ސަރުކާރު ބައެއް މިނިސްޓްރީތަކުގެ މުވައްޒަފުންގެ ޖެނުއަރީ މަހުގެ ޕެންޝަން ފައިސާ ޖަމާ ނުވޭ
ސަރުކާރުން މުވައްޒަފުންގެ މުސާރައިން ބަރާބަރަށް ފައިސާ ކަނޑަމުންދިޔަ ނަމަވެސް ފަންޑަށް އެ ފައިސާ ޖަމާނުކުރާ މައްސަލަ މިހާރު ވަނީ ބޮޑުވެފައި.
މޯލްޑިވްސް ފައިނޭންސް ފޯރަމް 2025 ގެ ޝަރަފުވެރި މެހެމާނު، މިނިސްޓަރ އޮފް ފައިނޭންސް އެންޑް ޕްލޭނިންގ، މޫސާ ޒަމީރު، އެ ފޯރަމްގެ ބައިވެރިންނާ މުޚާތަބުކުރައްވައި ވާހަކަފުޅު ދައްކަވަނީ. | ޕެންޝަން އޮފީސް
ސަރުކާރު ބައެއް މިނިސްޓްރީ ތަކުގެ މުވައްޒަފުންގެ ޖެނުއަރީ މަހުގެ ޕެންޝަން ފައިސާ ޖަމާ ނުވާކަން މި ނޫހަށް އެނގިއްޖެ އެވެ.
މި މައްސަލަ ފެންމަތިވި އިރު ސަރުކާރުގެ ސައްތައިން ސައްތަ ހިއްސާ އޮންނަ ބައެއް ކުންފުނިތަކުގެ މުވައްޒަފުންގެ ޕެންޝަން ފައިސާ ގަވައިދުން ޖަމާ ނުވާ ކަމުގެ މައްސަލަ ވެސް ވަނީ ފެންމަތިވެފަ އެވެ.
ސަރުކާރު ގެ މިނިސްޓްރީ އެއްގައި މަސައްކަތް ކުރާ ސިވިލް ސާވިސް ގެ އިސްވެރިޔަކު ނަން ނުޖެހުމަށް ޝަރުތު ކޮށް މި ނޫހަށް ކަށަވަރު ކޮށްދިން ގޮތުގައި އޭނާގެ ޕެންޝަން ފަންޑަށް ޖެނުއަރީ މަހު ފައިސާ ޖަމާވެފައެއް ނުވެ އެވެ.
"މުސާރައިން ފައިސާ ކަނޑާފައި އޮތީ، އެކަމަކު ފަންޑަށް ފައިސާ ޖަމަ އެއް ނުވޭ، މި މިނިސްޓްރީގެ އެހެން މުވައްޒަފުން ޗެކް ކުރި އިރު ވެސް ޖެނުއަރީ މަހު ފައިސާ ޖަމާ ނުވޭ،" އޭނާ ބުންޏެވެ.
މުވައްޒަފުންގެ ޕެންޝަން ފަންޑަށް ގަވައިދުން ފައިސާ ޖަމާ ނުވާ މައްސަލަ ބޮޑުވެފައިވާ އިރު މުވައްޒަފުންގެ މުސާރައިން ކަނޑާ ބައި ބަރާބަރަށް ކަނޑަމުންދާކަން ވަނީ ފާހަގަ ކުރެވިފަ އެވެ.
މޯލްޑިވްސް ރިޓަޔަރމަންޓް ޕެންޝަން ސްކީމް (އެމް.އާރް.ޕީ.އެސް) އަކީ ދިވެހިރާއްޖޭގެ ޕެންޝަނާ ބެހޭ ގާނޫނުގެ ދަށުން ތައާރަފު ކުރެވިފައިވާ ސްކީމެކެވެ.
މި ސްކީމްގެ މައިގަނޑު އަމާޒަކީ މަސައްކަތްތެރިން ވަޒީފާއަދާކުރާ މުއްދަތުގައި ފަހަށް ފައިސާ ރައްކާކޮށް ރިޓަޔަރމަންޓަށްފަހު ކަނޑައެޅޭ އާމްދަނީއެއް ލިބޭނެ މަގުފަހިކުރުމެވެ. ވަޒީފާދޭ ފަރާތުންނާއި ވަޒީފާއަދާކުރާ ފަރާތުން ޕެންޝަން ކޮންޓްރިބިއުޝަންގެ ގޮތުގައި ކޮންމެ މަހަކު ސްކީމަށް ދައްކަނީ މުވައްޒަފުގެ އަސާސީ މުސާރައިގެ %7 (ދެ ފަރާތުން ޖުމްލަ %14) އެވެ. މި ސްކީމުން ޕެންޝަންގެ ގޮތުގައި ލިބޭނެ މިންވަރު ބިނާވާނީ، ޕެންޝަން ލިބޭ އުމުރު ހަމަވާއިރު އެމީހެއްގެ ރިޓަޔަރމަންޓް ސޭވިންގްސްގެ ގޮތުގައި ޖަމާވެފައި ހުރި އަދަދެއްގެ މައްޗަށެވެ.
