މަގޫދޫގެ އެއަރޕޯޓު ތަރައްގީ ކުރުމަށް އެރަށަށް ގެނެސްފައިވާ ހިލަވެލި، ސަރުކާރުން ގެންދަން މަސައްކަތް ކުރުމުން ރައްޔިތުން ނުކުމެ ހުއްޓުވައިފި

ފ. މަގޫދޫގެ އެއަރޕޯޓު ތަރައްގީ ކުރުމަށް އެރަށަށް ގެނެސްފައިވާ ހިލަވެލި، ސަރުކާރުން ގެންދަން މަސައްކަތް ކުރުމުން ރައްޔިތުން ނުކުމެ އެކަން ހުއްޓުވައިފި އެވެ. 

ހުކުރު ދުވަހުގެ ހެނދުނު އެރަށަށް އެމްޓީސީސީގެ ބާޖެއް ވަނީ ގޮސްފަ އެވެ. 

ރާއްޖެއެމްވީއަށް އެރަށުގެ ކައުންސިލުން ބުނީ، މަގޫދޫގައި ތަރައްގީ ކުރާ އެއަރޕޯޓުގެ އަމަލީ މަސައްކަތް ކުރިއަށް ނުގެންދާ ކަމަށާއި، ލޯކަލް ކައުންސިލް އިންތިޚާބާ ދިމާކޮށް މިހާރު ބިން ހިއްކުމުގެ އަމަލީ މަސައްކަތް ފަށާފައިވާ ކަމަށެވެ. ރައްޔިތުން އެންމެ ބޮޑަށް ބޭނުންވަނީ އެއަރޕޯޓުގެ އަމަލީ މަސައްކަތްތައް ކުރިއަށް ގެންދަންކަން ފާހަގަކޮށް ކައުންސިލުން ބުނީ ރަންވޭގެ މަސައްކަތުގެ އެއްބައި ނިންމުމަށްފަހު މަސައްކަތް ހުއްޓާލިތާ ވަރަށް ގިނަ ދުވަސްވެފައިވާ ކަމަށާއި، މިއީ ކަންބޮޑުވާ މައްސަލައެއް ކަމަށެވެ. 

ކައުންސިލުން ބުނީ، އެއަރޕޯޓު ތަރައްގީ ކުރުމަށް އެރަށަށް ގެނެސްފައިވާ ގިނަ އަދަދެއްގެ ހިލަވެއްޔާއި، އާލާތްތައް އެބަހުރި ކަމަށާއި، މިމަޝްރޫއު ނިންމުމަށްފަހު ގިނަ އަދަދެއްގެ ހިލަވެލި ބާކީވާނެ ކަމަށް އެމްޓީސީސީން ބުނަމުންދާ ކަމަށެވެ. ނަމަވެސް މިހާރު އަމަލީ އެއްވެސް މަސައްކަތެއް ކުރިއަށް ނުގެންގޮސް، އަދި މަޝްރޫއު އެއްކޮށް ނުނިންމާ ހިލަވެއްޔާއި، އެހެނިހެން އާލާތްތައް ރަށުން އެހެން ރަކަށް ނުގެންދެވޭނެ ކަަމަށް ކައުންސިލުން ބުންޏެވެ. 

ކައުންސިލުން ބުނީ، މީގެ ކުރިން ދެތިން ފަހަރަކަށް މިހާރު އެމްޓީސީސީން ހިލަވެލި، ދޯންޏެއްގައި އަދި ބާޖެއްގައި ވެސް ގެންގޮސްފައިވާ ކަަމަށެވެ. އަދި ހުކުރު ދުވަހުގެ ހެނދުނު އަނެއްކާގެ ހިލަވެއްޔާއި، އެހެނިހެން އާލަތްތައް ގެންދިއުމަށް ބާޖެއް އައިސްފައިވާ ކަަމަށާއި، އެ ބާޖު ރަށަށް ކައިރި ކުރުމުގެ ފުރުސަތު ނުދީ ބަނދަރު ސަރަހައްދަށް ގިނަ އަދަދެއްގެ ރައްޔިތުން އެއްވެ އެކަން ހުއްޓުވާފައިވާ ކަަމަށެވެ. 

މީގެ އިތުރުން ކައުންސިލުން ބުނީ، އެއަރޕޯޓުގެ މަޝްރޫއުއަށް ގެނެސްފައިވާ އެއްވެސް އެއްޗެއް އެހެން ރަށަކަށް ނުގެންދެވޭނެ ކަމަށާއި،  އެފުރުސަތު ރައްޔިތުން ނުދޭނެ ކަމަށެވެ. އެހެންކަމުން މިހާރު އެ ބާޖު ބަނދަރުގެ ބޭރުގައި މަޑު ކޮށްފައިވާ ކަަމަށް ކައުންސިލުން ބުންޏެވެ. އަދި މި ހިލަވެލި ގެންދިއުމަށް މަސައްކަތް ކުރަނީ ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް އއ.އުކުޅަހުގެ މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއު ފެށުމަށް ކަމަށް މައުލޫމާތު ލިބޭ ކަމަށެވެ. 

ގާތްގަނޑަކަށް 900 މީހުންގެ އާބާދީ އެއް އޮންނަ މަގޫދޫ ރައްޔިތުން އެއަރޕޯޓުގެ މަޝްރޫއު ކުރިއަށް ނުގެންދާތީ މީގެ ކުރިން މުޒާހަރާ ވެސް ކޮށްފައިވެ އެވެ. 

މަގޫދޫ އެއަރޕޯޓުގެ މަސައްކަތް ފެށިފައިވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގަ އެވެ. ނަމަވެސް ވެރިކަން ބަދަލުވުމާއި ގުޅިގެން މަޝްރޫއު ކުރިއަށް ގެންގޮސްފައިނުވެ އެވެ. ސަރުކާރަށް އަހަރަކަށްވުރެ ގިނަ ދުވަސްވީފަހުން ފ.އަތޮޅަށް ރައީސް މުއިއްޒު ކުރެއްވި ދަތުރުފުޅެއްގައި އެރަށަށް 21 ސެޕްޓެންބަރު 2025 ގައި ވަޑައިގަންނަވައި ވިދާޅުވީ މަގޫދޫ އެއާޕޯޓުގެ މަސައްކަތް ގިނަވެގެން 12 މަސް ދުވަހުގެ ތެރޭގައި ނިންމާނެ ކަމަށެވެ.