މާލޭ ގްރޭންޑްގެ އެއް ލިފްޓް ހަލާކުވެފައި ހުންނަތާ މަހެއް ވަނީ: ހައްލު ނުލިބި ވަނީ ސްޕެއާ ޕާޓްސް ނުލިބިގެން ކަމަށް އެޗްޑީސީ އިން ބުނޭ
17 ފެބުރުއަރީ 2026 | އަންގާރަ 02:17މާލޭ ގްރޭންޑްގެ ލިފްޓެއް ހަލާކުވެފައި ހުންނާތީ އާންމުންނަށް ބޮޑެތި ދަތިތަކަކާ ކުރިމަތިލާން ޖެހިފައިވާ އިރު، އަންގާރަ ދުވަހުގެ ނިޔަލަށް ލިފްޓް މަރާމާތުކޮށް ނިންމާލެވޭނެ ކަމަށް އެޗްޑީސީ އިން ބުނޭ.
މާލޭ ގްރޭންޑްގެ ހަލާކުވެފައިވާ ލިފްޓް | ރާއްޖެ އެމްވީ
މާލޭ ގްރޭންޑްގެ އެއް ފްޓް ހަލާކުވެފައި ހުންނަތާ މަހެއް ވާން ކައިރި ވެފައިވާ ކަން ހާމަވެއްޖެ އެވެ.
ރާއްޖެ ޓީވީ އަށް މައުލޫމާތު ދެމުން އެތަނުގައި ދިރިއުޅޭ ބައެއް އާއްމުން ބުނީ އެ ލިފްޓު ހަލާކުވީ ޖެނުއަރީ 24 ވަނަ ދުވަހު ކަމަށެވެ. އަދި ބައެއް އާއްމުން ވަނީ މީގެ ދޮޅު މަހެއްހާ ދުވަސް ކުރިން ވެސް އެ ލިފްޓުގެ މައްސަލަ ދިމާވި ކަމަށް ފާހަގަކޮށްފަ އެވެ. ލިފްޓް ހަލާކުވުމާއި ގުޅިގެން އެ ތަން ބަލަހައްޓާ ކުންފުނި، ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ވަނީ އެ ލިފްޓުގައި އިއުލާނެއް ހަރުކޮށްފަ އެވެ. ޖެނުއަރީ މަހު ފަހުކޮޅު ހަރުކޮށްފައިވާ އެ އިއުލާން ހަރު ކުރި ތާރީހު އެނގެން ނެތް އިރު ބައެއް އާއްމުން ވަނީ އެއީ އެޗްޑީސީ އިން އެ ލިފްޓް ހަލާކުވެފައި ހުރި މުއްދަތު އެނގިޔަ ނުދިނުމަށްޓަކާ ކޮށްފައިވާ ކަމެއް ކަމަށް ތުހުމަތުކޮށްފަ އެވެ.
މި ނޫހާއި ވާހަކަދެއްކި އާއްމު މީހަކު ބުނީ މީގެ ކުރިން ވެސް އެ ލިފްޓް ހަލާކުވެފައި ހުރެގެން އެކަމާއި މެދު އެޗްޑީސީ އާއި ތަކުރާރުކޮށް ސުވާލު ކުރި ނަމަވެސް އެ މައްސަލަ ހައްލުވާނީ ކޮން އިރަކުން ކަން ސާފުކޮށް އެޗްޑީސީ އަށް ބުނެދެވިފައި ނުވާ ކަމަށެވެ. އަދި ސްޕެއާ ޕާޓްސް ނުލިބިގެން މައްސަލަ ހައްލު ނުކުރެވިވާ ކަމަށް އެޗްޑީސީ އިން ވަނީ މާލޭ ގްރޭންޑްގައި ދިރިއުޅޭ މީހުންނަށް އަންގާފަ އެވެ.
"މި މައްސަލަ ދިމާވެގެން ތަކުރާރުކޮށް ޝަކުވާ ކުރިން. އެންމެ ލިފްޓަކުން އެތައް ބަޔަކު ފައިބާ އަރާ އުޅެން ޖެހުމަކީ ބޮޑު ތަކުލީފެއް. ޚާއްސަކޮށް ސްކޫލް ގަޑިތަކާއި ދިމާކޮށް އުޅެން ޖެހެނީ ވަރަށް ދަތި ހާލަތުގައި." އާއްމު މީހަކު ވަނީ ބުނެފަ އެވެ.
އެޗްޑީސީ އިން ރާއްޖެއެމްވީ އަށް މައުލޫމާތު ދެމުން ބުނީ މިހާރު އެ ލިފްޓް ރަނގަޅުކުރުމަށް ބޭނުންވާ ސްޕެއާ ޕާޓްސް ލިބިފައިވާ ކަމަށެވެ. އަދި އަންގާރަ ދުވަހު އެ ލިފްޓް ރަނގަޅު ކުރާނެ ކަމަށް އެޗްޑީސީ އިން ވަނީ ބުނެފަ އެވެ. މިހާ ދުވަހު އެތަން ރަނގަޅު ނުކުރެވިފައި ވަނީ އެ މައްސަލަ ހައްލުކުރަން ބޭނުންވާ ބައެއް ތަކެތި ރާއްޖެ އިން ބޭރުން ނުގެނެވިގެންކަމަސް ވެސް އެޗްޑީސީ އިން ވަނީ ބުނެފަ އެވެ.
