ދިވެހިރާއްޖެ ހިމެނޭހެން ބަންގްލަދޭޝްގެ އާ ސަރުކާރު ހުވާކުރުމުގެ ރަސްމިއްޔާތަށް 13 ގައުމެއްގެ ވެރިންނަށް ދައުވަތު އަރުވައިފި

ތޯރިގު ރަހުމާން އިސްވެ ހުންނަވައި އެކުލަވާލާ ބަންގްލަދޭޝްގެ އާ ސަރުކާރު ހުވާކުރުމުގެ ރަސްމިއްޔާތުގައި ބައިވެރިވެވަޑައިގަތުމަށް، އިންތިގާލީ ސަރުކާރުގެ އިސް މުޝީރު މުހައްމަދު ޔޫނުސް ވަނީ ދިވެހިރާއްޖެ، ޗައިނާ، އިންޑިއާ އަދި ޕާކިސްތާނު ހިމެނޭހެން 13 ގައުމެއްގެ އިސްވެރިންނަށް ދައުވަތު އަރުވާފަ އެވެ. މިކަން ކަށަވަރުކޮށްދެމުން އިންތިގާލީ ސަރުކާރުގެ އިތުބާރު ހުރި އޮފިޝަލަކު ހޮނިހިރު ދުވަހުގެ ރޭ "ޕްރޮތޮމް އާލޯ" ނޫހަށް މައުލޫމާތު ދީފައިވެ އެވެ.

މި 13 ގައުމުގެ އިސްވެރިންނަށް ދައުވަތު ދިނުމަށް އިންތިގާލީ ސަރުކާރުން ނިންމާފައިވަނީ، ބަންގްލަދޭޝްގެ 13 ވަނަ އާންމު އިންތިޚާބު ކާމިޔާބުކުރި ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) ގެ ސިޔާސަތު ކަނޑައަޅާ އިސްވެރިންނާއެކު މަޝްވަރާކުރުމަށް ފަހުގައެވެ. ޚާރިޖީ ދާއިރާގެ މަސްދަރުތަކުން ބުނާ ގޮތުގައި މިހާތަނަށް ދައުވަތު އެރުވި ގައުމުތަކުގެ ތެރޭގައި ސައުދީ އަރަބިއްޔާ، ތުރުކީ، ޔުނައިޓެޑް އަރަބް އެމިރޭޓްސް، ގަތަރު، މެލޭޝިއާ، ބުރުނާއީ، އިންޑިއާ، ޕާކިސްތާނު، ޗައިނާ، ސްރީލަންކާ، ނޭޕާލް، ދިވެހިރާއްޖެ އަދި ބޫޓާން ހިމެނެ އެވެ.

އާ ކެބިނެޓް ހުވާކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އަންގާރަ ދުވަހުގެ މެންދުރުފަހު، އެ ގައުމުގެ ގާނޫނު ހަދާ މަޖިލިސް "ޖާތިޔާ ސަންގްސަދު ބަވަން" ގެ ސައުތު ޕްލާޒާގަ އެވެ. ފެބްރުއަރީ މަހުގެ 12 ވަނަ ދުވަހު ބޭއްވި 13 ވަނަ އާންމު އިންތިޚާބުގައި ބީއެންޕީ އިސްވެ އޮތް އިއްތިހާދުން ވަނީ މަޖިލީހުގެ ތިންބައިކުޅަ ދެބައި ގޮނޑި ކާމިޔާބުކޮށްފަ އެވެ. މިއީ 2024 ވަނަ އަހަރު ކުރީގެ ބޮޑުވަޒީރު ޝައިޚް ހަސީނާ މަގާމުން ދުރުކުރި ފަހުން ބަންގްލަދޭޝްގައި ބޭއްވި ފުރަތަމަ އިންތިޚާބެވެ.

އާ ކެބިނެޓް ހުވާކުރުމުގެ ރަސްމިއްޔާތު އަންގާރަ ދުވަހު ޑާކާގައި ބޭއްވުމަށް މިހާރު ވަނީ ތާވަލުކޮށްފަ އެވެ.