2025 ވަނަ އަހަރު ވެސް ނިމުނީ ރައީސް މުއިއްޒު ދެއްވި ޔަގީންކަމާ ހިލާފަށް، ހެނބަދޫ ބިންހިއްކުމުގެ މަސައްކަތް ނުފެށި: ހެނބަދޫ ކައުންސިލް
ހެނބަދޫ ކައުންސިލް ރައީސް ވިދާޅުވީ ރައީސް މުއިއްޒު އެރަށުގައި ފައްޓަވާނެ ކަމަަށް ވިދާޅުވި އެހެން މަސައްކަތްތައް ވެސް ފެށިފައި ނުވާތީ ބިން ހިއްކުމުގެ މަސައްކަތް ވެސް ހަމަ އެގޮތަށް ކުރިޔަށް ނުގޮސް ދާނެތީ ރައްޔިތުން ވަރަށް ކަންބޮޑުވާ ކަމަށް.
21 ޖުލައި 2025 ގައި ރައީސް މުއިއްޒު ނ. ހެނބަދޫ ރައްޔިތުންނާ އެކު ބޭއްވި ބައްދަލުވުމުގެ ތެރެއިން: މި ބައްދަލުވުމުގައި ރައީސް މުއިއްޒު ވަނީ ހެނބަދޫ ބިންހިއްކުމުގެ ޢަމަލީ މަސައްކަތް 2025 ވަނަ އަހަރު ފެށޭނެކަމުގެ ޔަޤީންކަން ދެއްވާފަ. | ރައީސް އޮފީސް
ނ. ހެނބަދޫގެ ރައްޔިތުން އެދޭގޮތަށް 2025 ވަނަ އަހަރުގެ ތެރޭގައި އެރަށުގެ ބިން ހިއްކުމުގެ މަޝްރޫޢު ކުރިއަށް ގެންދަވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ނަމަވެސް، 2026 ވަނަ އަހަރު ފެށުނު އިރުވެސް ބިން ހިއްކުމުގެ މަސައްކަތް ފެށިފައި ނުވާކަމަށް އެ ރަށު ކައުންސިލްގެ ރައީސް ހުސައިން އަބޫބަކުރު ވިދާޅުވެއްޖެ އެވެ.
2025 ވަނަ އަހަރުގެ ޖުލައި މަހު ހެނބަދޫ އަށް ވަޑައިގެން އެ ރަށު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސް މުއިއްޒު ވިދާޅުވީ ރިޔާސީ އިންތިޚާބުގައި ހެނބަދޫ އަށް ވަޢުދުތަކެއް ވެވަޑައިގެންފައިވާ ކަމަށާއި، އެކަންކަން ފުރިހަމަކުރެއްވުމަށް ވަރަށް ބޮޑު އިސްކަމެއް ދެއްވާކަމަށެވެ. އެރަށަށް ވަޑައިގަތީ އެ މަޝްރޫޢުތައް ކުރިއަށްދާނެ ކަމުގެ ޔަގީންކަން ރައްޔިތުންނަށް ދެއްވުމަށް ކަމަށާއި، ހެނބަދޫ އަށް މިވަގުތު އެންމެ މުހިންމީ ރަށުގެ ފަޅުހިއްކުމުގެ މަޝްރޫޢު ކަމަށް ރައީސް ވިދާޅުވި އެވެ.
ހެނބަދޫ ބިންހިއްކުމުގެ މަޝްރޫޢު އާ ގުޅޭގޮތުން ރާއްޖެ އެމްވީ އަށް މައުލޫމާތު ދެއްވަމުން އެ ރަށު ކައުންސިލް ރައީސް ޝަފީގް ވިދާޅުވީ 2025 ވަނަ އަހަރު ހެނބަދޫ ރައްޔިތުންނާ ބައްދަލުކުރައްވާ ރައީސް މުއިއްޒު ވިދާޅުވީ ރަށުން ހިއްކެން އޮތް އެންމެ ބޮޑަކަށް ހިއްކާދޭނެ ކަމަށެވެ. ރަށަކީ މާބޮޑު ފަޅެއް އޮތް ރަށެއް ނޫން ނަމަވެސް ހަމަ ވަށައިގެން ހިލަ ޖައްސާފަ ހިއްކެން އޮތް އެންމެ ބޮޑަކަށް ހިއްކައިފިއްޔާ 7 ހެކްޓަރުގެ ބިން ހިއްކޭނެ ކަމަށް ރައީސް މުއިއްޒު ވިދާޅުވި އެވެ. އެހެން ނަމަވެސް މިހާރު އެމްޓީސީސީ އިން ކުރަފާފަ އޮތް ކުރެހުމުގައި އޮތީ 3 ހެކްޓަރު ހިއްކާ ގޮތަށް ކަމަށް ކައުންސިލް ރައީސް ވިދާޅުވި އެވެ.
