ލޭންޑް ޔޫޒް ޕްލޭނަށް ބަދަލުގެނައި ނަމަވެސް ކޯޓު މެދުވެރި ނުވެ އެގްރީމެންޓަށް ބަދަލު ގެނެވޭނެ ޖާގަ އެއް ނެތް: ހުޅުމާލެ ފޭސް 3 ޔޫނިއަން
ގެޒެޓުގައި ޝާއިޢުކޮށްފައިވާ އިއުލާނެއްގައި ހުޅުމާލެ ފޭސް 3 ގެ ލޭންޑް ޔޫޒް ޕްލޭނަށް ބަދަލު ގެނެސް ކުރިން ދޫކޮށްފައިވާ ބަންޑާރަގޯތީގެ ރަޖިސްޓްރީ ބާތިލްކޮށްފައިވާ ކަމަށް ބުނެފައިވޭ. މި ގޮތަށް ރަޖިސްޓްރީ ބާތިލްކުރުމަކީ ޤާނޫނީ އެކަށީގެންވާ ސަބަބެއް ނެތި ކުރާ ކަމެއް ކަމަށާއި ލޭންޑް ޔޫޒް ޕްލޭނަށް ބަދަލު ގެންނަ ކޮންމެ ފަހަރަކު ސަރުކާރުން ނާޖާއިޒް މަންފާތަކެއް ނަގާ ކަމަށް ފޭސް 3 ޔޫނިއަނުގެ ވަކީލު އަލީ ހުސައިން ވަނީ ތުހުމަތުކުރައްވާފަ.
ހުޅުމާލެ ފޭސް 3 ޔޫނިއަންގެ ނޫސްވެރިންގެ ބައްދަލުވުމުގެ ތެރެއިން | ރާއްޖެ އެމްވީ
ހުޅުމާލެ ފޭސް 3 ގެ ލޭންޑް ޔޫޒް ޕްލޭނަށް ބަދަލުގެނައި ނަމަވެސް ކޯޓު މެދުވެރި ނުވެ އެގްރީމެންޓަށް ބަދަލު ގެނެވޭނެ ޖާގަ އެއް ނެތް ކަަމަށް ހުޅުމާލެ ފޭސް 3 ޔޫނިއަން އިން ބުނެފި އެވެ.
ގެޒެޓުގައި ޖެނުއަރީ 27 ވަނަ ދުވަހު ޝާއިއުކޮށްފައިވާ އިއުލާނެއްގައި ބުނެފައި ވަނީ ހުޅުމާލެ ފޭސް 3 ގެ ލޭންޑް ޔޫޒް ޕްލޭނަށް ގެނައި ބަދަލަކާއި ގުޅިގެން ހުޅުމާލެ ފޭސް 3 އިން ހަދާފައިވާ ރެޖިސްޓްރީތައް ބާތިލް ކުރަން ނިންމި ކަމަށް ބުނެފަ އެވެ. ހައުސިން މިނިސްޓްރީގެ 19 ޑިސެންބަރު 2025 ގެ އިޢުލާނާ އެކު ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާ "ހުޅުމާލެ ތިން ވަނަ ފިޔަވަހީގެ އައު ލޭންޑް ޔޫސް ޕްލޭން" ގެ ދަށުން ހުޅުމާލެ ތިން ވަނަ ފިޔަވަހީގެ ލޭންޑް ޔޫސް ޕްލޭންއަށް ގެނެވުނު ބަދަލާ ގުޅިގެން، ކުރިން ބިންވެރިޔާ ސްކީމުގެ ދަށުން ހުޅުމާލެ ތިން ވަނަ ފިޔަވަހިން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން ވަނީ ބަދަލުވެފަ ކަމަށް ވެސް މިނިސްޓްރީ އިން ވަނީ ބުނެފަ އެވެ.
