ގިނަ ބައެއްގެ މަގުބޫލުކަން ހޯދާފައިވާ ބިރުވެރި ފިލްމު ޕަރީގެ ޚާއްސަ ހަވީރެއް މިއަދު ކުޅުދުއްފުށި ސިޓީގައި

ގިނަ ބައެއްގެ މަގުބޫލުކަން ހޯދާފައިވާ  ބިރުވެރި ފިލްމު "ޕަރީ: ޗެޕްޓަރ 1" ގެ ޚާއްސަ ހަރަކާތެއް ކުޅުދުއްފުށި ސީޓީގައި ބާއްވަން ނިންމައިފި އެވެ.

މި ހަރަކާތް އޮތީ ހޮނިހިރު ދުވަހުގެ ހަވީރު 4:00ން 6:00 ށެވެ.

ރަންމަތިން ފަންނު ސަރަހައްދުގެ ބްރީޒް ބަރ ކުރިމަތީގައި ބާއްވާ މި ހަރަކާތުގައި ޕަރީ ފިލްމާ ގުޅޭ ގޮތުން މައުލޫމާތު ދިނުމާއި، ކުޑަ ކުދިން ގަޔަވާ ގޮތަށް އެކިއެކި އައިޓަމްތައް ކުރިއަށް ގެންދިއުމާއި، ޕަރީ ފިލްމުގެ ޗެޕްޓަރ-2ގެ ވާހަކަ ފޮތް ވިއްކުމުގެ އިތުރުން އެސިޓީގައި އަޅުވާ ފިލްމުގެ ޝޯގެ ޓިކެޓް ވިއްކާނެ އެވެ. 

އާއްމުކޮށް ހުޅުވާލައިގެން ކުރިއަށް ގެންދާ މި ހަރަކާތުގައި މި ފިލްމު ޑައިރެކްޓް ކޮށްފައިވާ މަޝްހޫރު އަލީ ސީޒަންގެ އިތުރުން ނިއުމާ މުހައްމަދު ބައިވެރިވާނެ އެވެ. 

7 ޖެނުއަރީ 2026 ވީ ބުދަ ދުވަހުގެ ރޭ ޕްރިމިއަރ ކުރި "ޕަރީ" ފިލްމު މިހާތަނަށް ގިނަ ބަޔަކު ބަލާފައިވެ އެވެ. މި ފިލްމަށް ޑިމާންޑް ބޮޑުވެ، އަތޮޅު ތެރޭގެ ރަށްރަށުގައި ވެސް ދަނީ އަޅުވަމުންނެވެ. 

މި ފިލްމަކީ އަހުމަދު އަހުސަން އާއި އަލީ ސީޒަން ޕްރޮޑިއުސް ކޮށްފައިވާ ފިލްމެކެވެ.

ފިލްމްގެ ކާސްޓުންގެ ތެރޭގައި އަލީ ސީޒަން، ރިޝްމީ ރަމީޒް، ޝީލާ ނަޖީބް، ޖުމައްޔިލް ނިމާލް، މުހައްމަދު ނައުޝާދު އަލީ ފަދަ މޫނުތައް ފާހަގަކޮށްލެވެ އެވެ. މީގެ އިތުރުން ލަންކާގެ ބައެއް ފިލްމީ ތަރީން ވެސް މި ފިލްމުގައި ހަރަކާތްތެރިވެފައި ވެ އެވެ. ފިލްމުގެ ކޮންމެ ކާސްޓެއް ވެސް ދައްކުވައި ދީފައިވަނީ ތަފާތު މޮޅު އެކްޓިންގ އެކެވެ.

އަވަށްޓެރި ސްރީލަންކާގައި 99 އިންސައްތަ ޝޫޓް ކޮށްފައިވާ މި ފިލްމަކީ ބެލުންތެރިންނާއި ހަމައަށް ގެނެސްދޭ ވަރަށް ވެސް ތަފާތު ފިލްމެކެވެ.