މީގެ އިތުރުން ސޯޝަލް މީޑިއާ އަދި އެކި ގޮތް ގޮތުން އޭނާ އަށް ހަމައަށް އަންނަ މެސެޖާއި ކަންބޮޑުވުން، ހަޔަރ އެޑިއުކޭޝަން މިނިސްޓަރު ޑޮކްޓަރު އަލީ ހައިދަރުއާ ހިއްސާ ކުރައްވަމުން އަންނަ ކަމަށް ވަޒީރު ވިދާޅުވި. އަދި އެކަމުގައި ހަޔަރ އެޑިއުކޭޝަން މިނިސްޓަރާ ގުޅައި، މަޝްވަރާ ކުރުން ވެސް ކުރިއަށް ގެންދަވާ ކަމަށް ވިދާޅުވި.
ޒުވާނުންގެ ވަޒީރު އިބްރާހީމް ވަހީދު (އަސްވާޑު)
ރާއްޖެ އިން ބޭރުގައި ކިޔަވަން ތިބޭ ޒުވާނުން އުޅޭ ޙާލު ސޯޝަލް މީޑިއާ އިން ފެނިވަޑައިގަންނަވާ ކަމަށް، ޒުވާނުންގެ ވަޒީރު އިބްރާހީމް ވަހީދު (އަސްވާޑު) ވިދާޅުވެއްޖެ އެވެ.
ވަޒީރު މިހެން ވިދާޅުވީ ރާއްޖެ އިން ބޭރުގައި ކިޔަން ތިބޭ ޒުވާނުންނަށް ސަރުކާރުން ދޭން ޖެހޭ ފައިސާ ނުދެވި ގިނަ ދުވަސް ތަކެއް ވެފައިވާ ކަމުގެ ކަންބޮޑުވުން އުފެދިފައި ވަނިކޮށެވެ. އެގޮތުން ފައިސާ ނުލިބުމުގެ ސަބަބުން ބައެއް ޒުވާނުންނަށް ކޯސް ކުރިއަށް ގެންދިޔުމުގައި ވެސް އެތައް ދަތި ތަކެއް ދިމާވަމުން އާދެ އެވެ. އެކަމުގެ ކަންބޮޑުވުން އެ ފަރާތްތަކުން އަންނަނީ ފާހަގަ ކުރަމުންނެވެ.
އެކަމާ ގުޅޭ ގޮތުން ރާއްޖެ ޓީވީ އިން ސުވާލު ކުރުމުން ޒުވާނުންގެ ވަޒީރު ވިދާޅުވީ، ކިޔަވާ ދަރިވަރުންނަށް ފައިސާ ނުލިބޭ މައްސަލައިގައި އޭނާ ގެ ކަންބޮޑުވުން އޮތް ކަމަށެވެ. އެގޮތުން ދިވެހި ކޮންމެ ޒުވާނަކަށް، ކޮންމެ ރައްޔިތަކަށް، ދިމާވާ ކޮންމެ ދައްޗަކީ އަދި ކޮންމެ އުނދަގުލަކީ، އެކަމުގައި ވަޒީރުގެ ހައިސިއްޔަތުން އެހީތެރިކަން ފޯރުކޮށްދޭނެ ކަންކަން ކަމަށް ވަޒީރު ވިދާޅުވި އެވެ.
މީގެ އިތުރުން ސޯޝަލް މީޑިއާ އަދި އެކި ގޮތް ގޮތުން އޭނާ އަށް ހަމައަށް އަންނަ މެސެޖާއި ކަންބޮޑުވުން، ހަޔަރ އެޑިއުކޭޝަން މިނިސްޓަރު ޑޮކްޓަރު އަލީ ހައިދަރުއާ ހިއްސާ ކުރައްވަމުން އަންނަ ކަމަށް ވަޒީރު ވިދާޅުވި އެވެ. އަދި އެކަމުގައި ހަޔަރ އެޑިއުކޭޝަން މިނިސްޓަރާ ގުޅައި، މަޝްވަރާ ކުރުން ވެސް ކުރިއަށް ގެންދަވާ ކަމަށް ވިދާޅުވި އެވެ.
