އަލްއަޤްޞާ މިސްކިތުގެ އިސް އިމާމަކު މިސްކިތަށް ވަނުން މަނާކޮށްފި

މުސްލިމުންގެ ބަރަކާތްތެރި ރަމަޟާން މަސް ފެށުމަށް ކުޑަތަންވެފައި ވަނިކޮށް، އިރުމަތީ ގުދުސްގައި ހުންނަ އަލްއަޤްޞާ މިސްކިތުގެ އިސް އިމާމަކު އެ މިސްކިތަށް ވަނުން އިޒްރޭލުގެ ކަމާބެހޭ ފަރާތްތަކުން މަނާކޮށްފި ކަމަށް އަންގާރަ ދުވަހު އޭނާ ވިދާޅުވެއްޖެ އެވެ.

ޝައިޚް މުޙައްމަދު އަލްޢައްބާސީ އޭއެފްޕީ ނިއުސް އެޖެންސީއަށް މަޢުލޫމާތު ދެއްވަމުން ވިދާޅުވީ، އެއް ހަފުތާގެ މުއްދަތަށް އޭނާ މިސްކިތަށް ވަނުން މަނާކޮށްފައިވާ ކަމަށާއި، އަދި އެ އަމުރުގެ މުއްދަތު އިތުރުކުރުމުގެ ފުރުޞަތު އޮތް ކަމަށެވެ.

މިދިޔަ ހޯމަ ދުވަހުން ފެށިގެން އަމަލުކުރަން ފެށި މި ނިންމުމާ ގުޅޭގޮތުން ވާހަކަދައްކަވަމުން ޝައިޚް ވިދާޅުވީ، އޭނާ މިސްކިތަށް ވަނުން މަނާކުރި ވަކި ސަބަބެއް އިޒްރޭލުގެ ކަމާބެހޭ އިދާރާތަކުން އަންގާފައި ނުވާ ކަމަށެވެ.

ޝައިޚް ޢައްބާސީ އިތުރަށް ވިދާޅުވީ، އޭނާ އަލްއަޤްޞާ މިސްކިތަށް އަލުން ވަޑައިގަންނަވަން ފެއްޓެވީ، ކުރިމަތިވި ނުރައްކާތެރި ކާރު އެކްސިޑެންޓަކާ ގުޅިގެން އެއް އަހަރު ދުވަހު ހޮސްޕިޓަލުގައި ފަރުވާ ހޯއްދެވުމަށް ފަހު، މީގެ މަހެއްހާ ދުވަސް ކުރިން ކަމަށެވެ.

މިކަމާ ގުޅިގެން ކަންބޮޑުވުން ފާޅުކުރައްވަމުން އޭނާ ވިދާޅުވީ، މިސްކިތަށް ވަނުން މަނާކުރުމަކީ ވަރަށް ސީރިއަސް މައްސަލައެއް ކަމަށާއި، އޭނާގެ ފުރާނަ ގުޅިފައިވަނީ އަލްއަޤްޞާ މިސްކިތާ ކަމަށެވެ. އަދި އަލްއަޤްޞާ މިސްކިތަކީ އޭނާގެ ދިރިހުރުން ކަމަށް ވެސް ޝައިޚް ވިދާޅުވި އެވެ.

ރަމަޟާން މަހުގެ ތެރޭގައި އެތައް ލައްކަ ފަލަސްތީނު ރައްޔިތުން އާންމުކޮށް އަލްއަޤްޞާ މިސްކިތުގައި ނަމާދުކުރުމަށް ޖަމާވެ އެވެ. އިރުމަތީ ގުދުސްގައި ހުންނަ މި މިސްކިތަކީ އިސްލާމްދީނުގެ ތިންވަނަ އަށް އެންމެ މުޤައްދަސް ބިނާ އެވެ. އިޒްރޭލުން މި ސަރަހައްދު ހިފާފައިވަނީ 1967 ވަނަ އަހަރުގަ އެވެ.

އިޒްރޭލުގެ ފުލުހުން ހޯމަ ދުވަހު ބުނެފައި ވަނީ، އިޒްރޭލުން އިސްތިޢުމާރުކޮށްފައިވާ ހުޅަނގު އައްސޭރީގެ ފަލަސްތީނު ރައްޔިތުންނަށް އަލްއަގްސާ މިސްކިތައް ވަނުމަށް ބޭނުންވާ 10،000 ހުއްދަ ދޫކުރުމަށް ލަފާދީފައިވާ ކަމަށެވެ.

