އާރްޓީއެލް ފެރީ ފ. އަތޮޅާއި ދ. އަތޮޅުގައި ފަށައިފި

ރާއްޖެ ޓްރާންސްޕޯޓް ލިންކް (އާރްޓީއެލް) ފެރީ ޚިދުމަތް ޒޯން 4 ގެ ފ. އަތޮޅާއި ދ. އަތޮޅުގައި ފަށައިފި އެވެ. 

އެ ދެ އަތޮޅަށް އެ ޚިދުމަތް އަންގާރަ ދުވަހު ރަސްމީކޮށް ފައްޓަވައި ދެއްވީ ރައީސް ޑރ. މުހައްމަދު މުއިއްޒުގެ ޓްރާންސްޕޯޓް މިނިސްޓަރު މުހައްމަދު އަމީން އެވެ. އެކަމަށްޓަކައި ބޭއްވި އެ ރަސްމިއްޔާތުގައި އިންޑިއާ އިން ރާއްޖެއަށް ކަނޑައަޅުއްވާފައި ހުންނަވާ ސަފީރާއި، އެމްޓީސީސީގެ މެނޭޖިން ޑިރެކްޓަރު އަހުމަދު ސައުދީ އާއި ކުންފުނީގެ އިސްވެރިންގެ އިތުރުން ގިނަ އަދަދެއްގެ އާންމު ރައްޔިތުން ވެސް ބައިވެރިވި އެވެ.

މި ޚިދުމަތް ފެށުމާ ގުޅިގެން އެމްޓީސީސީ އިން ބުނީ ފ. އަތޮޅާއި ދ. އަތޮޅުގައި އާރްޓީއެލް ގެ ދަތުރުތައް އާންމުން ތަޖުރިކޮށްލުމުގެ ގޮތުން ހަފުތާއެއް ވަންދެން ހިލޭ ދަތުރުތައް ކުރެވޭނެ ކަމަށެވެ.

މީގެ އިތުރުން މި ދެ އަތޮޅުގައި މި ޚިދުމަތް ފެށިގެން ދިޔުމަކީ އިގްތިސާދީ ގޮތުން ލިބޭ ކުރިއެރުމެއް ކަމަށާއި ރަށު ބަންދުން ވީއްލި، ދަތުރުފަތުރުގެ އިންގިލާބީ ބަދަލެއް އަންނާނެ ކަމެއް ކަމަށް ވެސް އެމްޓީސީސީ އިން ވަނީ ބުނެފަ އެވެ.

އޭގެ ފަހުން، މި މަހުގެ  25 އިން ފެށިގެން ދަތުރުތައް ކުރިއަށް ދާނީ ޓިކެޓް ނަގައިގެން ކަމަށާ ޓިކެޓް ގަތުމުގެ އިންތިޒާމު އާރްޓީއެލް ވެބްސައިޓް އަދި މޯބައިލް އެޕްލިކޭޝަން މެދުވެރިކޮށް ހަމަޖެހިފައިވާ ކަމަށް އެ ކުންފުނިން ބުނެ އެވެ. 

އެމްޓީސީސީ އިން ބުނީ މި ދެ އަތޮޅު ހިމެނޭހެން ޖުމުލަ 6 ރޫޓަކަށް ދަތުރުތައް ކުރާނެ ކަމަށެވެ. އެއީ ފ. އަތޮޅުގެ އެއްރޫޓާއި، ދ. އަތޮޅުގެ ދެ ރޫޓުގެ އިތުރުން ދ. އަތޮޅާއި ފ. އަތޮޅާ ދެމެދު ބާއްވާ ފެރީ ރޫޓް ކަމަށެވެ. މި ދެ އަތޮޅު ގުޅާލަދޭ ދަތުރުތައް ކުރާނީ ފ. ނިލަންދު އާއި ދ. މީދޫއާ ދެމެދުގައި ކަމަށް ވެސް އެމްޓީސީސީ އިން ވަނީ ހާމަކޮށްފަ އެވެ. އަދި މި ޚިދުމަތް ދިނުމަށް ބޭނުން ކުރާނީ 2 ފެރީ ކަމަށް އެ ކުންފުނިން ވަނީ ބުނެފަ އެވެ. 

މީގެ ކުރީގެ ސަރުކާރުގައި ވަރަށް ރަނގަޅަށް ދެމުންއައި އާރްޓީއެލް ފެރީގެ ޚިދުމަތަށް މިސަރުކާރުން ވަރަށް ބޮޑަށް އިހުމާލުވެފައިވާ ކަމަށް ބައެއް އާއްމު ރައްޔިތުން ދަނީ ބުނަމުންނެވެ. ދަތުރު ކަނޑައަޅާ ޝެޑިއުލްއާ އެއްގޮތަށް ދަތުރުނުކުރާ ކަމުގެ ޝަކުވާއާއި، ހުކުރު ދުވަހު ދަތުރުތައް މެދުކަނޑާލާފައިވާތީ އެކަމުގެ ކަންބޮޑުވުން ވެސް އާއްމު ރައްޔިތުން ކޮށްފައިވެއެވެ. އަދި ހުކުރު ދުވަހު ދަތުރުތައް ނެތުމަކީ ހަފްތާ ބަންދުގައި ރަށްރަށަށް ދަތުރުކުރަން ބޭނުންވާ މީހުންނަށް ލިބޭ ވަރަށް ބޮޑު ގެއްލުމެއް ކަމަށް އެމީހުން ބުނެ އެވެ.