ލޯކަލް ކައުންސިލް އިންތިހާބު ކެމްޕޭނަށް އެމްޑީޕީގެ ލީޑަރޝިޕް އަތޮޅު ތެރެއަށް
އެމްޑީޕީގެ ލީޑަރޝިޕުން ރ. ދުވާފަރަށް ކުރި ޒިޔާރަތުގައި، އެ ރަށުގެ ތަރައްގީގެ މަޝްރޫއުތައް ހުއްޓިފައިވާތީ ރައްޔިތުންގެ ކަންބޮޑުވުން ހުރިކަން ފާހަގަވި. އެމްޑީޕީގެ ޕީޖީ ލީޑަރު އިބްރާހިމް ނާޒިލް ވިދާޅުވީ، މި ސަރުކާރަށް ދެ އަހަރާއި ބައި ވެގެންދިޔައިރު ދުވާފަރުގައި މަޝްރޫއުތައް ހުއްޓިފައިހުރުމުން ރައްޔިތުން މިހާރު ތިބީ ސަރުކާރަށް "ނޫނެކޭ" ބުނަން ތައްޔާރަށް ކަމަށް.
އެމްޑީޕީގެ ކެމްޕެއިން ޓީމް ރ. ދުވާފަރަށް ކުރި ދަތުރުގެ ތެރެއިން | އެމްޑީޕީ
ކުރިއަށް އޮތް ލޯކަލް ކައުންސިލްގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ ކެމްޕޭނަށް އެމްޑިޕީގެ ލީޑަރޝިޕްގެ ބޭފުޅުން އަތޮޅު ތެރެއަށް ފުރާވަޑައިގެންފި އެވެ.
ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގެ ކެމްޕެއިން ބުރާސްފަތި ދުވަހުގެ ރޭ ލޯންޗުކުރުމަށްފަހު ހުކުރު ދުވަހު އަތޮޅުތެރެއަށް ކުރާ މިދަތުރުގައި އެމްޑީޕީގެ ޕީޖީ ލީޑަރު އިބްރާހިމް ނާޒިލްގެ އިތުރުން އެމްޑީޕީގެ ބައެއް އާންމު މެންބަރުން ވެސް ވަނީ ބައިވެރިވެ ވަޑައިގަންނަވާފަ އެވެ.
އެގޮތުން ހުކުރު ދުވަހު ހަވީރު ރ. ދުވާފަަރު ގައި ވަނީ ދޮރުން ދޮރަށް ކެމްޕެއިން ހަރަކާތެއް ބާއްވާފަ އެވެ. މި ހަރަކާތް ނިންމަވާލެއްވުމަށްފަހު ރާއްޖެ އެމްވީ އަށް ދެއްވި އިންޓާވިއުއެއްގައި އެމްޑީޕީ ޕީޖީ ލީޑަރު ނާޒިލް ވިދާޅުވީ، މިހަރަކާތުން އެންމެ ބޮޑަށް ފާހަގަވީ ރައީސް މުޢިއްޒު ހައްދަވާ ދޮގު ރައްޔިތުންނަށް ސާފުވެފައިވާ މިންވަރު ކަމަށާއި މިސަރުކާރަށް ދެ އަހަރާއިބައި ވެގެންދިޔައިރު ދުވާފަރުގެ ތަރައްގީއަށް ކޮށްދެވުނު އެއްވެސް ކަމެއް ނެތް ކަމަށެވެ.
ދެއަހަރާއި ބައިވެގެންދިޔައިރު މިރަށުގައި އެޅި ބިންގަލެއް ފެންނާކަށެއް ނެތް މިހާރު. އެހެންވީމަ ރައްޔިތުން ގަބޫލުކުރޭ އަބަދުވެސް އެމްޑީޕީ ސަރުކާރު އައިސްގެން ނޫންގޮތަކަށް މިރަށުގައި މަސައްކަތްތަކެއް ނުކުރެވޭނެ ކަން. މިރަށުގެ ރައްޔިތުންނަށް އުފާވެރި ދުވަސްތަކެއް ނުފެންނާނެކަން. އެހެންވީމަ މިރަށުގެ ރައްޔިތުން އެމްޑިޕީ ޓީމާއެކު ތިބިކަން ވަރަށް ބޮޑަށް ފާހަގަ ކުރެވުނު.އިބްރާހިމް ނާޒިލް
ނާޒިލް ވިދާޅުވީ ދުވާފަރުން އަދިވެސް ފެންނަނީ އެމްޑީޕީގެ ސަރުކާރުން ކޮށްފައިހުރި މަސައްކަތްތައް ކަމަށާއި 2 އަހަރުވެގެންދިޔައިރު ތަރައްގީގެ މަޝްރޫއުތައް ކުރިއަށް ނުގޮސް ހުއްޓިފައިވާތީ ދުވާފަރުގެ ރައްޔިތުން މިސަރުކާރަށް ނޫނެނެކޭ ބުނެފި ކަމަށެވެ.
