ރަމަޟާން: އަހުގެ ތެރޭގައި މުސްލިމުން ބައްދަލު ކުރާ އެންމެ ބަރަކާތްތެރި މަސް

މުސްލިމުންގެ ބަރަކާތްތެރި ރަމަޟާން މަސް ފެށޭނީ، ހަނދު ފެންނަ ގޮތުގެ މައްޗަށް ބިނާކޮށް، ފެބްރުއަރީ މަހުގެ 18 ނުވަތަ 19 ވަނަ ދުވަހު އެވެ.

ޖުމްލަ 29 ނުވަތަ 30 ދުވަހުގެ މުއްދަތަށް ދެމިގެންދާ މި މަހުގައި، ރޯދަ ހިފާ މުސްލިމުން ފަތިހުން ފެށިގެން އިރުއޮއްސުމާ ހަމައަށް ކެއުމާއި ބުއިމުން ދުރުހެލިވާނެއެވެ. އެމީހަކު ހުރި ސަރަހައްދެއްގެ ގޮތުން، އާންމުގޮތެއްގައި ދުވާލަކު 12 ގަޑިއިރާއި 15 ގަޑިއިރާ ދެމެދުގެ ވަގުތަކަށް ރޯދަ ހިފަން ޖެހޭނެ އެވެ. މުސްލިމުން ގަބޫލުކުރާ ގޮތުގައި ރަމަޟާން މަހަކީ މީގެ 1،400 އަށްވުރެ ގިނަ އަހަރު ކުރިން ކީރިތި ރަސޫލާ މުޙައްމަދު ﷺ އަށް ކީރިތި ޤުރުއާނުގެ ފުރަތަމަ އާޔަތްތައް ބާވައިލެއްވުނު މައްސަރެވެ.

ރޯދަ ހިފުމަކީ "ތަޤުވާވެރިކަން" ނުވަތަ މާތްﷲ އަށް ބިރުވެތިވުން އިތުރުކުރުމުގެ މަގްސަދުގައި، ދުވާލުގެ ވަގުތުތަކުގައި ކެއުމާއި، ބުއިމާއި، ދުންފަތުގެ އިސްތިއުމާލުކުރުމާއި އަދި ޖިންސީ ގުޅުން ހިންގުމުން ދުރުހެލިވެ ހުރުމެވެ.

ކޮންމެ އަހަރަކު ރަމަޟާން މަސް ފެށޭ ތާރީޚު ތަފާތުވަނީ ކީއްވެ؟

އިސްލާމީ ކަލަންޑަރު ބިނާވެފައިވަނީ ހަނދުގެ މަސްތަކުގެ މައްޗަށް ކަމަށްވެފައި، ކޮންމެ މަހެއްގައި 29 ނުވަތަ 30 ދުވަސް ހިމެނޭތީ، ކޮންމެ އަހަރަކުވެސް ރަމަޟާން މަސް ފެށޭ ތާރީޚު 10 ނުވަތަ 12 ދުވަސް ކުރިއަށް ޖެހެ އެވެ.

ދުނިޔޭގެ އާބާދީގެ ގާތްގަނޑަކަށް 90 އިންސައްތަ މީހުން ދިރިއުޅޭ އުތުރު ބިތުގެ ގައުމުތަކުގައި، މި އަހަރު ރޯދައަށް ހުންނަންޖެހޭ ވަގުތު ކުޑަކޮށް ކުރުވާނެއެވެ. އަދި 2031 ވަނަ އަހަރާ ހަމައަށް މި ވަގުތު ދާނީ ކުރުވަމުންނެވެ. 2031 ވަނަ އަހަރު ރަމަޟާން މަސް ދިމާވާނީ އަހަރުގެ އެންމެ ދުވަސް ކުރުވާ "ވިންޓަރ ސޮލްސްޓިސް" ނުވަތަ ފިނި މޫސުމުގެ ދުވަސްވަރާ އެވެ.

