ބަރުބަރީ މިސްކިތް ހުޅުވައިފި
ޒަމާނީ ފެންވަރަށް ތަރައްޤީކުރި 3 ފަންގިފިލާގެ ބަރުބަރީ މިސްކިތަކީ އެއްފަހަރާ 1400 މީހުންނަށް ނަމާދުކުރެވޭނެ ޖާގަ ހިމެނޭ ބިނާއެއް.
ރައީސުލްޖުމްހޫރިއްޔާ، މަސްޖިދުލް ޔޫސުފުލް ބަރުބަރީ ހުޅުވައިދެއްވައިފި | ރައީސް އޮފީސް
މަސްޖިދުލް ޔޫސުފުލް ބަރުބަރީ (ބަރުބަރީ މިސްކިތް) ހުޅުވައިފި އެވެ.
މި މިސްކިތް ހުޅުއްވައިދެއްވީ ރައީސް ޑރ. މުޙައްމަދު މުޢިއްޒު އެވެ.
މި މިސްކިތް ހުޅުވައިދެއްވީ ބުދަ ދުވަހުގެ އަސުރުނަމާދު ވަގުތުގަ އެވެ.
އަމިއްލަ ފަރާތަކާއި ހަވާލުކޮށްގެން ޒަމާނީ ފެންވަރަށް ބަރުބަރީ މިސްކިތް ތަރައްޤީކޮށްފައި ވަނީ 3 ފަންގިފިލާގެ މިސްކިތެއްގެ ގޮތުގަ އެވެ. މިއީ 1400 މީހުންގެ ޖާގައިގެ މިސްކިތެކެވެ.
ހިލޭ އެހީގެ ދަށުން މާލެ ސަރަހައްދުގައި މިސްކިތްތައް ބިނާކޮށް ތަރައްޤީކުރުމަށް މިހާރުވެސް ގިނަ މަސައްކަތްތަކެއް ދަނީ ކުރެވެމުން ކަމަށް ރައީސް އޮފީހުން ބުނެ އެވެ.
މި އަހަރުގެ ތެރޭގައި ގިނަ މިސްކިތްތަކެއް ހުޅުވުމަށް ސަރުކާރުން ވަނީ ނިންމަވާފައި ކަމަށާއި އެގޮތުން އެކި ރަށްރަށުގައި ބިނާ ކޮށްފައިވާ ބައެއް މިސްކިތްތައް މި ރޯދަމަހާ ދިމާކޮށްވެސް ވަނީ ހުޅުވާފައި ކަމަށް ވެސް ރައީސް އޮފީހުން ބުނެ އެވެ. އެހެން ނަމަވެސް ރޯދަ މަހާ ދިމާކޮށް ހުޅުވީ ކޮންކޮން މިސްކިތްތަކެއް ކަމެއް ހާމަ ކޮށްފަ އެއް ނުވެ އެވެ.
