ބޭރުގައި ކިޔަވަން ތިބި ބައެއް ކުދިން ކާނެ ލާރި ވެސް ނެތިފައި، ފައިސާ ފޮނުވި ކަމަށް ބުނެ ސަރުކާރުން ހަދަނީ ދޮގު!
ފައިސާ ނުލިބުމުގެ ސަބަބުން ދަރިވަރުން ވަނީ ހާލުގައި ޖެހިފައެވެ.
ސްޓޫޑެންޓް ލޯނު ދިނުމަށް ބޭއްވި ރަސްމިއްޔާތެއްގެ ތެރެއިން
ސަރުކާރުގެ ޚަރަދުގައި ދީފައިވާ ސްކޮލާޝިޕްތަކާއި ސްޓޫޑެންޓު ލޯނުގެ އެހީގައި ބޭރުގައި ކިޔަވާ ދިވެހި ދަރިވަރުންނަށް ފޯރުކޮށްދޭން ޖެހޭ ފައިސާ ނުދެވި ބައެއް ދަރިވަރުން ވަރަށް ބޮޑަށް ވަނީ ހާލުގައި ޖެހިފައެވެ. ހަޔާ އެޑިއުކޭޝަން މިނިސްޓްރީން ފައިސާ ފޯރުކޮށްދެމުން ނުދާތީ ދަރިވަރުންގެ ކުއްޔާއި ޓިއުޝަން ފީ ނުދެއްކި ބައެއް ދަރިވަރުން ވަނީ ވަރަށް ބޮޑަށް މާޔޫސްވެފައެވެ. ރާއްޖެއެމްވީ އާއި ވާހަކަދެއްކި ބައެއް ކުދިން ބުނެފައި ވަނީ އެ ކުދިން އުޅެމުން އައީ މަހުން މަހަށް ސަރުކާރުން ފޯރުކޮށްދޭ ފައިސާ މެނޭޖްކޮށްގެން ކަަމަށެވެ. އަދި ބައެއް ކުދިންނަކީ ވަރަށް ނިކަމެތި ފަގީރު އާއިލާތަކަށް ނިސްބަތްވާ ކުދިން ކަމަށް ވުމާއި އެކު އެ ކުދިންގެ އަތުގައި ކާނެ ލާރިވެސް ނުހުންނަކަމަށް އެ ދަރިވަރުން ވަނީ ބުނެފައެވެ. އަދި ބައެއް ކުދިންގެ އާއިލާތަކަކީ ފައިސާ ފޮނުވޭހާ މާލީ ތަނަވަސްކަން ހުރި އާއިލާތައް ނޫން ކަމަށް ވެސް އެ ދަރިވަރުން ވަނީ ބުނެފައެވެ. ނަމަވެސް ފުދުންތެރިކަން ހުރި އާއިލާތަކުގެ ކުދިން މިވަގުތު ކަމުން ދަނީ ވެސް އާއިލާގެ އެހީތެރިކަމާއި އެކުގައި ކަމަށް އެ ދަރިވަރުން ވަނީ ބުނެފައެވެ. އެ ކުދިން އެ ހާލަތުގައި ތިބި އިރު ދަރިވަރުންގެ އެންމެ ބޮޑު ކަންބޮޑުވުމަކީ ހަޔަރ އެޑިއުކޭޝަން މިނިސްޓްރީން އެކަށީގެންވާ އިޖާބައެއް ނުދިނުމެވެ.
