ޑރ. ވަހީދު އެޕްސްޓީން އަށް: 2013 ގެ ރިޔާސީ އިންތިޚާބަށް އިންޑިއާ އިން ނުފޫޒު ފޯރުވައި، ރައީސް ނަޝީދު އިންތިޚާބުގެ ފުރަތަމަ ބުރު "ވަގަށް ނެގުމަށް" އެ ގައުމުން އެހީވެދިން

2013 ގެ ރިޔާސީ އިންތިޚާބަށް އިންޑިއާ އިން ނުފޫޒު ފޯރުވައި، ރައީސް މުހަައްމަދު ނަޝީދު އިންތިޚާބުގެ ފުރަތަމަ ބުރު "ވަގަށް ނެގުމަށް" އިންޑިއާ އިން އެހީވެދިން ކަމަށް އޭރުގެ ރައީސް ޑރ. މުހައްމަދު ވަހީދު ހަސަން މަނިކު ޖެފްރީ އެޕްސްޓީން އަށް ފޮނުއްވި އީމެއިލެއްގައި ވިދާޅުވިކަން ހާމަ ވެއްޖެ އެވެ.

އެމެރިކާގެ ޖަސްޓިސް ޑިޕާޓްމަންޓުން މިހާރު އާންމު ކޮށްފައިވާ ޖެފްރީ އެޕްސްޓީން އާ ގުޅޭ ލިޔުންތަކުގެ ތެރޭގައި ހިމެނޭ މި އީމެއިލް ގައި ޑރ. ވަހީދު ވިދާޅުވެފައި ވަނީ އިންތިޚާބުގެ ކަންތައްތައް ދިޔައީ ކުރިން ހީކުރި ވަރަށް ވުރެ މާ އުނދަގޫކޮށް ކަމަށެވެ.

އޮކްޓޯބަރު 1، 2013 ގެ ތާރީޚު ގައި ޑރ. ވަހީދު ފޮނުއްވި މި އީމެއިލު ގައި އިންތިޚާބުގެ ފުރަތަމަ ބުރުގެ ނަތީޖާ އޮޅުވާލައި، ނަޝީދަށް ކާމިޔާބު ހޯދައިދިނުމަށް އިންޑިއާ އިން އެހީތެރިވެދީފައިވާ ކަމަށް ވިދާޅުވުމުގެ އިތުރުން، "މި މައްސަލަ މިހާރު ވަނީ ސުޕްރީމް ކޯޓަށް ހުށަހެޅިފަ،" ކަމަށް ވިދާޅުވެފައިވެ އެވެ. އަދި ކުރިއަށް އޮތް 48 ގަޑިއިރުގެ ތެރޭގައި ކޯޓުން މިކަމާ މެދު ގޮތެއް ނިންމާނެ ކަމަށް ބެލެވޭއިރު، އިންތިޚާބު ބާއްވާނެ އާ ތާރީޚުތައް މި ހަފުތާގެ ތެރޭގައި ކަނޑައެޅިގެންދާނެ ކަމަށް ވެސް ވިދާާޅުވެފައިވެ އެވެ.

"މިކަމާ ގުޅޭގޮތުން މިނިސްޓްރީ އޮފް ފޮރިން އެފެއާޒުން ތައްޔާރުކޮށްފައިވާ ޚުލާސާ ރިޕޯޓެއް މިއާއެކު ފޮނުވީމެވެ. އިތުރު ތަފްސީލަށް އެޓޭޗްމަންޓް ބަލާލުން އެދެމެވެ." ޑރ. ވަހީދު ލިޔުއްވާފައިވެ އެވެ.

މިހާތަނަށް ރާއްޖޭގައި ބޭއްވުނު ކޯޓުގެ ނުފޫޒު އެންމެ ބޮޑުވެގެން ދިޔަ 2013 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރު ބޭއްވުނީ ސެޕްޓެމްބަރު މަހުގެ 7 ވަނަ ދުވަހުއެވެ. އެއްވެސް ކެންޑިޑޭޓަކަށް އަޣުލަބިއްޔަތު ލިބިފައި ނުވުމުން، ފުރަތަމަ ބުރުން އެންމެ ގިނަ ވޯޓު ހޯއްދެވި ދެ ކެންޑިޑޭޓުންގެ މެދުގައި ބާއްވާ ދެވަނަ ބުރު ސެޕްޓެމްބަރު 28 އަށް ތާވަލުކުރެވުނެވެ. އެ ދެ ކެންޑިޑޭޓުންނަކީ ކުރީގެ ރައީސް މުޙައްމަދު ނަޝީދާއި ޢަބްދުﷲ ޔާމީނެވެ. އޭރުގެ ރައީސް ޑރ. މުޙައްމަދު ވަޙީދު ޙަސަން ވަނީ މާ މަދުން ވޯޓު ލިބިވަޑައިގަތުމުން ފުރަތަމަ ބުރުން ކަޓާފަ އެވެ.

ނަމަވެސް، ސެޕްޓެމްބަރު 27 ވަނަ ދުވަހު ސުޕްރީމް ކޯޓުން ވަނީ ދެވަނަ ބުރު ބޭއްވުން ހުއްޓުވައި، ފުރަތަމަ ބުރުގެ ނަތީޖާ ބާޠިލުކޮށްފަ އެވެ. އޭގެ ފަހުން ނޮވެމްބަރު 9 ވަނަ ދުވަހު ފުރަތަމަ ބުރު އަލުން ބޭއްވުނުއިރު، ނަތީޖާ އައީ ކުރީގެ ވޯޓާ ދާދި އެއްގޮތަކަށެވެ. ނޮވެމްބަރު 11 ގެ ކުރިން އައު ރައީސަކު އިންތިޚާބުކޮށް ނިންމަން ޖެހޭތީ، އޭގެ ޖެހިގެން އައި ދުވަހު ދެވަނަ ބުރު ބޭއްވުމަށް ނިންމުނެވެ. އެހެންނަމަވެސް، ކެމްޕޭން ކުރުމަށް އިތުރު ވަގުތު ބޭނުންވާ ކަމަށް ވިދާޅުވެ ޢަބްދުﷲ ޔާމީން ހުށަހެޅުއްވި މައްސަލައަކާ ގުޅިގެން، ސުޕްރީމް ކޯޓުން އެ ވޯޓު ނޮވެމްބަރު 16 އަށް ފަސްކޮށްދިނެވެ. މި އިންތިޚާބުގެ ދެވަނަ ބުރު ޢަބްދުﷲ ޔާމީން ކާމިޔާބު ކުރެއްވީ ފުރަތަމަ ބުރުގައި ލިބުނު 30 އިންސައްތަ ވޯޓު، ދެވަނަ ބުރުގައި 51 އިންސައްތައަށް އިތުރުކުރައްވައިގެންނެވެ. އެ ބުރުން މުޙައްމަދު ނަޝީދަށް އިތުރުވީ އެންމެ 2 އިންސައްތަ ވޯޓެވެ.