ދުނިޔޭގެ ދެކުނު ބިތުގެ ގައުމުތަކުގައި ދިރިއުޅޭ މުސްލިމުން މި އަހަރު ރޯދައަށް ހުންނަންޖެހޭ ވަގުތު، މިދިޔަ އަހަރާ އަޅާބަލާއިރު އިތުރުވާނެ އެވެ.

ހަނދުގެ އަހަރެއް، އިރުގެ އަހަރަކަށް ވުރެ 11 ދުވަސް ކުރުވުމުގެ ސަބަބުން، 2030 ވަނަ އަހަރު ދެ ރަމަޟާން މަސް އަންނާނެ އެވެ. އެއީ އެ އަހަރުގެ ޖެނުއަރީ މަހުގެ 5 ވަނަ ދުވަހު ފެށޭ ރަމަޟާން މަހާއި، ޑިސެމްބަރު މަހުގެ 26 ވަނަ ދުވަހު ފެށޭ ރަމަޟާން މަހެވެ.

ދުނިޔޭގެ އެކި ކަންކޮޅުތަކުގައި ރޯދަ ހިފާ ވަގުތުތައް

ދުނިޔޭގެ އެކި ސަރަހައްދުތަކަށް ދުވާލުގެ ވަގުތު ދިގުމިނުގައި ތަފާތުތަކެއް ހުރެ އެވެ.

މިހާރު މިއީ އުތުރު ބިތުގެ ގައުމުތަކަށް ފިނި މޫސުން ކަމަށްވުމުން، އެ ސަރަހައްދުތަކުގައި ދިރިއުޅޭ މީހުން ރޯދައަށް ހުންނަންޖެހޭ ވަގުތު މި ރަމަޟާން މަހު ކުރުވާނެއެވެ. އެގޮތުން ފުރަތަމަ ދުވަހު ގާތްގަނޑަކަށް 12 ގަޑިއިރާއި 13 ގަޑިއިރާ ދެމެދުގެ ވަގުތަކަށް ރޯދަ ހިފަން ޖެހޭއިރު، މަސް ނިމެންދެން މި ވަގުތު ދާނީ އިތުރުވަމުންނެވެ.

ޗިލީ، ނިއުޒީލެންޑް އަދި ދެކުނު އެފްރިކާ ފަދަ ދެކުނު ބިތުގެ ގައުމުތަކުގައި ދިރިއުޅޭ މީހުން ރޯދައަށް ހުންނަންޖެހޭ ވަގުތު ދިގުވާނެ އެވެ. އެގޮތުން ފުރަތަމަ ދުވަހު 14 ގަޑިއިރާއި 15 ގަޑިއިރާ ދެމެދުގެ ވަގުތަކަށް ރޯދަ ހިފަން ޖެހޭނެ އެވެ. ނަމަވެސް، މަސް ނިމެންދެން އެ ސަރަހައްދުތަކުގައި ރޯދަ ހިފަންޖެހޭ ވަގުތު ދާނީ ކުރުވަމުންނެވެ.

ރަމަޟާން މަހުގެ ތަހުނިޔާ

މުސްލިމުންގެ އަޣުލަބިއްޔަތު އޮންނަ ގައުމުތަކުގައި ރަމަޟާން މަހުގެ ތަހުނިޔާ ބަދަލުކުރުމުގައި އެ ބަޔެއްގެ އަމިއްލަ ބަހުން ތަފާތު ބަސްތައް ބޭނުންކުރެ އެވެ.

މުސްލިމު ގައުމުތަކުގައި އެންމެ އާންމުކޮށް ބޭނުންކުރާ ތަހުނިޔާގެ ބަސްތަކަކީ "ރަމަޟާން މުބާރަކް" އަދި "ރަމަޟާން ކަރީމް" އެވެ. މީގެ މާނައަކީ ބަރަކާތްތެރި ނުވަތަ ދީލަތި މައްސަރަކަށް ތިބާ އަށް އެދެމޭ ބުނުމެވެ.