މައުޟޫޢު އާއި ގުޅުނަސް ނުގުޅުނަސް، ވަޒީރު ހައިދަރުގެ ޖަވާބެއް ނެތް!

މިހާރުގެ ހަޔަރ އެޑިޔުކޭޝަން ލޭބަރ އެންޑް ސްކިލްސް ޑިވެލޮޕްމަންޓް ޑޮކްޓަރ ޢަލީ ޙައިދަރު އަޙްމަދު މި ސަރުކާރު ފެށުނު އިރު ހުންނެވީ ހައުސިން މިނިސްޓަރކަމުގައެވެ. މި ވެރިކަމުގައި އެންމެ އަވަހަށް އެންމެ ބޮޑަށް ޕްރެޝަރަށް ވެއްޓުނު ވުޒާރާ އަކީ ހައުސިން މިނިސްޓްރީއެވެ. އަދި އެންމެ އަވަހަށް ޕްރެޝަރ އަށް ވެއްޓުނު ވަޒީރަކީ ވެސް ހައިދަރުއެވެ.

އެހެން އެކަން އޮތް އިރު އޭރު ނޫސްވެރިންގެ ބައްދަލުވުންތަކުގައި ދެއްވި ޖަވާބުތަކުން މީޑިއާތަކުގެ ފަލަސުރުހީތަކާއި، އާއްމުންގެ ފާޑުކިޔުމުގެ އަމާޒުފަތްގަނޑަކަށް ވަރަށް ފަސޭހައިން ހައިދަރު ވެވަޑައިގަންނަވައެވެ. އޭރު ހައުސިން މިނިސްޓަރކަމުގައި ވެސް, މިހާރު ވެސް އަޅުގަނޑަށް ވަޒީރުގެ ފާހަގަކުރެވުނު ކަމެއް ދަންނަވާލާނަމެވެ. އެއީ ޚާއްސަކޮށް މަޖިލީހަށް ނޫނީ ނޫސްވެރިންގެ ކުރިމައްޗަށް މިނިސްޓަރ ހާޒިރުވެވަޑައިގެންފި ނަމަ ޖަވާބު ދެވޭ ވާހަކަ އަށް ވުރެ ޖަވާބު ނުދެވޭ ވާހަކަތައް ގިނަވުމެވެ.

މިސާލެއް ފާހަގަކޮށްލާނަމެވެ. ކުރީގެ ވާހަކަތައް ބާއްވަމާ ހިނގާށެވެ. މާދުރަކަށް ނުދާނަމެވެ. "މައުޟޫއު އާއި ނުގުޅޭތީ ޖަވާބުދެވޭކަށް ނެތް."، " ދިރާސާކޮށް ނިމުނީމަ އެނގޭނެ."، "އަދި ނޭނގެ"، "އާދެ ކުރީ ސަރުކާރުން ވެސް ނުކުރޭ އެހެންވީމަ.." މިއީ ހައްތަހާވެސް މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ.އަލީ ހައިދަރު ހޯމަ ދުވަހު މަޖިލީހަށް ހާޒިރުވެވަޑައިގެން ދެއްވި ޖަވާބުގެ ބައިބައެވެ.

މިނިސްޓަރ މަޖިލީހަށް ހާޒިރުކުރައްވާފައި ވަނީ، ވަޒީފާ އާއި ބެހޭ ޤާނޫނުގެ ދަށުން ދިވެހިރާއްޖޭގައި މަސައްކަތްކުރާ މުވައްޒަފުންނަށް މުސާރައިގެ ގޮތުން އެންމެ ކުޑަމިނުން ދޭންޖެހޭ އުޖޫރައިގެ ގޮތުގައި ކަނޑައަޅަން ޖެހޭ ޢަދަދު ކޮންމެ ދެ އަހަރަކުން މުރާ ޖަޢާ ކުރަންވާނެކަމަށް ބަޔާންކޮށްފައި އޮތްއިރު އެކަން ނުކުރެވުނު ސަބަބާއި މެދު މިނިސްޓަރާއި ސުވާލުކުރުމަށެވެ. މިނިސްޓަރ ހާޒިރު ކުރީ ކެންދޫ ދާއިރާގެ މެންބަރު މަޢުރޫފް ޒާކިރު ކުރެއްވި ސުވާލަށް ޖަވާބުދެއްވުމަށެވެ.

