ކައުންސިލް އިންތިޚާބު ޕީއެންސީ އަށް ލިބިއްޖެ ނަމަ ރައްޔިތުންގެ ހައްގުގައި ވާހަކަ ދައްކާނެ އިންތިޚާބީ މީހެއް ނުހުންނާނެ: ކުޅުދުއްފުށީ މޭޔަރު އާތިފް
ކުޅުދުއްފުށި މޭޔަރު އާތިފް ވިދާޅުވީ ރައީސް މުއިއްޒު ކައުންސިލްތަކުގެ ސަބަބުން މަޝްރޫއުތައް ލަސްވާ ކަމަށް ވިދާޅުވި ނަމަވެސް ހަގީގަތުގައި ސަރުކާރުން މަޝްރޫއުތައް ހުއްޓާލާފައި ވާ ކަމަށް. ޕީއެންސީ އަށް މެޖޯރިޓީ ދީފިނަމަ މަޖިލީހުގައި ފެންނަ ފަދައިން ރައްޔިތުންގެ މަސްލަހަތު ހިމާޔަތް ކުރާނެ މީހަކު ނުހުންނާނެ ކަމަށާ ރައްޔިތުން ވިސްނާލަން ޖެހޭ ކަމަށް އޭނާ ވިދާޅުވި.
ކުޅުދުއްފުށި ސިޓީގެ މޭޔަރު މުހައްމަދު އާތިފް | ރާއްޖެއެމްވީ
ކުރިއަށް އޮތް ލޯކަލް ކައުންސިލް އިންތިޚާބުގައި ސަރުކާރު ހިންގާ ޕީއެންސީ އިން ބޭނުންވާ ގޮތަށް އެ ޕާޓީ އަށް މެޖޯރިޓީ ލިބޭ ގޮތަށް ކައުންސިލް ގޮނޑިތައް ދީފި ނަމަ އެ ރަށެއްގެ ރައްޔިތުންގެ ހައްގުގައި ވަކާލާތު ކުރާނެ އިންތިޚާބީ އެއްވެސް މީހަކު ނުހުންނާނެ ކަމަށް ކުޅުދުއްފުށި ސިޓީގެ މޭޔަރު މުހައްމަދު އާތިފް ވިދާޅުވެއްޖެ އެވެ.
ރާއްޖެއެމްވީ އާ ވާހަކަދައްކަވަމުން އާތިފް ވިދާޅުވީ ސަރުކާރުން ހިންގަން ބޭނުންވާ ބައެއް ތަރައްގީގެ މަޝްރޫއުތައް ނުފެށި ލަސްވަނީ ކައުންސިލްތަކުގެ ސަބަބުން ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް އެއީ ހަގީގަތެއް ކަމަށް ގަބޫލު ކުރަން އުނދަގޫ ކަމަށެވެ.
އެގޮތުން ވަރަށް ގިނަ ކައުންސިލްތަކާ ބައްދަލު ކުރެވިފައިވާ އިރު ގިނަ ކައުންސިލްތަކުން ފާހަގަކޮށްފައި ވަނީ މި ސަރުކާރުން އެ ރަށްރަށުގައި ތަރައްގީގެ މަޝްރޫއުތައް ކުރިއަށް ނުގެންދާ ކަން ކަމަށް އާތިފް ވިދާޅުވި އެވެ.
އާތިފް ވިދާޅުވީ މިދިއަ އެމްޑީޕީ ސަރުކާރުން ފެށި މަޝްރޫއުތައް ވެސް މި ސަަރުކާރުން ކުރިއަށް ނުގެންދާއިރު ރައީސް މުއިއްޒު ރަށްރަށަށް ވަޑައިގެން ބިންގާ އަޅުއްވާ މަޝްރޫއުތައް ވެސް ނުފެށި އެ މަޝްރޫއުތަކަށް ވީނުވީ އެއް ނޭނގިގެން ކައުންސިލްތަކުން އެވާހަކަ ދައްކާ ކަމަށެވެ.
އެގޮތަށް އެތައް މަޝްރޫއެއް އެބަހުރި ކަމަށާ ބައްދަލުވާ ކޮންމެ ކައުންސިލެއްގެ ވެސް އެންމެ ބޮޑު ކަންބޮޑުވުމަކީ އެ ރަށެއްގައި ނުވަތަ އަތޮޅުގައި ތަރައްގީގެ މަޝްރޫއުތައް ނުހިނގާ ހުއްޓިފައިވާތީ އެކަމުގެ ކަންބޮޑުވުން ކަމަށް އާތިފް ވިދާޅުވި އެވެ.
މި ސަރުކާރުން ކަމެއް ނުކޮށް ނުވަތަ މަޝްރޫއުތައް ހުއްޓާލުމަށްފަހު ކައުންސިލްތަކުގެ ބޮލުގައި އެކަން އެޅުވުމަށް މަސައްކަތް ކުރުން ބަލައިނުގަނެވޭނެ ކަމަށް ވެސް މޭޔަރު ވިދާޅުވި އެވެ. އަދި ކައުންސިލް ގޮނޑިތައް ނުލިބިއްޖެ ނަމަ ރަށްރަށުގައި މަޝްރޫއުތައް ނުހިންގޭނެ ކަމަށް ދޭހަވާ މޭރުމަކުން ވާހަކަ ދައްކަވާ އެކަން ޕްރޮމޯޓު ކުރެއްވުމަށް މަސައްކަތް ކުރި ނަމަވެސް ރައްޔިތުން އެއަށް ވުރެ މިހާރު މާ ހޭލުންތެރި ކަމަށް އޭނާ ވިދާޅުވި އެވެ.
އާތިފް ވިދާޅުވީ ރައީސް މުއިއްޒު ބޭނުންފުޅުވާ ގޮތަށް ސަރުކާރަށް ކައުންސިލް ގޮނޑިތައް ޕީއެންސީ އަށް ދީފި ނަމަ ރައްޔިތުންގެ މަސްލަހަތު އިސްކޮށް އެއްޗެއް ބުނާނެ އިންތިޚާބީ އެއްވެސް މީހަކު ނުހުންނާ ކަމަށެވެ. ރައްޔިތުންގެ ހައްގުގައި ރަށަށް ހެޔޮ އެދިގެން ވަކާލާތު ކުރާނެ މީހެއް ވެސް ނުހުންނާނެ ކަމަށް ވެސް އާތިފް ވިދާޅުވި އެވެ.
އެ މަންޒަރު މަޖިލީހުން މިއަދު ފެންނަމުން ދާ ކަމަށާ ސުޕަރ މެޖޯރިޓީ އެއް ދީގެން މަޖިލިސް މަސައްކަތް ކުރަނީ ސަރުކާރުން ބޭނުންހާ ކަމެއް ހާސިލުކުރަން ކަމަށް ވެސް އާތިފް ވިދާޅުވި އެވެ. އެހެން ކަމުން ކައުންސިލް އިންތިޚާބު ގައި ރައްޔިތުން މިކަމާ މެދު ވިސްނާލަން ޖެހޭ ކަމަށް ވެސް އޭނާ ވިދާޅުވި އެވެ.