އަޅުގަނޑު ފޯނުގައި ހަޔަރ އެޑިއުކޭޝަން މިނިސްޓަރާ، ތި ދަންނަވާހެން ސޯޝަލް މީޑިއާ އާއި، އެކި ގޮތް ގޮތުން އަޅުގަނޑަށް ވެސް އަންނަ މެސެޖުތަކާ އެއްޗިސް އަޅުގަނޑު ހަޔަރ އެޑިއުކޭޝަން މިނިސްޓަރަށް ޕާސް ކުރަން. އަދި ހަޔަރ އެޑިއުކޭޝަން މިނިސްޓަރާ ގުޅައި، މަޝްވަރާކޮށް، ދިވެހި ޒުވާނަކަށް، ހަރު މީހަކަށް، ރާއްޖެ އިން ބޭރުގައި ވިޔަސް، ރާއްޖޭގެ އެއްވެސް މީހަކު ޙާލުގައި ޖެހުމަކީ ދައުލަތަށް އެފޯޑު ކުރެވޭނެ ކަމެއް ނޫން. އަޅުގަނޑު ޤަބޫލު ކުރަނީ މިވަގުތު ވެސް ހަޔަރ އެޑިއުކޭޝަން މިނިސްޓަރު މި ޕަޓިކިއުލާ ކޭސްގައި ކުރިއަށް އެބަ ގެންދަވާ އިނގޭތޯ.ޒުވާނުންގެ ވަޒީރު އިބްރާހީމް ވަހީދު (އަސްވާޑު)
ވަޒީރު މިހެން ވިދާޅުވެފައިވާއިރު، މީގެ ކުރިން ހަޔަރ އެޑިއުކޭޝަން މިނިސްޓަރު ހައިދަރު ވިދާޅުވެފައި ވަނީ، ރާއްޖެ އިން ބޭރުގައި ކިޔަވާ ދަރިވަރުންނަށް ފައިސާ ދިނުމުގައި މައްސަލައެއް ނޯންނާނެ ކަމަށެވެ. އެގޮތުން ފައިސާ ނުލިބޭ ކަމުގެ ޝަކުވާ ވެސް މިނިސްޓްރީއާ ހަމައަށް އައިސްފައި ނުވާ ކަމަށް ވަޒީރު ވިދާޅުވެފައިވެ އެވެ.
ނަމަވެސް، ރާއްޖެ އިން ބޭރުގައި ކިޔަވަމުން އަންނަ ގިނަ ޒުވާނުން ފާހަގަ ކޮށްފައިވާ ގޮތުގައި ފައިސާ ނުލިބޭ މައްސަލައިގައި ހަޔަރ އެޑިއުކޭޝަން މިނިސްޓްރީއާ މުއާމަލާތް ކުރި ނަމަވެސް، އެއްވެސް ޖަވާބެއް ނުލިބޭ ކަމަށެވެ. އެގޮތުން މިނިސްޓްރީ އިން ފޯނު ނުނަގާ ކަމަށާއި، މިނިސްޓްރީ އަށް ފޮނުވާ މެއިލް ތަކަށް ވެސް ޖަވާބު ނުލިބޭ ކަމަށް ވަނީ ފާހަގަ ކޮށްފަ އެވެ.
ދަރިވަރުންނަށް ފައިސާ ނުލިބި މައްސަލަ ބޮޑުވެފައިވާއިރު، ބައެއް ދަރިވަރުން ވަނީ ހަޔަރ އެޑިއުކޭޝަން މިނިސްޓްރީގެ ކުރިމަތީގައި އިހުތިޖާޖު ވެސް ކޮށްފަ އެވެ.