5 ވަރަކަށް މިނިޓް ވަންދެން ވާހަކަދެއްކެވި އިރު ސާފުވީ އެންމެ ކަމެކެވެ. އެއީ ކުރީ ސަރުކާރުން ވަޒީރަށް އަރައި ވަޑައި ނުގެންނެވުނު ކަމެވެ. ތަކުރާރުކޮށް ސުވާލު ކޮށްގެން ވެސް މި ސަރުކާރުން އެކަން ނުކޮށްވާ ސަބަބެއް ވިދާޅުވެ ދެއްވިފައެއް ނުވެއެވެ.

މިނިމަމް ވޭޖްގެ ޢަދަދު ކޮންމެ ދެ އަހަރަކުން މުރާ ޖަޢާ ކުރަންވާނެކަމަށް ބަޔާންކޮށްފައި އޮތްއިރު ޖަނަވަރީ 2022 އިން ފެށިގެން މިހާތަނަށް، 3 އަހަރަށްވުރެ ގިނަދުވަސްވެފައިވެއެވެ. ނަމަވެސް އެކަމަށްޓަކާ ކަނޑައަޅާ އަދަދު މުރާޖައާ ކުރުމުގެ ތާރީހު މިނިސްޓަރ ގުނުއްވަން ފެއްޓެވީ އެ ޤާނޫނު ތަންފީޒުކުރަން ފެށި ތަރީހަށް ވުރެ މާ ކުރިންނެވެ. އެހެންވީމަ "ކުރީ ސަރުކާރު"ގެ ލަވަ ކިޔަން ހަދައިގެން އަމިއްލަފުޅު ވުޒާގެ މެންޑޭޓުގައި ހިމެނޭ ކަންކަން އޮޅުވާލެއްވޭ އިރު ވެސް ވަޒީރަށް ރޭކާވެސް ނުލިއެވެ.

މެންޑޭޓުގެ ވާހަކައިން އަދި އެއްވާހަކަ ހަނދާން ވެއްޖެއެވެ. މި ސަރުކާރުން ދެން ޕައިލެޓުކަން ކިޔެވުމަށް ސްޓޫޑެންޓް ލޯން ދޫ ނުކުރާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ދައްކަވާފައިވާ ވާހަކަތަކާއި ގުޅޭ ގޮތުން ވަޒީރާއި މެމްބަރުން ސުވާލުކުރުމުން ވެސް ވަޒީރު ޖަވާބެއް ނުދެއްވައެވެ.

އެހެންވީމަ ވަޒީރަށް ވަޒީރުގެ މެންޑޭޓްގެ ދަށުން ހިނގާ ކަންކަން ނޭނގެނީ ބާވައޭ ސުވާލު އުފެދެއެވެ. ނޫނީ އެހެން ވަޒީރަކު މެންޑޭޓަށް އަރައިގަތަސް އެއްޗެއް ވިދާޅުވާން ކެރިވަޑައި ނުގަންނަވަނީ ބާވައޭ ވެސް ހިތަށް އަރައެވެ. އަނެއް ބައި ފަހަރު ގޯހެއް ހެދިދާނެތޯ ބިރުފުޅުން ޖަވާބު ނުދެއްވަނީއޭ ވެސް ހީވެއެވެ. ސަބަބު ސާފު ނުވިޔަސް ސާފުވީ އެއްކަމެއް އެބައޮތެވެ. އެއީ މައުޟޫޢު އާއި ގުޅުނަސް ނުގުޅުނަސް، ވަޒީރު ހައިދަރުގެ ޖަވާބެއް ނެތް ކަމެވެ. ދެން އެއީ ކޮން ސަބަބަކާއި ހުރެތޯ ތިބޭފުޅުން ނިންމަވާށެވެ.