ވޭތުވެދިޔަ 2 އަހަރު 110 ބިލިއަން ރުފިޔާ ގެ ބަޖެޓެއް ހުސްވެއްޖެ, އަތޮޅުތެރޭގެ ރަށްރަށަށް ވީ އެއްވެސް ކަމެއް ނެތް: މޭޔަރު އާތިފް
ސަރުކާރުން ވޭތުވެދިޔަ ދެ އަހަރު ސަތޭކަ ދިހަ ބިލިއަން ރުފިޔާގެ ބަޖެޓެއް ހުސްކުރިނަމަވެސް އަތޮޅުތެރޭގެ ރަށްރަށުގެ އިޤްތިޞާދު ކުރިއަރުވަން ކުރެވުނު މަސައްކަތެއް ފެންނާކަށް ނެތް
އަތޮޅު ކައުންސިލްގެ ރައީސުންނާއި މޭޔަރުން ބޭއްވި ނޫސްވެރިންގެ ބައްދަލުވުމުގައި މޭޔަރު އާތިފް މެދުގައި
ވޭތުވެދިޔަ ދެ އަހަރު 110 ބިލިއަން ރުފިޔާ ގެ ބަޖެޓެއް ހުސްވެއްޖެ ކަމަށާއި، އަތޮޅުތެރޭގެ ރަށްރަށަށް ވީ އެއްވެސް ކަމެއް ނެތް ކަމަށް ކުޅުދުއްފުށި ސިޓީ މޭޔަރު މުހައްމަދު އާތިފް ވިދާޅުވެއްޖެ އެވެ.
ލާމަރުކަޒީ ނިޒާމް ފުނޑާލާ ކައުންސިލްތައް އަޅުވެތި ކުރުމަށް މި ސަރުކާރުން ރޭވިގެން ކުރަމުން އަންނަ މަސައްކަތާއި ގުޅިގެން ބޭއްވި ނޫސްވެރިންގެ ބައްދަލުވުމުގައި ކުޅުދުއްފުށީ ސިޓީ މޭޔަރު މުހައްމަދު އާތިފް ވަނީ ސަރުކާރުން ލާމަރުކަޒީ ނިޒާމަށް ގެންނަން މަސައްކަތް ކުރަމުންދާ ބަދަލުތަކާ ގުޅިގެން ބޮޑެތި ކަންބޮޑުވުންތަކެއް ފާޅުކޮށްފަ އެވެ. މޭޔަރު އާތިފް ވިދާޅުވީ މިއީ ހަމައެކަނި ލާމަރުކަޒީ ގާނޫނަށް ބަދަލު ގެންނަން މަސައްކަތް ކުރާ ކަމެއް ނޫން ކަމަށާއި، މުޅި ރާއްޖޭގެ ހިންގުމުގެ ނިޒާމު މަރުކަޒީކޮށް ބަދަލުކުރަމުން އެދާ ކަމަށެވެ.
މޭޔަރު އާތިފް ވަނީ އަތޮޅުތެރޭގެ ރައްޔިތުންގެ ވަރަށް ބޮޑު ކަންބޮޑުވުމަކަށް މިކަން ވެފައިވާ ކަމަށް ފާހަގަކުރައްވާފަ އެވެ. އެގޮތުން އެއް ސަރަޙައްދަކަށް އާބާދީ ޖަމާވާންޖެހޭ ގޮތަށް ރާއްޖޭގެ ކަންކަން ތަރުތީބު ކުރަމުންދާ ކަމަށާއި، މިއީ އަތޮޅުތެރޭގެ ރައްޔިތުންނަށް ބޮޑު ގެއްލުމެއް ލިބޭނެ ކަމެއް ކަމަށް އޭނާ ވިދާޅުވި އެވެ.
ވޭތުވެދިޔަ ދެ އަހަރު ސަތޭކަ ދިހަ ބިލިއަން ރުފިޔާގެ ބަޖެޓެއް ހުސްވެއްޖެ ކަމަށާއި، އަތޮޅުތެރޭގެ ރަށްރަށަށް ވީ އެއްވެސް ކަމެއް ނެތް ކަމަށް މޭޔަރު އާތިފް ވިދާޅުވި އެވެ. އަތޮޅުތެރޭގެ ރަށްރަށުގެ އިޤްތިޞާދު ކުރިއަރުވަން ކުރެވުނު މަސައްކަތެއް ފެންނާކަށް ނެތް ކަމަށާއި، ޕީއެސްއައިޕީ ޕްރޮޖެކްޓަށް ބެއްޔަސް ކުރީގައި ފަށާފައި ހުރި މަޝްރޫޢުތައް ވެސް ހިނގަނީއެއް ނޫން ކަމަށް އޭނާ ފާހަގަކުރެއްވި އެވެ.
