ކުޅުދުއްފުށި ސިޓީގައި އައިނު ފިހާރަ ހުޅުވި އިރު، އެ ސިޓީގެ ހޮސްޕިޓަލުން އަސާސީ ޚިދުމަތްތައް ނުލިބި، ރައްޔިތުން ހިތްދަތިކަމެއްގައި
ކުޅުދުއްފުށީ ރީޖަނަލް ހޮސްޕިޓަލުން އަސާސީ ބޭހާއި އައްސިކުރާ އިންޖެކްޝަން ފަދަ ތަކެތި ހުސްވެ، ސިއްޙީ ޚިދުމަތުގެ ފެންވަރު އިންތިހާއަށް ދަށަށް ގޮސްފައިވާތީ އާންމުންގެ ބޮޑެތި ޝަކުވާތަކެއް ވަނީ އަމާޒުވެފައެވެ
ކުޅުދުއްފުށީ ރީޖަނަލް ހޮސްޕިޓަލް | ކުޅުދުއްފުށީ ރީޖަނަލް ހޮސްޕިޓަލް
އުތުރުގެ އަތޮޅުތަކުގެ އެތައް ހާސް ރައްޔިތުންނެއް ސިއްޙީ ފަރުވާއަށް އެންމެ ބޮޑަށް ބަރޯސާވާ ކުޅުދުއްފުށީ ރީޖަނަލް ހޮސްޕިޓަލުގައި (ކޭއާރުއެޗް) ރަސްމިއްޔާތަކާއެކު އައު އައިނު ފިހާރައެއް ހުޅުވައި ރިބަން ކެނޑިއިރު، އެ ހޮސްޕިޓަލުގެ އަސާސީ ޚިދުމަތްތައް އިންތިހާއަށް ދަށަށް ގޮސް ރައްޔިތުން ތިބީ ބޮޑު ހިތްދަތިކަމެއްގެ ތެރޭގައެވެ.
މިގޮތުން ހަތާނެތި އުޅޭ ވައިކުޅަނދުރުތަކެއްގެ ބީދައިން، ކޭއާރުއެޗުގައި އައިނު ފިހާރަ ހުޅުވާފައިވަނީ, އިސްލާހުކުރަންޖެހޭ މުހިންމު ކަންކަން ދޫކޮށްލާފައި، ދެއްކުންތެރި މަޝްރޫޢުތަކަށް އިސްކަންދީގެން ކަމުގެ ޝަކުވާ މިއަދު މިވަނީ އާންމުވެފައެވެ. މީގެ ތެރޭގައި ރައްޔިތުންނަށް ބޭސް ނުލިބުމާއި ރަށްރަށުން ސިއްޙީ ޚިދުމަތް ހޯދަން ކުޅުދުއްފުއްޓަށް އަންނަ ފަރާތްތަކަށް އިހާނެތިކޮށް ކަންތައްތައް ކުރާކަމުގެ ޝަކުވާ މީސްމީޑިއާގައި އާންމުން ދަނީ ހިއްސާކުރަމުންނެވެ.
ދަތް ނަގަން އިންޖިކްޝަނެއް ނެތް: "މާލެއިންވެސް، އެސްޓީއޯއިންވެސް ލިބޭކަށް ނެތް"
އާންމު ފަރާތަކުން ކުޅުދުއްފުށީ ރީޖަނަލް ހޮސްޕިޓަލުގެ ސިއްޙީ ހާލަތުގެ ފެންވަރު ދަށްވެފައި ހުރި މިންވަރު ހާމަކުރަމުން ބުނެފައިވަނީ, ކުޅުދުއްފުށީ ހޮސްޕިޓަލުން ދަތެއް ނެގުމަށްޓަކައި ވެއިޓްލިސްޓްކޮށްގެން އިންތިޒާރު ކުރަމުންދާތާ ގާތްގަނޑަކަށް ދެ މަހަށް ވުރެއް ގިނަ ދުވަސް ފަހުން ހޮސްޕިޓަލުން ގުޅާފައި، މި ފެބްރުއަރީ މަހުގެ 22 ވާ އާދިއްތަ ދުވަހަށް އެޕޮއިންޓްމަންޓް ހަމަޖެހިފައިވާ ކަމަށް އެންގުމަށްފަހު, ހޮސްޕިޓަލުން ގުޅާފައި އައްސި ކުރާ އިންޖެކްޝަން ނެތް ވާހަކަ ފަހުން ބުނެފައިވާކަމަށެވެ.
"މިއަދު ގުޅާފައި ބުނީ ވަރަށް ފުރިހަމަ ވާހަކައެއް. ދަތް އައްސިކުރާނެ އިންޖިކްޝަނެއް ނެތިގެން ދަތް ނެގެން ނެތް ވާހަކަ. އެ ލިބޭނެ ދުވަހެއްވެސް ނޭނގެޔޯ. މާލެއިންވެސް، އެސްޓީއޯއިންވެސް އެ ލިބެން ނެތް ކަމަށް މައުލޫމާތު ދޭން ގުޅި ކުއްޖާ ބުނީ،" މީސްމީޑިއާގައި އެ ފަރާތުން ކަންބޮޑުވުން ފާޅުކޮށްފައިވެއެވެ.