ނަމަވެސް، މި ހުއްދަ ދޫކުރުމުގައި ވަކި އުމުރެއްގެ މީހުންނަށް ހުރަސްތަކެއް އޮންނާނެ ކަމެއް ނުވަތަ ނޫން ކަމެއް ސާފުކޮށްދީފައެއް ނުވެއެވެ.

ފަލަސްތީނުގެ ޖެރޫސަލަމް ގަވަރނަރޭޓުން ބުނި ގޮތުގައި، މިދިޔަ އަހަރެކޭ ވެސް އެއްފަދައިން މިއަހަރުވެސް ހުއްދަ ދޫކުރާނީ 55 އަހަރުން މަތީގެ ފިރިހެނުންނަށާއި 50 އަހަރުން މަތީގެ އަންހެނުންނަށް އެކަނި ކަމަށް އިޒްރޭލުން ވަނީ އަންގާފަ އެވެ.

މީގެ އިތުރުން، އެ މިސްކިތް ބަލަހައްޓާ އުރުދުންގެ އިސްލާމިކް ވަޤުފް އިދާރާ އިން ރަމަޟާން މަހަށް ތައްޔާރުވުމުގެ ގޮތުން ކުރާ މަސައްކަތްތަކަށް އިޒްރޭލުން ހުރަސްއަޅާފައިވާ ކަމަށް ވެސް އެ އިދާރާ އިން ބުންޏެވެ. އޭގެ ތެރޭގައި އަވިން ސަލާމަތްވުމަށް ހިޔާ ތައް ހަރުކުރުމާއި ވަގުތީ މެޑިކަލް ކްލިނިކްތައް ގާއިމުކުރުން ހިމެނެ އެވެ.

ވަޤުފް އިދާރާގެ މަޞްދަރަކުން މަޢުލޫމާތު ދިން ގޮތުގައި، ރަމަޟާން މަސް ފެށުމުގެ އެއް ހަފުތާ ކުރިން އެ އިދާރާގެ 33 މުވައްޒަފަކު މިސްކިތުގެ ސަރަހައްދަށް ވަނުން ވަނީ މަނާކޮށްފަ އެވެ.

ޒަމާނުއްސުރެ އަމަލުކުރަމުން އަންނަ އުސޫލުތަކުގެ ދަށުން، ޔަހޫދީންނަށް އަލްއަޤްޞާ މިސްކިތުގެ ސަރަހައްދަށް ޒިޔާރަތް ކުރެވުނު ނަމަވެސް، އެތަނުގައި އަޅުކަން ކުރުމަކީ މަނާކަމެކެވެ. ޔަހޫދީން އެ ސަރަހައްދަކީ އެމީހުންގެ ފުރަތަމަ އަދި ދެވަނަ ފައްޅި ހުރި ތަން ކަމަށް ދައުވާކުރެ އެވެ.

އިޒްރޭލުން ބުނަމުންދަނީ މިހާރު އޮތް އުސޫލުތައް ދަމަހައްޓާނެ ކަމަށެވެ. ނަމަވެސް ފަލަސްތީނު ރައްޔިތުން ކަންބޮޑުވަނީ އެ އުސޫލުތައް މަޑުމަޑުން އުވާލަމުންދާތީ އެވެ.

ފަހަކަށް އައިސް، ހަރުކަށި ފިކުރުގެ ޔަހޫދީން ދަނީ އެތަނުގައި އަޅުކަން ނުކުރެވޭ ގޮތަށް އޮންނަ އުސޫލާ ދެކޮޅަށް މަސައްކަތް ކުރަމުންނެވެ. އޭގެ ތެރޭގައި ހަރުކަށި ފިކުރުގެ ސިޔާސީ ލީޑަރު އިތަމާރު ބެން-ގްވީރް ހިމެނެއެވެ. އޭނާ ވަނީ 2024 އަދި 2025 ވަނަ އަހަރު ނޭޝަނަލް ސެކިއުރިޓީ މިނިސްޓަރުގެ މަގާމުގައި ހުރެގެން އެ ސަރަހައްދުގައި އަޅުކަން ކޮށްފަ އެވެ.