އީރާނަށް ދޭ ހަމަލާތައް ވަރުގަދަ ކުރުމަށް އެމެރިކާގެ ބިޔަ އެންމެ ހަލުއި ބޮންއަޅާ ބޯޓު އިނގިރޭސިވިލާތަށް ޖައްސައިފި

އެއްފަހަރާ 24 ކްރޫޒް މިސައިލް އުފުލުމުގެ ގާބިލުކަން ލިބިފައިވާ އެމެރިކާގެ ބިޔަ ބޮންއަޅާ ބޯޓެއް އިނގިރޭސިވިލާތަށް ޖައްސައިފި އެވެ.

ދިގުމިނުގައި 146 ފޫޓު (44.5 މީޓަރު) ހުންނަ "ބީ-1 ލާންސަރ" މަރުކާގެ މި ބޯޓު އިނގިރޭސިވިލާތުގެ ގްލޮސްޓަރޝަޔަރގައި ހުންނަ ރޯޔަލް އެއަރ ފޯސް (އާރް.އޭ.އެފް) ފެއަރފޯޑް މަރުކަޒަށް ޖެއްސީ މިދިޔަ ހުކުރު ދުވަހުއެވެ.

އެމެރިކާގެ މި ބޯޓު އިނގިރޭސިވިލާތަށް މި އައީ، އީރާނުގެ މިސައިލް މަރުކަޒުތަކަށް ދޭ ދިފާއީ ހަމަލާތަކުގައި އިނގިރޭސިވިލާތުގެ އަސްކަރީ މަރުކަޒުތައް ބޭނުންކުރުމުގެ ހުއްދަ އެ ގައުމުގެ ބޮޑުވަޒީރު ސަރ ކިއަރ ސްޓާމަރ އެމެރިކާއަށް ދެއްވުމާ ގުޅިގެންނެވެ.

ހުޅަނގުގެ އޮފިޝަލުން މި ހަފުތާގެ ކުރީކޮޅު ވިދާޅުވެފައިވާ ގޮތުގައި، އެމެރިކާގެ ބޮންއަޅާ ބޯޓުތައް ބަލައިގަތުމަށް އިނގިރޭސިވިލާތުން އޮތީ ތައްޔާރަށެވެ. އަދި ކުރިއަށް އޮތް މަދު ދުވަސްކޮޅެއްގެ ތެރޭގައި އެ ބޯޓުތައް އަންނާނެ ކަމަށް އޭރު އޮތީ ބެލެވިފައެވެ.

ހަތަރު ފަޅުވެރިންނާއެކު ދުއްވާ، ފިޔަގަނޑުގެ ފުޅާމިނުގައި 137 ފޫޓު (41.8 މީޓަރު) ހުންނަ މި ބޯޓަކީ 86 ޓަނުގެ ބަރުދަން ހުންނަ އުޅަނދެކެވެ. ބޯއިންގް ކުންފުނިން ބުނާ ގޮތުގައި މިއީ ގަޑިއަކު 900 މޭލަށް (1,448.4 ކިލޯމީޓަރު) ވުރެ ބާރަށް ދަތުރުކުރާ، އެމެރިކާގެ ވައިގެ ސިފައިންގެ އަތުގައި އޮތް އެންމެ ހަލުވި ބޮންއަޅާ ބޯޓެވެ.

އެމެރިކާގެ ޑިފެންސް ސެކްރެޓަރީ ޕީޓް ހެގްސެތު މިދިޔަ ބުރާސްފަތި ދުވަހު ވިދާޅުވީ، އީރާނަށް ދޭ ހަމަލާތައް ވަރަށް ބޮޑަށް އިތުރުކުރަން ތައްޔާރުވަމުންދާ ކަމަށެވެ.

މިކަމާ ގުޅޭގޮތުން އޭނާ ވިދާޅުވީ، އިތުރު ފައިޓަރ ޖެޓްތަކާއި، އިތުރު ވަސީލަތްތަކުގެ އިތުރުން ދިފާއީ ގާބިލުކަން ވަރުގަދަކުރަމުންދާ ކަމަށެވެ. އަދި މީގެ އިތުރުން ބޮންއަޅާ ބޯޓުތަކުގެ ހަރަކާތްތައް ކުރިއަށްވުރެ ގިނައިން ފެންނާނެ ކަމަށްވެސް އޭނާ ވިދާޅުވިއެވެ.