އެ ބަދަލާ ގުޅިގެން، ގޯތި ލިބޭ ފަރާތްތަކަށް ކުރިން ދޫކޮށްފައިވާ "ބަންޑާރަ ގޯތީގެ ރަޖިސްޓްރީ" ބާޠިލުކޮށް، އައު ބަންޑާރަގޯތީގެ ރަޖިސްޓަރީ ދޫކުރުމަށް ވަނީ ހަމަޖެހިފަ ކަމަށް މިނިސްޓްރީ އިން ވަނީ ބުނެފަ އެވެ. އަދި މިހާތަނަށް ގޯތީގެ ރަޖިސްޓަރީ ޙަވާލުކޮށްފައި ނުވާ ފަރާތްތަކަށް ގޯތީގެ ރަޖިސްޓަރީ ހަވާލުކުރުމާއި ގޯތި ޙަވާލުކުރުމުގެ އެއްބަސްވުމުގެ ސޮއިކުރުމަށް ވެސް ހަމަޖެހިފައިވާކަމުގައި އެ އިއުލާންގައި ވަނީ ބުނެފަ އެވެ.
އެކަމާއި ގުޅޭގޮތުން ވާހަކަދައްކަވަމުން ހުޅުމާލެ ފޭސް 3 ޔޫނިއަންގެ ޤާނޫނީ ވަކީލް އަލީ ހުސައިން ވިދާޅުވީ ކޮންމެ ސަރުކާރަކުން ރަޖިސްޓްރީގެ އެއްބަސްވުން ދިނަސް ދައުލަތުގެ ނިޝާން ޖަހާ ސިއްކަ ޖަހާފައިވާ ރަޖިސްޓްރީ އަކީ ދައުލަތް ހިންގާ ސަރުކާރު ބަދަލުވީމަ ބޭނުންހާ ގޮތަކަށް ބަދަލު ކުރެވޭނެ އެއްޗެއް ނޫން ކަމަށެވެ. އަދި އެކަމަށް ޤާނޫނީ އެކަށީގެންވާ ސަބަބެއް އޮންނަން ޖެހޭނެ ކަމަށާއި މި ވަގުތު މިނިސްޓްރީ އިން ބުނާ ހާލަތަކީ އެފަދަ ހާލަތެއް ނޫން ކަަމަށް އޭނާ ވިދާޅުވި އެވެ.
މީގެ އިތުރުން ލޭންޑް ޔޫޒް ޕްލޭނަށް ބަދަލު ގެންނަނީ ކަމަށް ބުނެ އެކަމުގެ ފަހަތުގައި ފޮރުވިފައިވާ އެހެން ކަންތައްތަކެއް ހުރި ކަމަށް ވެސް އަލީ ހުސައިން ވަނީ ވިދާޅުވެފަ އެވެ. އެގޮތުން މި ވެރިކަމުގައި ލޭންޑް ޔޫޒް ޕްލޭނަށް ބަދަލެއް ގެންނަ ކޮންމެ ފަހަރަކު ނާޖާއިޒް މަންފާތަކެއް ނަގާ ކަމަށް އޭނާ ވަނީ ވިދާޅުވެފަ އެވެ.
"މި ކަމުގެ ފަހަތުގައި ސަރުކާރުން ބިން ވިއްކާކަމަށް ވާނަމަ އޭސީސީ އިން ސަމާލުވާން ޖެހޭ. އެކަން ކުރަނީ ބިޑަށް ހުޅުވާލައިގެންތޯ ނޫންތޯ އެބަ ސަމާލުވާން ޖެހޭ. އެކަމަށް އޭސީސީ އިން ބަލަން ޖެހޭ،" އަލީ ހުސައިން ވިދާޅުވި އެވެ.
އެތައް ފަހަރަކު ރަށްރަށުގައި ވެސް ލޭންޑްޔޫޒް ޕްލޭން ބަދަލު ކުރާ ކަމަށާއި އެ ބަދަލު ގެންނަ ކޮންމެ ފަހަރަކު ގޯތީގެ ރަޖިސްޓްރީ ބާތިލް ނުކުރާ ކަން އަލީ ހުސައިން ވަނީ ފާހަގަކުރައްވާފަ އެވެ. މީގެ އިތުރުން މި ސަރުކާރުން ކުރިން ގުޅީފަޅުގެ ރަޖިސްޓްރީ ވެސް ބާތިލް ކުރަން މަސައްކަތް ކުރި ކަމަށް އޭނާ ވިދާޅުވި އެވެ. ނަމަވެސް ފަހުން އެ ރަޖިސްޓްރީ ބާތިލް ނުކުރާ ގޮތަށް ނިންމީ ސަރުކާރަށް އާއްމުންގެ ޕްރެޝަރ ބޮޑުވުމުން ކަމަށް އޭނާ ވަނީ ފާހަގަކޮށްފަ އެވެ.
