18 ފެބްރުއަރީ 2026 ވާ ބުދަ ދުވަހަކީ 1447 ވަނަ އަހަރުގެ ރަމަޟާން މަހުގެ ފުރަތަމަ ދުވަސް
1447 ވަނަ އަހަރުގެ ރަމަޟާން މަހުގެ ހަނދު ސާބިތުކުރުމަށް ބޭއްވި ޖަލްސާގައި، ބައެއް އިސްލާމީ ގައުމުތަކަށް ހަނދު ފެނިފައިވާތީ ރާއްޖޭގައި އަމަލުކުރާ އުސޫލުގެ މަތިން މިއަހަރުގެ ރޯދަމަހުގެ ފުރަތަމަ ދުވަހަކީ 18 ފެބްރުއަރީ ވާ ބުދަ ދުވަސް ކަމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ކަނޑައަޅާފަ. ސައުދީ އަރަބިއްޔާގެ އެކި ސަރަހައްދުތަކަށް ހަނދު ފެނުނުކަމުގެ ރިޕޯޓުތައް ލިބުމާ ގުޅިގެން، އެ ގައުމުގެ ސުޕްރީމް ކޯޓުން ވެސް ވަނީ ބުދަ ދުވަހަކީ ރޯދަ މަހުގެ ފުރަތަމަ ދުވަސް ކަމަށް ރަސްމީކޮށް އިޢުލާންކޮށްފަ.
ރަމަޟާން މަހުގެ ހަނދު ފެނިގެން ސިފައިން ބަޑި ޖަހަނީ | އަވަސް.އެމްވީ
18 ފެބްރުއަރީ 2026 ވާ ބަދަ ދުވަހަކީ 1447 ވަނަ އަހަރުގެ ރަމަޟާން މަހުގެ ފުރަތަމަ ދުވަސްކަމަށް އިސްލާމީކަންތައްތަކާ ބެހޭ ވުޒާރާއިން ކަނޑައަޅައިފި އެވެ.
އިސްލާމީ ކަންތައްތަކާ ބެހޭ ވުޒާރާއިން މިކަން ކަނޑައަޅާފައިވަނީ 17 ފެބްރުއަރީ 2026 ވަނަ ދުވަހުގެ ރޭ ހަނދު ސާބިތުކުރުމަށްޓަކައި އިސްލާމީ މަރުކަޒުގައި ބޭއްވި ޖަލްސާގަ އެވެ.
މި ޖަލްސާގައި ހަނދު ސާބިތުވިކަން އިޢުލާންކުރައްވާ، އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ސޮއިކުރެއްވި ހަނދާބެހޭ ބަޔާން އިއްވަމުން ވިދާޅުވީ ޙިޖްރީ ސަނަތުން 1447 ވަނަ އަހަރުގެ ޝަޢުބާން މަހުގެ 29 ވީ އަންގާރަ ދުވަހުގެ އިރު އޮއްސުމުގެ ފަހުން، ބައެއް އިސްލާމީ ޤައުމުތަކަށް 1447 ވަނަ އަހަރުގެ ރަމަޟާން މަހުގެ ހަނދު ފެނުނުކަން ޝަރްޢީ ހަމަތަކުން ސާބިތުވާތީ ރަމަޟާން މަހާއި ޝައްވާލް މަހުގެ ހަނދު ސާބިތު ކުރުމަށް ދިވެހިރާއްޖޭގައި ޢަމަލު ކުރުމަށް ހަމަޖެހިފައިވާ އުސޫލުގައި ވާ ގޮތުގެ މަތީން ފެބްރުއަރީ މަހުގެ 18 ވަނަ ދުވަހަކީ 1447 ވަނަ އަހަރުގެ ރަމަޟާން މަހުގެ ފުރަތަމަ ދުވަސްކަމުގައި ކަނޑައަޅާފައިވާކަމަށެވެ.
ހަނދު ފެނުމާއެކު ސައުދީ އަރަބިއްޔާ އިން ވަނީ ބުދަ ދުވަހަކީ ރޯދަ މަހުގެ ފުރަތަމަ ދުވަސް ކަމަށް ކަނޑައަޅާފަ އެވެ.
ރަމަޟާން މަހުގެ ހަނދު ސައުދީ އަރަބިއްޔާއަށް ފެނިފައިވާތީ، މިއަހަރުގެ ބަރަކާތްތެރި ރަމަޟާން މަހުގެ ފުރަތަމަ ދުވަހަކީ ބުދަ ދުވަސް ކަމަށް އެ ގައުމުގެ ސުޕްރީމް ކޯޓުން އަންގާރަ ދުވަހުގެ އިރުއޮއްސުނު ވަގުތު ވަނީ އިއުލާނު ކޮށްފަ އެވެ.
ސައުދީ ސުޕްރީމް ކޯޓުން މިކަން އިއުލާންކުރީ، އިސްލާމީ އުސޫލުތަކާ އެއްގޮތްވާ ގޮތުގެ މަތިން ހަނދު ބެލުމަށް އެ ގައުމުގެ އެކި ސަރަހައްދުތަކުގައި ގާއިމުކޮށްފައިވާ ހަނދު ބަލާ ކޮމިޓީތަކަށް ހަނދު ފެނުނުކަމުގެ ރިޕޯޓުތައް ލިބުމާ ގުޅިގެންނެވެ.
މި ނިންމުމާއެކު، ސައުދީ އަރަބިއްޔާގެ އެންމެހާ މުސްލިމުން ބުދަ ދުވަހުގެ ފަތިހުން ފެށިގެން ރޯދަ ހިފަން ފަށާނެ އެވެ.