ފައިސާ ނުލިބޭ ދަރިވަރުންގެ ތެރޭގައި ޔޫކޭ އާއި އޮސްޓްރޭލިއާ ފަދަ ޤައުމުތަކުގައި ތިބި ދަރިވަރުންވެސް ހިމެނެއެވެ. ބައެއް ދަރިވަރުންނަށް ފައިސާ ފޯރުކޮށްދިނުމުގެ އިންތިޒާމްތައް ހަމަޖެހިފަައި އޮންނަނީ ކޮންމެ ހަމަހަމަކުން ހަމަކުން ފައިސާ ދޭ ގޮތަށެވެ. އެހެންކަމަށް ވާއިރު މިދިޔަ ޑިސެމްބަރު މަހުން ފެށިގެން އެއްވެސް މިންވަރަކަށް ފައިސާ ނުލިބޭ 6 ކުދިން ތިބި ކަމަށް ރާއްޖެ އެމްވީ އާއި ވާހަކަދެއްކި ބައެއް ދަރިވަރުން ވަނީ ބުނެފައެވެ. އެ ފައިސާ ޖަމާ ނުވާތީ ދަރިވަރުންނާއި އާއިލާތަކުން އެކަމުގެ ޝަކުވާ ކުރަން ފެށުމުން ޝަކުވާ ކުރާ ދަރިވަރުން ބްލެކްލިސްޓްކޮށް ސްކޯލަރޝިޕްގެ ފައިސާ ކަނޑާލަފާނެ ކަމަށް ދޭހަވާ މޭރުމަކުން އެ ދަރިވަރުންނާއި ވަނީ މުއާމަލާތުކޮށްފައެވެ. އަދި ފައިސާ ނުދެއްކުމުގެ ސަބަބުން ބައެއް ދަރިވަރުންގެ އިމްތިހާނުގެ ނަތީޖާ ވެސް ނުބެލޭނެ ކަމަށް ދަރިވަރުން ވަނީ ބުނެފައެވެ.
ބައެއް މީޑިއާތަކަށް މި މައްސަލައިގައި މައުލޫމާތުދެއްވަމުން ހަޔަރ އެޑިއުކޭޝަން މިނިސްޓަރ ޑރ މަރިޔަމް މާރިޔާ ވިދާޅުވީ، ދަރިވަރުންނަށް ފައިސާ ޖަމާ ކުރުމުގައި ލަސްތަކެއް އެބަހުރިކަމަށެވެ. އެހެންނަމަވެސް އެކަމުގެ އިތުރު ތަފްސީލެއް ހާމައެއް ނުކުރައްވައެވެ.
މީގެ ކުރިން މިކަމާއި ގުޅޭގޮތުން ރާއްޖެ އެމްވީން ސުވާލުކުރުމުން ސަރުކާރުގެ ތަރުޖަމާން ހީނާ ވަލީދު ވަނީ ސަރުކާރުން ފޯރުކޮށްދޭން ޖެހޭ ފައިސާ ބަރާބަރަށް ފޯރުކޮށްދެމުންދާ ކަމަށް ވިދާޅުވެ އިތުރުފުޅު ހައްދަވާފައެވެ. ސްޓައިޕެންޑް ނުލިބޭކަމަށް ބުނެ ދެކެވެމުންދަނީ ދޮގު ވާހަކަތަކެއް ކަމަށް ވެސް ހީނާ ވިދާޅުވިއެވެ. އެހެންނަމަވެސް އިތުބާރު ހުރި މަސްދަރަކުން ރާއްޖެއެމްވީ އަށް މައުލޫމާތު ދެމުން ބުނީ ހަޔަރ އެޑިއުކޭޝަނުން ފިނޭންސަށް ފައިސާ ހޯދަން އެދި ފޮނުވި ސިޓީގެ ޖަވާބުގައި ފައިސާ ނެތް ކަމަށް ފިނޭންސުން ބުނެފައިވާ ކަމަށެވެ. އެހެންނަމަވެސް ސަރުކާރުން އެކަން ސިއްރުކުރަމުންދާ ކަމަށް ރާއްޖެ އެމްވީ އަށް މައުލޫމާތު ދިން މީހާ ވަނީ ނަން ހާމަ ނުކުރުމަށް ޝަރުތުކޮށް ބުނެފައެވެ. ދަރިވަރުންނަށް މިނިސްޓްރީން މިހާތަނަށް ވެސް ޖަވާބެއް ނުދޭތީ ދަރިވަރުން ދަނީ ކަންބޮޑުވުން ފާޅުކުރަމުންނެވެ. އަދި ފައިސާ ނުދެއްކުމުން އަލުން އެއް ސެމް ކިޔަވަން ޖެހިދާނެ ކަމުގެ ބިރު ބައެއް ދަރިވަރުންނަށް އެބަ އޮތެވެ.