ވޭތުވެދިޔަ ދެ އަހަރު ސަތޭކަ ދިހަ ބިލިއަން ރުފިޔާގެ ބަޖެޓެއް ހުސްވެއްޖެ. އަޅުގަނޑުމެންގެ އަތޮޅުތެރޭގެ ރަށްރަށަށް ވީ އެއްވެސް ކަމެއް ނެތް. އަތޮޅުތެރޭގެ އެ ރަށްރަށުގެ އިޤްތިޞާދު ކުރިއަރުވަން ކުރެވުނު މަސައްކަތެއް. ފެންނާކަށް ނެތް. އަދި ޕީ.އެސް .އައި .ޕީ ޕްރޮޖެކްޓަށް ބެއްޔަސް ކުރީގައި ފަށާފައި ހުރި އެ މަޝްރޫޢުތައް ވެސް ހިނގަނީއެއް ނޫން. އަދި އަލަށް، މުޅިން އަލަށް އެއްވެސް މަޝްރޫޢެއް ނުގެންދެވި، ދެ އަހަރު އަޅުގަނޑުމެންގެ ރައްޔިތުންގެ ހަޔާތުން މިދިޔައީ އިސްރާފުވެގެން ނުވަތަ އަޅުގަނޑުމެންގެ އެއްވެސް ކުރިއެރުމެއް ނުލިބިދިޔަ ދެ އަހަރު މި ފެނިގެންދިޔައީ. ދާއިރުގައި ކައުންސިލުތަކުން އެ ކުރާ މުހިންމު މަސައްކަތްތައް ހުއްޓުވުމަށް މަސައްކަތްތަކެއް ކުރާ ތަން އޭގެއިތުރުން ފެނިގެން މި ދިޔައީ.ކުޅުދުއްފުށި ސިޓީ މޭޔަރު މުހައްމަދު އާތިފް
ކުޅުދުއްފުށީ ސިޓީ ކައުންސިލުން މިއަހަރުގެ ފެބުރުވަރީ މަހުގެ ހަތާވީހުގައި ކުޅުދުއްފުށީގައި ރިއަލް އެސްޓޭޓް ހައުސިންގ މަޝްރޫޢެއް ހިންގުމަށް ހުއްދައެއް އެދިފައިވާ ކަމަށް މޭޔަރު އާތިފް ވިދާޅުވި އެވެ. އެކަމަކު ފިނޭންސް މިނިސްޓްރީގެ ހުއްދަ ނަގަންޖެހޭ ކަމަށްވާތީ، އެލްޖީއެފް މެދުވެރިކޮށް ފޮނުވާފައި ފިނޭންސް މިނިސްޓްރީގައި އެ ހުއްދަ ދިނުން ތާށިވެފައި އޮންނަ ކަމަށް އޭނާ ފާހަގަކުރެއްވި އެވެ.
މޭޔަރު އާތިފް ވިދާޅުވީ ސަރުކާރަށް ވޭތުވެދިޔަ ދެ އަހަރު ކުޅުދުއްފުށީގައި އެއްވެސް މަޝްރޫޢެއް ނުކުރެވޭ ކަމަށެވެ. ޚާއްޞަކޮށް ކުޅުދުއްފުށީގައި އޮތް އެންމެ ބޮޑު މައްސަލަ ބޯހިޔާވަހިކަމުގެ މައްސަލަ ޙައްލު ކުރުމަށް އެއްވެސް މަސައްކަތެއް ނުކުރެވޭ ކަމަށް އޭނާ ވިދާޅުވި އެވެ. ނިމިދިޔަ ސަރުކާރުން ފަށާފައި ހުރި ހަތަރު ސަތޭކަ ހައުސިންގ ޔުނިޓު ވެސް ސަރުކާރު ބަދަލުވުމާއެކު އެ ހުރިގޮތަށް އެ ހުރި ކަމަށް އޭނާ ފާހަގަކުރެއްވި އެވެ.
މި ހާލަތުގައި ކައުންސިލުން އިންވެސްޓަރުން ހޯދައިގެން މަސައްކަތް ކުރަމުން އަންނަ ކަމަށް މޭޔަރު އާތިފް ވިދާޅުވި އެވެ. އިންވެސްޓަރުން ޝައުޤުވެރިކަން ފާޅުކޮށްފައި ވެސް ތިބި ކަމަށާއި، އެކްސްޕްރެޝަން އޮފް އިންޓްރެސްޓަށް ހުޅުވާލާއިރަށް މިހާރުވެސް އިންވެސްޓަރުން ކުރިމަތިލާން ތައްޔާރަށް ތިބި ކަމަށް އޭނާ ވިދާޅުވި އެވެ.
އެހެންނަމަވެސް، ކައުންސިލުން ހައުސިންގ މަޝްރޫޢެއް ކުރިއަށް ގެންގޮސްދާނެތީ މި ހުއްދަ ހިފަހައްޓައިގެން އުޅޭ ކަމަށް މޭޔަރު އާތިފް ތުހުމަތުކުރެއްވި އެވެ. މިއީ ކައުންސިލުތަކުގެ މަސައްކަތްތައް ހުއްޓުވުމަށް ކުރާ މަސައްކަތްތަކުގެ ބައެއް ކަމަށް އޭނާ ވިދާޅުވި އެވެ.