ކައުންސިލް ރައީސް ވިދާޅުވީ 3 ހެކްޓަރު ހިއްކުނަސް އެއީ ވަރަށް ބޮޑު އެއްޗަކަށް ވާނެކަމަށެވެ. މިހާރު ރަށުގައި ނެތް ގޯއްޗެއް ދޫކުރާނެ އެއްވެސް ތަންކޮޅެއް، 15 ވަރަކަށް އަހަރު ވެދާނެ ބިމުގެ ދަތިކަމާ ހެދި މިރަށުން ބަންޑާރަ ގޯއްޗެއްވެސް ދޫނުކުރާތާކަމަށް އޭނާ ވިދާޅުވި އެވެ.
މި އަހަރުގެ ޖަނަވަރީ މަހު މަސައްކަތް ވަނީ އެމްޓީސީސީ އާއި ހަވާލުކޮށްފަ. އެހެން ނަމަވެސް އެހާބޮޑު އުއްމީދެއް ނޯވޭ އަދި މަސައްކަތެއް ހަވާލުކުރިޔަސް. މީގެ ކުރިން މިސަރުކާރުން ހަވާލުކޮށްފައިވާ މަސައްކަތްތައް ވެސް އަދިވެސް ނުފެށި ހުރީ. އެހެން ކަމުން އެ މަސައްކަތް ވެސް ހަމަ އެގޮތަސް ކުރިޔަށް ނުގޮސް ދާނެތީ ރައްޔިތުން ވަރަށް ކަންބޮޑުވޭ.ނ. ހެނބަދޫ ކައުންސިލް ގެ ރައީސް ޙުސައިން އަބޫބަކުރު
ކައުންސިލް ރައީސް ވިދާޅުވީ އެހެންކަމުން އެ މަސައްކަތް ވެސް ހަމަ އެގޮތަށް ކުރިޔަށް ނުގޮސް ދާނެތީ ރައްޔިތުން ވަރަށް ކަންބޮޑުވާ ކަމަށެވެ. އެމްޓީސީސީ އާއި ހަވާލުކޮށްފައިވާ މި މަސައްކަތް ވީ އެންމެ އަވަހަކަށް ނިންމާފަ ރައްޔިތުންނަށް ބޯހިޔާވަހިކަން ކަށަވަރުކޮށްދޭނެ ގޮތެއް ރައީސް މުއިއްޒު ހައްދަވައިދެއްވުން އެދިވަޑައިގަންނަވާކަމަށް އޭނާ ވިދާޅުވި އެވެ.
ސަރުކާރުން ހެނބަދޫ ބިން ހިއްކުމުގެ މަސައްކަތް އަވަސް މުސްތަގުބަލެއްގައި ފެށުމަކީ ރަށު ރައްޔިތުންގެ ވަރަށް ބޮޑު އެދުމެއްކަމަށް ކައުންސިލް ރައީސް ވިދާޅުވި އެވެ. ރައީސް މުއިއްޒުގެ ވެރިކަމުގެ ފުރަތަމަ ދެ އަހަރު ފާއިތުވެގެން ގޮސްފައިވާއިރު، ހެނބަދޫގައި ތަރައްގީގެ އެއްވެސް މަޝްރޫޢެއް އެކަށީގެންވާ ގޮތަށް ނުހިނގާކަމަށް އެރަށު ރައްޔިތުން ބުނެ އެވެ.
ނިމިދިޔަ އެމްޑީޕީ ސަރުކާރުން އެރަށުގައި ފަށާފައިވާ މަޝްރޫޢުތައް ވެސް މިހާރު މަޑުޖެހިފައިވާކަމަށް ރައްޔިތުން ފާހަގަކޮށްފައިވެ އެވެ. ނިމިދިޔަ އެމްޑީޕީ ސަރުކާރުން ވަނީ ހެނބަދޫގައި ތަރައްގީގެ ގިނަ މަޝްރޫޢުތަކެއް ނިންމާފަ އެވެ. އެގޮތުން އެރަށުގެ ފެނުގެ ނިޒާމާއި ބަނދަރު ހެދުމުގެ މަޝްރޫޢު އާއި ގޮނޑުދޮށް ހިމާޔަތްކުރުމުގެ މަޝްރޫޢުގެ އިތުރުން ފެނަކަ އައު އޮފީސް އިމާރާތާއި އިންޖީނުގޭގެ މަސައްކަތް ހިމެނެ އެވެ.
އަތޮޅުތަކުގެ ރަށްރަށުގައި އަސާސީ ޚިދުމަތްތައް ގާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި އެމްޑީޕީ ސަރުކާރުން ވަނީ ރަށްރަށުގައި އުމްރާނީ ތަރައްގީގެ ވަރަށް ގިނަ މަޝްރޫޢުތައް ހިންގާފަ އެވެ. އެހެން ނަމަވެސް، މި ސަރުކާރުން އެ މަޝްރޫޢުތައް ކުރިޔަށް ގެންދިއުމުގައި ލަސްވެފައިވާކަން ރައްޔިތުން ފާހަގަކުރެ އެވެ.