"ދަ ބޯން" ގެ ނަމުން މަޝްހޫރުވެފައިވާ މި ބޯޓުގައި އަމާޒުތަކަށް ހަމަލާދިނުމަށް އެހީތެރިވެދޭ އެންމެ ޒަމާނީ ރޭޑާ އަދި ޖީ.ޕީ.އެސް ނިޒާމުތައް ހުރެއެވެ. މީގެ އިތުރުން ދުޝްމަނުންގެ ކިބައިން ސަލާމަތްވުމަށްޓަކައި އިލެކްޓްރޯނިކް ޖޭމަރުތަކާއި، ރޭޑާ އިންޒާރުދޭ ނިޒާމުތަކުގެ އިތުރުން އޮޅުވާލުމުގެ ނިޒާމުތައް (ޑެކޯއި ސިސްޓަމް) ވެސް މި ބޯޓުގައި ހަރުކޮށްފައިވެއެވެ.

ގްލޮސްޓަރޝަޔަރ އަދި ވިލްޓްޝަޔަރ ގުޅޭ ބޯޑަރުގައި އޮންނަ އާރް.އޭ.އެފް ފެއަރފޯޑް މަރުކަޒަކީ، މީގެ ކުރިންވެސް ދުރު ރާސްތާގެ ބަރު ހަތިޔާރު ބޭނުންކޮށްގެން ހަމަލާދިނުމުގެ މިޝަންތަކުގައި އެމެރިކާއިން ބޭނުންކޮށްފައިވާ ތަނެކެވެ.

އީރާނުގެ އަސްކަރީ މަރުކަޒުތަކަށް ދިފާއީ ހަމަލާތައް ދިނުމަށް އިނގިރޭސިވިލާތުގެ މަރުކަޒުތައް ބޭނުންކުރުމުގެ ހުއްދަ އެމެރިކާއަށް ދީފައިވީ ނަމަވެސް، އިނގިރޭސިވިލާތުން ސީދާ އެ ހަމަލާތަކުގައި ބައިވެރިއެއް ނުވެއެވެ.

އެ ސަރަހައްދުގައި ތިބި އިނގިރޭސިވިލާތުގެ ބައިވެރިންނަށް އަމާޒުކޮށް އީރާނުން ފޮނުވާލާ މިސައިލްތަކާއި ޑްރޯންތައް ވައްޓާލުމުގެ މަސައްކަތް އިނގިރޭސި ވައިގެ ސިފައިންގެ ޖެޓްތަކުން ދަނީ ކުރަމުންނެވެ.

ހުކުރު ދުވަހުގެ ކުރީކޮޅު ބޮޑުވަޒީރުގެ ތަރުޖަމާނު ނޫސްވެރިންނަށް މައުލޫމާތު ދެއްވަމުން ވިދާޅުވީ، އިނގިރޭސި ރައްޔިތުންގެ ފުރާނައާއި، އިނގިރޭސިވިލާތުގެ މަސްލަހަތާއި، އެ ސަރަހައްދުގައި ތިބި ބައިވެރިން ހިމާޔަތްކުރުމަށްޓަކައި، ވަކި ހުދޫދެއްގެ ތެރެއިން ދިފާއީ ބޭނުންތަކަށް އެމެރިކާއަށް އިނގިރޭސި މަރުކަޒުތައް ބޭނުންކުރުމުގެ ހުއްދަ ދީފައިވާނެ ކަމަށެވެ.

އޭނާ އިތުރަށް ވިދާޅުވި ގޮތުގައި، އިނގިރޭސި އަސްކަރިއްޔާއިން މައިގަނޑު ގޮތެއްގައި ސަމާލުކަން ދެނީ ވައިގެ ތެރޭގައި އުޅޭ ޑްރޯންތައް ވައްޓާލުމަށެވެ. އަދި އެމެރިކާއިން އަމާޒުކުރަނީ އީރާނުގައި ހުރި މިސައިލް ފޮނުވާލާ މަރުކަޒުތަކަށެވެ.

"އަޅުގަނޑުމެން އަބަދުވެސް ބުނަމުން މިދަނީ ކުރިއަށް އޮތް ތަނުގައި ދީފާނެ ހަމަލާތަކުން ރައްކާތެރިވުމަށް އަޅަންޖެހޭ ފިޔަވަޅުތައް އަޅާނެ ކަމަށް. މި ހަފުތާގައި އަޅުގަނޑުމެން ހާމަކުރި ފަދައިން، އަޅުގަނޑުމެން ވައިގެ ސަރަހައްދު ދިފާއުކުރަމުންދާއިރު، އެމެރިކާއަށް ހުއްދަ މިދެނީ އެ މިސައިލްތައް ފޮނުވާލާ މަރުކަޒުތައް ނައްތާލުމަށް،" ތަރުޖަމާނު ވިދާޅުވިއެވެ.