުވަނަ ސުކޫލަށް ވާނެއެވެ.

އެމެރިކާއާއި އިޒްރޭލުން އީރާނަށް ހަމަލާދޭން ފެށި ފުރަތަމަ ދުވަސް ކަމަށްވާ ހޮނިހިރު ދުވަހު، އެންމެ ފުރަތަމަ ހަމަލާ އަމާޒުވީ އެ ގައުމުގެ ދެކުނުގެ ސިޓީއެއް ކަމަށްވާ މިނާބްގައި ހުންނަ "ޝަޖަރޭ ތައްޔިބާ" އަންހެން ކުދިންގެ ސުކޫލަށެވެ. އދ. ގެ މާހިރުން ބުނާ ގޮތުގައި އެ ހަމަލާގައި 160 ކުޑަކުދިންނާއި ފަސް މުވައްޒަފުން ވަނީ މަރުވެފައެވެ.

އިޒްރޭލާ ގުޅުން އޮންނަ ބައެއް ވެބްސައިޓްތަކާއި ސޯޝަލް މީޑިއާ އެކައުންޓްތަކުން ބުނަމުންދަނީ، ހަނގުރާމައިގެ ފުރަތަމަ ދުވަހު ހަމަލާދިން ސަރަހައްދަކީ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ މަރުކަޒެއްގެ ބައެއް ކަމަށެވެ.

ނަމަވެސް، އަލްޖަޒީރާގެ ޑިޖިޓަލް އިންވެސްޓިގޭޝަން ޔުނިޓުން ފާއިތުވި 10 އަހަރަށްވުރެ ގިނަ ދުވަހުގެ ސެޓެލައިޓް ފޮޓޯތަކާއި، ފަހުގެ ވީޑިއޯ ކްލިޕްތަކާއި، ޚަބަރުތަކާއި އީރާނުގެ ރަސްމީ މަސްދަރުތަކުން ނެރެފައިވާ ބަޔާންތައް ދިރާސާކުރުމަށްފަހު ހާމަކޮށްފައިވާ ގޮތުގައި، އެ ސުކޫލަކީ މަދުވެގެން ވޭތުވެދިޔަ 10 އަހަރު ދުވަހުވެސް ކައިރީގައި ހުރި އަސްކަރީ މަރުކަޒާ މުޅިން ވަކިން ހުރި ތަނެކެވެ. މި ތަހުގީގުން އިތުރަށް ހާމަވި ގޮތުގައި، ހަމަލާ ދީފައިވާ ގޮތުން އެ ހަމަލާ ބިނާކުރި އިންޓެލިޖެންސް މައުލޫމާތުގެ ސައްހަކަމާމެދު ބޮޑެތި ސުވާލުތަކެއް އުފެދެއެވެ. އަދި މިއީ ގަސްދުގައި ސުކޫލަށް އަމާޒުކޮށް ދިން ހަމަލާއެއްތޯވެސް މި ހޯދުންތަކުގެ ސަބަބުން ސުވާލު އުފެދެއެވެ.

މި ހާދިސާއާ ގުޅިގެން ފާޑުކިޔުންތައް އަމާޒުވެފައި ވަނިކޮށް، އެމެރިކާގެ އަސްކަރިއްޔާއިން ދަނީ މިކަން ތަހުގީގު ކުރަމުން ކަމަށް އެ ގައުމުން ވަނީ އެއްބަސްވެފައެވެ. ރޮއިޓާސް ނިއުސް އެޖެންސީން އެމެރިކާގެ ދެ އޮފިޝަލަކާ ހަވާލާދީ ރިޕޯޓްކޮށްފައިވާ ގޮތުގައި، އެމެރިކާގެ އަސްކަރީ ތަހުގީގު ކުރާ ފަރާތްތަކުން ގަބޫލުކުރަނީ މި ހަމަލާގެ ޒިންމާ އުފުލަންޖެހެނީ އެމެރިކާގެ ސިފައިން ކަމަށްވުން ވަރަށް ގާތް ކަމަށެވެ. ނަމަވެސް މިކަމުގައި އަދި ވަކި ގޮތެއް ނިންމާފައެއް ނުވެއެވެ.