ކެންދޫގެ ބިން ހިއްކާނެ ކަމަށް ރައީސް މުއިއްޒު ވައުދުވެވަޑައިގެންނެވިއިރު، ހިއްކާނެ ބިމެއް ނެތް: މެންބަރު މައުރޫފް
މެންބަރު މައުރޫފް ވިދާޅުވީ ކެންދޫގެ ބަނދަރުގެ މަޝްރޫއު ހުއްޓިފައި އޮތުމަކީ ރައްޔިތުންގެ ބޮޑު ކަންބޮޑުވުމެއް ކަމަށް. ކުރީ ސަރުކާރުން ފެށި މަޝްރޫއުތައް ހުއްޓިފައިވާކަން ފާހަގަކުރައްވައި، އިންތިޚާބުތަކާ ދިމާކޮށް ސަރުކާރުން މަސައްކަތްތައް ދައްކާލުމަކީ ރައްޔިތުންނަށް އައު ކަމެއް ނޫން ކަމަށް އޭނާ ވިދާޅުވި. އަދި ބަނދަރުގެ ދަތިކަން ހައްލުކުރުން ފަދަ ރައްޔިތުންނަށް އެންމެ މުހިންމު ކަންކަން އަވަސްކުރުމަށް މެންބަރު މައުރޫފް ވަނީ ގޮވާލައްވާފައި.
ރާއްޖެޓީވީގެ ވައުދުނާމާ ޕްރޮގްރާމްގައި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވާހަކަ ދައްކަވަނީ | ރާއްޖެއެމްވީ
ބ.ކެންދޫގެ ބިން ހިއްކާނެ ކަމަށް ރައީސް ޑރ.މުހައްމަދު މުއިއްޒު ވައުދުވެވަޑައިގެންނެވިއިރު، ހިއްކާނެ ބިމެއް ނެތް ކަމަށާއި، ބޭނުންވަނީ އަވަހަށް ބަނދަރުގެ ދަތި ކަމަށް ހަލެއް ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.
ރާއްޖެޓީވީގެ ވައުދުނާމާ ޕްރޮގްރާމްގައި މެންބަރު މައުރޫފް ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އެރަށުގައި ތަރައްގީގެ ގިނަ މަޝްރޫއުތައް ކުރިއަށް ގެންދިޔަ ކަމަށާއި، ބައެއް މަސައްކަތްތައް ނިންމި ކަމަށެވެ. އަދި ވެރިކަން ބަދަލުވެެގެން ދިއުމާއެކު މަޝްރޫއުތައް ހުއްޓިފައިވާ ކަމަށް އޭނާ ވިދާޅުވި އެވެ.
ކެންދޫގެ ރައްޔިތުންނަށް މިއަދު ދިމާވާ ބޮޑު ދައްޗަކީ ބަނދަރުގެ މައްސަލަކަން ފާހަގަކުރައްވައި މެންބަރު މައުރޫފް ވިދާޅުވީ، އެ މަޝްރޫއު ބާރު ސްޕީޑްގައި ކުރިއަށް ގެންދަން ބޭނުންވާ ކަމަށާއި، ނަމަވެސް މަސައްކަތް ކުރިއަށް ނުދާ ކަމަށެވެ. މިއީ ވަރަށް ބޮޑު ކަންބޮޑުވުމެއް ކަމަށް އޭނާ ވިދާޅުވި އެވެ.
މީގެ އިތުރުން މައުރޫފް ވިދާޅުވީ އެންމެ ފަހުން ރައީސް މުއިއްޒު އެރަށަށް ކުރެއްވި ދަތުރުފުޅުގައި ގިނަ ވައުދުތަކެއް ވެވަޑައިގެންނެވި ކަމަށެވެ.