މުޅި ސަރަޙައްދުގެ މައި ހޮސްޕިޓަލުގައި އައިނު ފިހާރައެއް ހުޅުވައިގެން އުފާފާޅުކޮށް، ވެރިންނަށް ސަނާކިޔާއިރު, އާދައިގެ ދަތެއް ނަގަން ބޭނުންވާ އައްސިކުރާ އިންޖިކްޝަނާއި ޑޮކްޓަރުން ލިޔެދޭ ބޭސް ސިޓީއަށް ބޭސް ލިބޭނެ ފިހާރައެއްވެސް ނެތުމަކީ އެ ހޮސްޕިޓަލުގެ ސިއްޙީ ނިޒާމު އިނދަޖެހިފައިވާ މިންވަރު ހާމަކޮށްދޭ ކަމެކެވެ.
އިހުމާލުގެ ސިލްސިލާ: ބަލިމީހެއްގެ ހާލަތު ދަށަށް
ހޮސްޕިޓަލުގެ އިހުމާލުގެ މައްސަލަ އެންމެ ބޮޑުވެފައިވަނީ ރަށްރަށުން ޚިދުމަތް ހޯދަން އަންނަ ފަރާތްތަކުގެ މެދުގައެވެ. އެގޮތުން، ކުޅުދުއްފުށީ ހޮސްޕިޓަލުން ސިޒޭރިއަން ހެދުމަށްފަހު، ބަލިމީހާއަށް ސިއްޙީ އެތައް އުނދަގުލެއް ކުރިމަތިވެފައި ވަނިކޮށް، އެކަށީގެންވާ ފަރުވާއެއް ނުދީ ވަނީ ރަށަށް ފޮނުވާލާފައިވާކަމުގެ މައްސަލައެއްވެސް ފަހުން ވަނީ ފެންމަތިވެފައެވެ.
ނަތީޖާއަކަށްވީ ކޭއާރުއެޗުން ބަލިމީހާ ރަށަށް ފޮނުވާލިތާ 10 ގަޑިއިރުވެސް ނުވަނީސް ބަލިމީހާގެ ހާލު ސީރިއަސްވެ، އެމެޖެންސީގައި އަލުން ކުޅުދުއްފުއްޓަށް ގެންނަން ޖެހުންކަމެވެ. އާއިލާއިން ބޭނުންވަނީ އިތުރު ފަރުވާއަށް މާލެ ދާށެވެ. ނަމަވެސް، އެމެޖެންސީގައި ބަލިމީހާ ގެނައިތާ 5 ދުވަސް ވެގެންދިޔައިރުވެސް އާސަންދަ ހަމަޖައްސައިދީފައިނުވާއިރު، އަމިއްލަ ޚަރަދުގައި މާލެ ދިއުމަށްޓަކައި ބަލިމީހާ ޑިސްޗާރޖް ކޮށްދޭންވެސް ހޮސްޕިޓަލުން ވަނީ ދެކޮޅު ހަދާފައެވެ.
"ބަލިމީހާއަށް ލިބޭ އެއްވެސް ލުޔެއް ނެތް. ޑޮކްޓަރުން ދޭ ފަރުވާއަކުން ކުރިއެރުމެއް ނުފެނޭ. ހޮސްޕިޓަލުން ސިޒޭރިއަން ހެދުމުގައި ވީ އިހުމާލު ރަނގަޅުކުރުމަށް ދޭ އެއްވެސް ޚާއްސަ ސަމާލުކަމެއް ނެތް،" އާއިލާއިން ބުންޏެވެ.
އާންމު ވޯޑުގައި ގިލަންވެރިކަން: ތުއްތު ދަރިފުޅަށް ރައްކާތެރިކަމެއް ނެތް
ބަލިމީހާގެ ހާލު ސީރިއަސްވެފައިވާއިރު، އޭނާ ބާއްވާފައި އޮތީ އެހެނިހެން ބަލިމީހުންވެސް ތިބޭ އާންމު ވޯޑަކަށް "އެއްލާލާފައެވެ". އާއިލާއިން ބުނާ ގޮތުގައި، ބަލިމީހާއަށް ދޭންޖެހޭ ޚާއްސަ އަޅާލުމެއް ނުލިބޭތީ އާއިލާގެ މެދުގައި ވަނީ ބޮޑު ގިލަންވެރިކަމެއް އުފެދިފައެވެ. ވަކިން ޚާއްސަކޮށް، އަލަތު ދަރިފުޅު ގޮވައިގެން އެފަދަ ތަނެއްގައި އޮންނަން ޖެހުމުން، އެ ތުއްތު ކުއްޖާއަށް ލިބެންޖެހޭ ރައްކާތެރިކަމެއް އެފަދަ މާހައުލަކުން ނުލިބޭ ކަމަށް އާއިލާއިން ބުނެއެވެ.
ކުޅުދުއްފުށީ ރީޖަނަލް ހޮސްޕިޓަލުން އައު އައިނު ފިހާރައެއް ހުޅުވައިގެން ކިތަންމެ ބޮޑު އިޝްތިހާރެއް ކުރި ނަމަވެސް، އެންމެ އަސާސީ ސިއްޙީ ޚިދުމަތްތައް މެދުކެނޑި، ބަލިމީހުންގެ ފުރާނައަށް ނުރައްކާވާ ފަދަ އިހުމާލުތައް ހިނގަމުންދާތީ އާންމުން ދަނީ ކަންބޮޑުވުން ފާޅުކުރަމުންނެވެ. ރައްޔިތުން ބޭނުންވަނީ ދެއްކުންތެރި ކުލަގަދަ ރަސްމިއްޔާތުތަކެއް ނޫނެވެ. ބޭނުންވަނީ އިތުބާރު ހުރި، ރައްކާތެރި ސިއްޙީ ނިޒާމެކެވެ.
