278 މިލިއަން ރުފިޔާ ހަރަދުކޮށް ހިޔާގެ އަށް ޓަވަރުގެ ލިފްޓު މަސައްކަތް ނިންމައި ހުޅުވާލައިފި
ޗައިނާގެ ކުންފުންޏާ ހަވާލުކޮށްގެން ކުރިއަށްގެންދާ މި މަސައްކަތަށް 278 މިލިއަން ރުފިޔާ ހޭދަވާއިރު، އިންތިހާ އަށް ބޮޑު އަގުގައި ކަރަޕްޝަން އެކުލެވިގެން ހަވާލުކޮށްފައިވާ ކަމުގެ ތުހުމަތު ވަނީ އަމާޒުވެފަ. 2024 އޭޕްރީލްމަހުގައި ފެށި މަސައްކަތް އަހަރެއްގެ ތެރޭގައި ނިންމަން ބުނި ނަމަވެސް ދެ އަހަރުވާން ގާތްވަނިކޮށް ހުޅުވާލައިފި.
ހުޅުމާލެ ދެވަނަ ފިޔަވަހިގައި ހުންނަ ހިޔާ ޓަވަރުތައް | ދައުރު
ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާގެ އަށް ޓަވަރެއްގައި ލިފްޓު ބެހެއްޓުމުގެ މަސައްކަތް ނިންމައި އާންމުންނަށް ހުޅުވާލައިފި އެވެ.
ހިޔާގެ ކޮންމެ ޓަވަރެއްގައި އިތުރު ދެ ލިފްޓް ހަރުކުރުމުގެ މަސައްކަތް ކުރިއަށްދާ ގޮތް ހިއްސާކުރަމުން އެޗްޑީސީން ބުނީ މިހާތަނަށް އަށް ޓަވަރެއްގައި ލިފްޓް އިތުރު ކުރުމުގެ މަސައްކަތް ނިމިފައިވާ ކަމަށެވެ. އެއީ އެޗް1 އިން ފެށިގެން އެޗް8 އާ ހަމައަށެވެ.
ޗައިނާގެ ޝެންޔަންގް ޔުއާން އިންޓެލެކްޗުއަލް ގުރޫޕާއި ހަވާލުކޮށްގެން ކުރިއަށް ގެންދާ އެ މަޝްރޫއުއަށް 18 މިލިއަން ޑޮލަރު (278 މިލިއަން ރުފިޔާ) ހޭދަވާނެ ކަމަށް އެޗްޑީސީން މީގެ ކުރިން ވަނީ ވިދާޅުވެފަ އެވެ. މި މަސައްކަތުގެ ތެރެއިން 16 ޓަވަރުގައި 32 ލިފްޓް ހަރުކުރާއިރު، ލިފްޓަކަށް 550،000 އެމެރިކާ ޑޮލަރު 8.5 މިލިއަން ރުފިޔާ ހޭދަވާނެ އެވެ.
ހިޔާ ފްލެޓް ތަކުގައި ލިފްޓް ހަރުކުރުމުގެ މަސައްކަތް ހަވާލު ކޮށްފައިވަނީ އިންތިހާ އަށް ބޮޑު އަގުގައި އޭގައި ކަރަޕްޝަން އެކުލެވޭ ގޮތައް ކަމަށް އާންމުންގެ ތެރޭގައި ވާހަކަތައް ފެތުރިފައިވާއިރު، އޭރު އެޗްޑީސީގެ އެމްޑި އަކަށް ހުންނެވީ ގޯތިތަކުގެ މައްސަލައިގެ އިތުރުން އެޗްޑީސީގައި ހުންނަވާ، މަގާމުގެ ބޭނުންކޮށްގެން ވިޔަފާރިވެރިންގެ އަތުން ފައިސާ ނަގައިގެން އަމިއްލަ ފައިދާއަށް މަސައްކަތް ކުރުމުގެ ތުހުމަތު ވެސް ކުރެވިފައިވާ ފަޒުލް ރަޝީދު އެވެ.
ފާހަގަކޮށްލެވޭ ގޮތުގައި ހިޔާ ފްލެޓުގެ ކޮންމެ ޓަވަރެއްގައި އިތުރު ދެ ލިފްޓު ހަރުކުރުމުގެ އަމަލީ މަސައްކަތް ފެށީ 2024 ގެ އޭޕްރީލް މަހުގެ 18 ވަނަ ދުވަހު އެވެ. އެއް އަހަރު ދުވަސްތެރޭގައި ލިފްޓް ހަރުކުރުމުގެ މަސައްކަތްތައް ނިމޭނެ ކަމަށް އެޗްޑީސީން ބުނި ނަމަވެސް ހުޅުވުނީ 2 އަހަރުވާން ގާތްވެފައި ވަނިކޮށެވެ.