އެގޮތުން ކެންދޫގެ ބިން ހިއްކާނެ ކަމަށް ވައުދުވެވަޑައިގެންނެވިއިރު، އެއީ ރައްޔިތުން އެދުނު ކަމެއް ނޫން ކަމަށް މެންބަރު މައުރޫފް ވިދާޅުވި އެވެ. އަދި ވިދާޅުވީ ކެންދޫގައި ހިއްކާނެ ބިމެއް ވެސް ނެތް ކަމަށެވެ.
އެހެންނަމަވެސް ކެންދޫގެ ބިން ހިއްކާ ދެއްވާނެ ކަމަށާއި، ކެންދޫގެ މަގުތައް ހައްދަވާ ދެއްވާނެ ކަމަށާއި، ކެންދޫ މިސްކިތުގެ ހުއްޓިފައި ހުރި އެމްޑީޕީ ސަރުކާރުގައި ފަށާފައިވާ މިސްކިތެއް ހުއްޓިފައި ހުރި ވާހަކަ އެއް. މިސްކިތުގެ މަސައްކަތް ކުރިއަށް ގެންދަވާނެ ވާހަކައާއި ކެންދޫގެ ބޯހިޔާވަހިކަމުގެ މައްސަލަ ހައްލު ކޮށްދެއްވާނެ ކަމަށާއި، އަދި އެފްއާރްސީއެއް އަޅައި ދެއްވާނެ ކަަމަށާއި، ޕޮލިސް ސްޓޭޝަނެއް އަޅުއްވައި ދެއްވާނެ ކަމަށާއި، އަދި ހަމައެހެންމެ ކައުންސިލް އިމާރާތް އަޅުއްވައި ދެއްވާނެ ކަމަށް ވެސް ވައުދުވެވަޑައިގެންނެވި މިދެންނެވި ދަތުރުގައި. އަދި މިހުރިހާ ކަމެއް ކުރައްވާނެ ކަމަށް ވައުދުވެވަޑައިގެންނެވުމުގެ އިތުރުން ސަރުކާރުގެ ކޮންމެވެސް ކުންފުންޏެއް ލައްވާ ސޮއިކުރައްވާ އެނގޭތޯ. އަޅުގަނޑަށް ނޭނގޭ ސޮއިކުރަނީ ހުސްގަނޑެއްގައި ކަމެއް ނޫނީ އެއްބަސްވުމެއްގައި ކަމެއް ސޮއި ކުރައްވާ.ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު
މެންބަރު މައުރޫފް ވިދާޅުވީ ކުރިއަށް އޮތީ ލޯކަލް ކައުންސިލް އިންތިޚާބަށް ވުމާއެކު މިހާރު ބައެއް މަޝްރޫއުތައް ފިނިހަކަ ދުވެލީގައި މަޑުމަޑުން ކުރިއަށްދާ ކަމަށެވެ. އެމަންޒަރު ރައްޔިތުން މަޖިލީހުގެ އިންތިޚާބުގެ ކެންޕޭންގެ ތެރޭގައި ވެސް ރައްޔިތުންނަށް ފެނިފައިވާ ކަމަށް އޭނާ ވިދާޅުވި އެވެ. އަދި ވިދާޅުވީ މިހާރު ސަރުކާރުން އަމަލު ކުރާ ގޮތް ރައްޔިތުންނަށް އައު ނުވާނެ ކަމަށާއި، ވާނުވާ އެނގޭ ކަމަށެވެ.
ކެންދޫގެ ތަރައްގީގެ ގިނަ މަޝްރޫއުތައް ހުއްޓިފައިވާއިރު، އެރަށުގެ ބަނދަރު ތަރައްގީ ކުރުމަށް އެމްޓީސީސީއާ، 11 އޯގަސްޓް 2025 ގައި ވަނީ ހަވާލު ކޮށްފަ އެވެ. އެއީ 119.3 މިލިއަން ރުފިޔާގެ އަގަކަަށް، 450 ދުވަހުގެ ތެރޭގައި ނިންމާ ގޮތަށެވެ.
