އަނެއްކާވެސް އެއްކަލަ ފަތިވަރު. އެއްކަލަ ގައުމަށްޓަކައި ދީނަށްޓަކައި

ރައްޓެއްސަކު މަގުމަތިން ދިމާވެގެން ބުނެލިއެވެ. ބޮޑުތާ ޖެހުނީ ދޯއެވެ. ވީ ކީއްތޯ އަހާލީމެވެ. ސީދާ ޖަވާބު ދިނުމުގެ ބަދަލުގައި އޭނާ ބުނީ "އެފެށީ ހަމަ އެފޮތުން" ކަމަށެވެ. "ގެޓެއް" ނުވިއޭ ތަންކޮޅެއް ތިލަކޮށްލަ ދީފާނަންހޭ ބުނެލީމެވެ.

އޭނާ ބުނީ މިވެރިންގެ ފަހު ކާޑަކީ ދީނާ ގައުމަށްޓަކައެވެ. މިނޫނިއްޔާ ގައުމުދެކެ ލޯބިވާ އަދި ދީނަށް އުޅޭ ބަޔަކު ނޫޅޭ ކަހަލައެވެ. އޭނާ ފަށްޗަކަށް އަމުނާލިއެވެ.

ކުޑައިކޮށް ވިސްނާލީމެވެ. އޭނާ ބުނިހެން ހީވާކަހަލަ ހެޑްލައިންތަކެއް އަޅައިގަތެވެ. ގައުމު ސަލާމަތްކުރާން ބޭނުމިއްޔާ ޕީއެންސީން ކައުނސިލަށް ކުރިމަތިލާފައިވާ ކެނޑިޑޭޓުންނަށް ވޯޓުދޭން ޖެހޭ ކަމަށް ވިދާޅުވީ ގައުމުގެ އިސްލާމީ ކަންތައްތަކާ ބެހޭ ވުޒާރާގެ ވަޒީރެވެ. ދީނީ ތައުލީމް ހާސިލް ކުރައްވައިގެން ޕީއެޗްޑީ ހާސިލް ކުރައްވައިގެން ހުންނެވި ޑރ މުހައްމަދު ޝަހީމް އަލީ ސައީދެވެ. މާކުރީ ޒަމާނެއްގައި އިދިކޮޅުގައި ހުންނަވައިގެން އެމަނިކުފާނު ދެއްކެވި ވާހަކަފުޅާއި މިހާރު ހިތްޕުޅާ ނުވެގެން އުޅުއްވާ މީހުންގެ ފުރަތަމަ ސަރުކާރުގައި ދެއްކެވި ވާހަކަފުޅު އަހަރެން ތަކުރާރެއް ނުކުރާނަމެވެ.

އެކަމަކު ކޮންމެ އިންތިޚާބަކާ ދިމާކޮށް މިއީ އިވޭ އަޑެކެވެ. ވަކި ބަޔަކީ ލާދީނީ ބައެކެވެ. އެވެރިން ހޮވައިފިނަމަ ރާއްޖެއިން އިސްލާމްދީން ފުހެވިދާނެ ކަމެވެ. އެންމެން ޣައިރުދީނަށް އަނބުރާނެ ވާހަކައެވެ. މިސްކިތްތަކުގެ ބަދަލުގައި ފައްޅިއަޅާނެއޭވެސް ހިސާބަކަށް ގޮވިއެވެ. އެވެރިންގެ ސަރުކާރެއްގައި މިސްތަކުން ބަންގީގެ އަޑެއް ނުއިވޭނެޔޭވެސް ބުނެ އުޅުނެވެ.

އެކަމަކު އެބުނާ ބައެއްގެ ދެވެރިކަމެއް ނިމިއްޖެއެވެ. ގައިމު އެބުނާ އަޑެއް މިސްކިތަކުން ނުކެނޑުނެވެ. މިތަނުން ފެނުނު ފައްޅިއެއް ނެތެވެ. އެޅި މިސްކިތެއް މަދެއް ނޫނެވެ. އިސްލާމީ ކަންކަކްނ ކުރަން ފުރަތަމަ އައްވަލަށްވެސް މިނިވަން ވުޒާރާއެއް ހަދާ އެވުޒާރާއަށް ވަޒީރަކު ލީވެސް ހަމަ އެވެރިންނެވެ. އެވުޒާރާ ހަމައިސކޮޅަށް ތެދުވެލާ މިތަނުގައި ހިންގާންފެށި ދީނީ ކަންތައްތައްތައްވީ އިތުރެވެ. ސީދާ މައްސަލައަށް އެޑްރެސްކޮށް ހަފްތާއަކު އާ ޚުތުބާއެއް ދޭން ފެށިއެވެ. ދީނީ އިލްމުވެރިންގެ ބިރުވެރިކަން ނައްތާލައި އެވެރިންނަށް ފުރިހަމަ މިނިވަންކަން ހޯދައިދިނެވެ. އިސާހިތަކު ކުރިން ހަރަކާތްތެރި ނުވެވުނު ދީނީ އިލްމުވެރިންނަށް ބާރަށް ދީނީ މަސައްކަތް ފަށައިގަނެވުނެވެ. ރަށްރަށުގައި ދޭނެ އިރަކު ތަގްރީރުތައް ދެވެން ފެށުނެވެ. ދީނީ ޖަމްއިއްޔާ ޖަމާއަތަތްއ ހަދައިގެން ހިންގުމުގެ ޖާގަ ކަށަވަރުވިއެވެ. ކުރުކޮށް ފޮނިކޮށް ބުނަންޏާ ކުރިން އިސްލާމްދީން ކުރިއެރުވުމަށް މަސައްކަތް ނުކުރެވޭހާ ބޮޑަށް ޖާގަ ތަނަވަސްވީ އެބުނާ އެމްޑީޕީން ރާއްޖޭގެ ވަެރިކަމާ ހަވާލުވުމާއެކުގައެވެ. އޭގެ ފަހުން ލިބުނު ދުލުގެ މިނިވަންކަމާ ޚިޔާލުފާޅުކުރުމުގެ މިނިވަންކަމާއެކު މިހާރު އެވަނީ އެކަމަށް ހުރަސްނޭޅޭވަރަށް މަލަރުވެފައެވެ.

