މޭޔަރ ޢާޠިފްގެ "އާސްކް މޭޔަރ" ޕްރޮގްރާމް ތަޢާރަފްކޮށްފި
މި ޕްރޮގްރާމަކީ ކުޅުދުއްފުށީ ސިޓީ ކައުންސިލްގެ ދެފުށްފެންނަ މިންވަރު އިތުރުކޮށް، ރައްޔިތުންނާއި ގާތުން ޚިދުމަތް ދިނުމަށް ސިޓީ ކައުންސިލުން ކުރިއަށްގެންދާ މުހިންމު މަސައްކަތްތަކުގެ ތެރެއިން ފާހަގަކޮށްލެވޭ އެއް މަސައްކަތެވެ.
ކުޅުދުއްފުށި ސިޓީގެ މޭޔަރ މުޙައްމަދު ޢާޠިފް | ކުޅުދުއްފުށި ސިޓީ ކައުންސިލް
ކުޅުދުއްފުށި ސިޓީގެ ހިންގުމާއި ގުޅުންހުރި ކަންކަން, އެ ސިޓީގެ މޭޔަރ, މުޙައްމަދު ޢާޠިފް އާއި ފަސޭހައިން ސުވާލުކުރުމުގެ ފުރުޞަތު ރައްޔިތުންނަށް ފަހިކޮށްދިނުމަށް "އާސްކް މޭޔަރ" ގެ ނަމުގައި ޕްރޮގްރާމެއް ތަޢާރަފްކޮށްފިއެވެ.
މި ޕްރޮގްރާމުގެ މަޤުޞަދަކީ, ރައްޔިތުންގެ ހިތްތަކުގައި ކުޅުދުއްފުށި ސިޓީއާއި ކައުންސިލް ހިންގުމާއި, ނިންމުންތަކާއި ގުޅޭގޮތުން އުފެދޭ ސުވާލުތަކަށް ސީދާ މޭޔަރ ޢާޠިފްގެ ޖަވާބު ހޯދުމުގެ ފުރުޞަތު ހޯދައިދިނުމަށާއި, ރައްޔިތުންގެ މަސްލަހަތު ހިމެނޭ ކަންކަމުގައި ސައްހަ މައުލޫމާތު ފޯރުކޮށްދީ, ކައުންސިލް ހިންގުމުގައި ދެފުށްފެންނަ މިންވަރު އިތުރުކުރުމާއި ރައްޔިތުންގެ ބައިވެރިވުން އިތުރުކުރުމެވެ.
ރައްޔިތުންނާއި ގާތުން ޚިދުމަތް ދިނުމަށް ކުރިއަށްގެންދާ މި ޕްރޮގްރާމަށް ރައްޔިތުން ހުށަހަޅާ ސުވާލުތަކުގެ ޖަވާބު އާންމުކުރުމަށް ހަމަޖެހިފައިވަނީ ކުޅުދުއްފުށި ސިޓީ ކައުންސިލްގެ ސޯޝަލް މީޑިއާ ޕްލެޓްފޯމުތަކުގައެވެ.
މިގޮތުން މި ޕްރޮގްރާމަށް އޮންލައިންކޮށް ސުވާލު ހުށަހެޅުމުގެ ފުރުޞަތު ކޮންމެ ހަފްތާއެއްގެ އާދިއްތަ ދުވަހު އޮންލައިން ފޯމު މެދުވެރިކޮށް ހުޅުވާލުމުން, އެ ހަފްތާއެއްގެ އަންގާރަ ދުވަހު ހެނދުނު 09:00 ގެ ކުރިން ކޮންމެ ރައްޔިތަކަށްވެސް ސުވާލު ފޮނުވޭނެއެވެ.
މީގެ އިތުރުން, މި ޕްރޮގްރާމުގެ ފުރަތަމަ އެޕިސޯޑުގެ ދަށުން ސުވާލުފޮނުވުމަށް "https://forms.office.com/r/wWM90Xyd3U " މި ލިންކު މެދުވެރިކޮށް ފޮނުވޭގޮތަށް ސިޓީ ކައުންސިލުން މިހާރު ވަނީ ހަމަޖައްސާފައިވެއެވެ.
މޭޔަރު މުޙައްމަދު ޢާޠިފް އަކީ ރައްޔިތުންގެ މުހުތާދުތައް އެންމެ ފުރިހަމައަށް ފުއްދުމަށް ޚާއްސަ އިސްކަމެއްދީ, ރައްޔިތުންގެ ހައްޤުގައި ބަސްބުނުމަށް ފަސްނުޖެހޭ ލީޑަރެއްކަން ފާހަގަކޮށްލެވެއެވެ. "އާސްކް މޭޔަރ" ޕްރޮގްރާމުގެ އިތުރުން މޭޔަރު އަދި ސިޓީ ކައުންސިލްގެ ކައުންސިލަރުން ދަނީ, ހަމައެކަނި ރައްޔިތުންގެ ޝަކުވާތަކާއި ސުވާލުތައް ދުރާ ގާތުން އަޑުއެއްސެވުމަށް ކޮންމެ ހަފްތާއަކު ރަސްމީ ގަޑިތަކުގެ ތެރެއިން 1 ގަޑިއިރު "ރައްޔިތުންގެ ގާތުން އަޑު" ގެ ނަމުގައި ބައްދަލުވުންތައް ބާއްވަމުންނެވެ.
