ކުޅުދުއްފުށި ސިޓީގެ ޓެކްސީ ޑްރައިވަރުން ހުދު ގަމީހުގައި ސަރުކާރާ ދެކޮޅަށް ހިމޭން އިހުތިޖާޖެއް ކޮށްފި
ކަންބޮޑުވުންތަކަށް ހައްލު ނުލިބޭނަމަ ކޮންމެ ހޮނިހިރު ދުވަހެއްގައި ހިމޭން އިހުތިޖާޖު ކުރިއަށް ގެންދާނެ
ކުޅުދުއްފުށި ސިޓީގެ ޓެކްސީ ޑްރައިވަރުން ސަރުކާރާ ދެކޮޅަށް ހިމޭން އިހުތިޖާޖެއް ކުރަނީ
ކުޅުދުއްފުށި ސިޓީގެ ޓެކްސީ ޑްރައިވަރުން ސަރުކާރާ ދެކޮޅަށް ހިމޭން އިހުތިޖާޖެއް ކޮށްފިއެވެ.
މި އިހުތިޖާޖުގައި އިސްކޮށް ހަރަކާތްތެރިވި މީހަކު ރާއްޖެއެމްވީއަށް ބުނީ، މިއީ ސަރުކާރާ ދެކޮޅަށް ކުރި ހިމޭން އިހުތިޖާޖެއް ކަމަށާއި، ގިނަ ކަންބޮޑުވުންތަކެއް އެބަހުރި ކަމަށެވެ. މި ކަންބޮޑުވުންތަކަށް ހައްލު ނާންނަ ކަމަށްވާނަމަ ކޮންމެ ހޮނިހިރު ދުވަހެއްގައި މި ހިމޭން އިހުތިޖާޖު ކުރިއަށްދާނެ ކަމަށް އޭނާ ބުންޏެވެ.
އެސިޓީގެ ޓެކްސީ ޑްރައިވަރުން ފާހަގަކުރާ ގޮތުގައި، ރައީސް ޑރ.މުހައްމަދު މުއިއްޒު ވެރިކަމަށް ވަޑައިގެންނެވީ ޓެކްސީ ޑްރައިވަރުންނަށް ރަނގަޅު ގޮތްތަކެއް ހޯއްދަވައިދެއްވާނެ ކަމުގެ ވައުދުފުޅާ އެކުއެވެ. ނަމަވެސް މިސަރުކާރުގައި ޑްރައިވަރުންނަށް ވަރަށް ދަތިކޮށްފައިވާ ކަމަށާއި، ދަތި ކުރުމުގެ ފިޔަވަޅު އަޅަމުންދާކަން ފާހަގަކުރިއެވެ.
އެގޮތުން ޓެކްސީ ލައިން އުފެއްދުމަށް ކުރާ މަސައްކަތް އެމީހުން ކުށްވެރިކޮށްފައިވެއެވެ.
މީގެ އިތުރުން ކުޅުދުއްފުށި ސިޓީގައި ތަރައްގީގެ އެއްވެސް މަޝްރޫއެއް ކުރިއަށް ނުދާ ކަމަށާއި، ސިޔާސީ ވަޒީފާތައް ވަރަށް ބޮޑަށް އިތުރު ކުރަމުންދާ ކަމަށް ބުނެ، ކަންބޮޑުވުން ފާޅުކޮށްފައިވެއެވެ. އަދި އެއްވެސް މަޝްރޫއެއް އަމަލީ މަސައްކަތް ނުފަށައި، ރައްޔިތުންނަށް މިނިވަންކަމާއެކު ލިބެން އޮންނަ އާމްދަނީއަށް ސަރުކާރުން ވަރަށް ބޮޑަށް ހުރަސްއަޅަމުންދާ ކަމަށް އެމީހުން ބުނެފައިވެއެވެ.
ރައީސް މުއިއްޒު އޯގަސްޓް މަހުގެ ތެރޭގައި އެސިޓީއަށް ކުރެއްވި ދަތުރުފުޅަށްފަހު ވެސް ގާތްގަނޑަކަށް 15 މީހަކަށް ސިޔާސީ ވަޒީފާ ދީފައިވާ ކަމަށާއި، ޚާއްސަކޮށް ވަޒީފާތަކުގެ ފުރުސަތުތައް ލިބެނީ ސަރުކާރާ ދެކޮޅަށް ބަސްބުނެ އަޑު އުފުލާ މީހުންނަށް ކަމަށް ބުނެފައިވެއެވެ.
އެގޮތުން ގިނަ އަދަދެއްގެ އެމްޑީޕީއަށް ސަޕޯޓު ކުރާ ޒުވާނުންނަށް ވަޒީފާގެ ފުރުސަތު ދޭ ކަމަށް އެމީހުން ބުނެފައިވެއެވެ.
ހުދު ގަމީހުގައި ގިނަ އަދަދެއްގެ ޓެކްސީ ޑްރައިވަރުން ހިމޭން އިހުތިޖާޖަށް ނުކުތީ ސަރުކާރަށް ޚާއްސަ މެސެޖެއް ދިނުމުގެ ގޮތުން ކަމަށް އިހުތިޖާޖުގެ ބައިވެރިން ބުނެފައިވެއެވެ. މިއީ ހަމައެކަނި ކުޅުދުއްފުށި ސިޓީއަށް ދިމާވެފައިވާ މައްސަލައެއް ނޫން ކަމަށާއި، މުޅި ރާއްޖެއަށް ދިމާވެފައިވާ މައްސަލައަކަށްވާތީ، މި ހާލަތު އިތުރަށް ގޯސްވިޔަ ނުދިނުމަށްޓަކައި، އަދި ރައްޔިތުން އެދޭ ގޮތަށް ހާލަތު ބަދަލު ކުރުމަށް ހުރިހާ ރައްޔިތުން ނުކުތުމަށް ވެސް ގޮވާލާފައިވެއެވެ.
ކުޅުދުއްފުށި ސިޓީގެ ޓެކްސީ ޑްރައިވަރުން ސަރުކާރާ ދެކޮޅަށް ހިމޭން އިހުތިޖާޖެއް ކޮށްފައިވާއިރު، އެސިޓީގައި ސަރުކާރުގެ ވަޒީފާތަކުގައި އުޅޭ ގިނަ މީހުން އަދި ފުލުހުންގެ ވަޒީފާގައި އުޅޭ މީހުން ވެސް ޑިއުޓީން ބޭރުން ޓެކްސީ ވިޔަފާރި ކުރާ ކަމަށް މައުލޫމާތު ލިބިފައިވެއެވެ.
