ހުޅުމާލެ ފޭސް ތިނަކުން ގޯތި ލިބުނު މީހުންނަށް ރަޖިސްޓްރީ ހަވާލުކުރަން ގެންދިޔައީ ކަރަންޓު ނެތް، ކުރީގެ ހައުސިންގ މިނިސްޓްރީއަށް
އެޕޮއިންޓްމަންޓް ދީފައިވާ ގަޑިއަށް މީހުން ހާޒިރުވިއިރު، ކަރަންޓު ނެތް އިމާރާތެއްގައި އެއްވެސް އިންތިޒާމެއް ނެތި ގިނަ ވަގުތު މަޑުކުރަން ޖެހުމުގެ އިތުރުން، ޚިދުމަތް ދިނުމުގައި ބޮޑެތި ލަސްތަކެއް ހުރިކަން އާންމުން ފާހަގަކުރެ. މިކަމާ ގުޅިގެން އާންމު ރައްޔިތުންގެ ކަންބޮޑުވުން ފާޅުކޮށް ބުނީ ޚިދުމަތް ދިނުމުގައި އެކަށީގެންވާ ތައްޔާރީތަކެއް ވެފައި ނެތް ކަމަށް.
ހުޅުމާލެ ފޭސް ތިނަކުން ގޯތި ލިބުނު މީހުންނަށް ރަޖިސްޓްރީ ހަވާލުކުރުން | ރާއްޖެ އެމްވީ
ކުރީ ސަރުކާރުގެ ބިންވެރިޔާ ސްކީމުގެ ދަށުން، ހުޅުމާލެ ފޭސް ތިނަކުން ގޯތި ލިބިފައިވާ މީހުންނަށް ރަޖިސްޓްރީ ހަވާލުކުރަން ކަރަންޓް ނެތް ކުރީގެ ހައުސިންގ މިނިސްޓްރީ އަށް މީހުން އެއްކޮށްފި އެވެ.
ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި ރަޖިސްޓްރީ ހަވާލުކުރަން މީހުންނަށް އެޕޮއިންޓްމަންޓް ދީފައިވަނީ ހޮނިހިރު ދުވަހު ހެނދުނު 9 އިން ފެށިގެންނެވެ. އެވަގުތު އެތަނުގައި ހުރި މީހަކު ކިޔައިދިން ގޮތުގައި ހެނދުނު 10 ޖެހުމާއި ހަމައަށް ވެސް އެތަނުން އެ މިނިސްޓްރިގެ އެއްވެސް ބޭފުޅަކު ފެނިފައެއްނުވެ އެވެ. 10 ޖެހިފަހުން ސައިކަލެއްގައި އައި މީހަކު އެ އިމާރާތުގައި ކަރަންޓު ނެތުމުން މިހާރު ހައުސިންގ މިނިސްޓްރީ ހިންގަމުންދާ ދަރުބާރުގެ އަށް ދިއުމަށް ބުނިކަމަށް އޭނާ ބުންޏެވެ.
އޭނާ ބުނީ އެޕޮއިންޓްމަންޓް ހަމަޖެހިފައިވާ ގަޑިއަށް ދިއުމަށް ސަމާލުވާން އެމިނިސްޓްރީން އެދިފައިވާ ކަމަށާއި އެހެން ނަމަވެސް ގަޑިއެއްގެ އިރުވެގެން ދިޔައިރު އިށިއިނދެލާނެ ގޮނޑިއެއްވެސް ޖަހާފައި ނެތް ކަމަށެވެ. އަދި އެއްވެސް ކަހަލަ އިންތިޒާމެއް ނެތްކަން ވެސް އޭނާ ފާހަގަ ކުރިއެވެ. އޭގެ އިތުރުން އެހާއިރުފަހުން އަދި އެތަނުގައި މީހުން ތޮއްޖެހުނުފަހުން ހިދުމަތް ދޭންފެށި އެންމެ ކައުންޓަރަކުން ކަމަށް އޭނާ ކިޔައިދިނެވެ.
މީގެ އިތުރުން ގޯތި ލިބުނު މީހުންނަށް ރަޖިސްޓްރި ހަވާލުކުރަން އެޕޮއިންމަންޓް ދިނުމަށް ފަހު ހައުސިންގ މިނިސްޓްރީ އިން ފޮނުވި މެސެޖުގައި ވާގޮތުން، އެޕޮއިންމަންޓް ހަމަޖެހިފައިވާ ގަޑިއަށް ހާޒިރު ނުވެވޭނަމަ އަލުން އެޕޮއިންޓްމަންޓް ހެދޭނީ 24 ގަޑިއިރު ފަހުންނެވެ. އަދި އެޕޮއިންޓްމަންޓް ރިކުއެސްޓަށް އެދެވޭނީ ބޭނުންވާ ތާރީހުގެ 5 ދުވަސް ކުރިން ކަމަށް ވެސް އެމެސެޖުގައި ބުނެފައިވެ އެވެ.
ހުޅުމާލޭގެ ފޭސް ތިނެއްގެ ލޭންޑް ޔޫސް ޕްލޭނަށް ބަދަލު ގެނެސް، އައު ލޭންޑް ޔޫސް ޕްލޭނެއް ހަދާފައިވުމުން، އެ ޕްލޭނަށް ރިއާޔަތްކޮށް، ބިންވެރިޔާ ސްކީމްގެ ދަށުން އެ ތަނުން ގޯތި ލިބިފައިވާ މީހުންގެ ގޯތީގެ ސަރަހައްދަށް ބަދަލު އައިސްފައިވާތީ އައު ލޮޓް ނަންބަރެއް ކަނޑައަޅާ ދެވަނަ ފަހަރަށް ގުރުއަތު ނެގީ 20 ޑިސެމްބަރު 2025 ވަނަ އަހަރު އެވެ.