މިއީކީ ނަގަނަގައިގެން ތަކުރާރުކުރަން ޖެހޭވަރުގެ ވާހަކައެއް ނޫނެވެ. ކިރިޔާވެސް ރާއްޖޭގެ ކަންކަމުގައި ކަންހިނގިގޮތުގެ އާޖްފާޖް އެނގޭ މީހަކަށް ވަހުމެއް އޮޅުމެއް އޮތްކަމެއް ނޫނެވެ.

އެކަމަކު މިފަހަރުގެ އިންތިޚާބުގައިވެސް އެފެށީ އެވާހަކައެވެ. އާ ރާގަކަށް އަނެއްކާވެސް އެލަވަ ކިޔާން އެވަނީ ފަށާފައެވެ. އެލަވަ ކިޔައިގެން އެބެރަށް ނަށުވައިގެން ގެނައި ސަރުކާރުންނެވެ. ކުރީގެ ސަރުކާރުތަކުން ކުރީތީ ދީނާ ދެކޮޅު ކަމަކަށްވެގެން އަޑު އުފުލި ކަންކަން ކުރަމުންދާ ސަރުކާރުންނެވެ. ކުރިން ޔޯގާ ހަރާމްވެގެން އައިސް މިހާރު ހަލާލްވި ސަރުކާރުންނެވެ. މިއުޒިކާއި ސްޓޭޖް ޝޯވތައ ގޯސްވެގެން އައިސް އެއަށްވުރެ ގިނައިން އެކަންކަން ބާއްވަމުންދާ ސަރުކާރުންނެވެ. އިސްރާފު ބޮޑުވެ ޖަށްވަށް ހަވަޔަށް ބަޑިބޭހުގެ ގޮތުގައި ދެއިރު ދެދަޅައަށް ހަވާ އަރުވަމުންދާ ސަރުކާރުންނެވެ. ބަލާލި ކޮންމެ ދިމާލަކުން ކޮރަޕްޝަނާއި ފަސާދައިގެ ތުހުމަތުތައް ކުރެވޭ އަޑުތައް އިވިއިވި އޮތް ސަރުކާރުންނެވެ. ހަމަޔަށް އެފަދަ ކަންކަމުގައި އުޅޭ މީހުން ރީތިކޮށް ނަލަކޮށް އެކަންކުރާން ދޫކޮށްލައިގެން އޮތް ސަރުކާރުންނެވެ. މިހުރިހާކަމެއް ފޫބައްދައި ފަސާހާތްތެރިކަމާއި ބަލާޣާތްތެރިކަމާއެކު ރޯމާ ދުވާލު އިތުރުފުޅު ހައްދަވަމުން ގެންދަވާ ވަލިއްޔުލް އަމުރަކު ހުންނެވި ސަރުކާރަކުންނެވެ.

ކޮންމެއަކަސް ދީނީ ކާޑާއި ގައުމީ ކާޑު މިހާރު ބާވިތާ ކިތަންމެ ދުވަހެކެވެ. ތިޔަވާހަކަތައް ނޭނގޭ ހަމަ އެކަކުވެސް މިހާރަކު ނޫނެވެ. ކޮންމެ އިންތިޚާބަކާ ދިމާކޮށް ތިޔަކުޅެނީ ފަހުކާޑުކަން އެންމެން ދަނެއެވެ. ތިޔައީ މިހާރު ބާ ލަވައެކެވެ. ވައިގާ ނުހިފާނެ ކުރީގެ ލަވައެކެވެ. ކޮންމެ ފަހަރަކުވެސް ގައުމަށްޓަކައޭ ދީނަށްޓަކައޭ ބުނެ އައިސް ދެން ގަންނަ ގަނޑު ފަހުމް ނުވާ މީހަކު މި އުޑުބަޅުކުރި ހިސާބަކު ނެތެވެ.