ރައްޔިތުންނަށް އޮޅުވާލައިގެން ރެފަރެންޑަމްގެ ނަމުގައި މަޖިލީހުގެ ދައުރު ދިގުކޮށް، ރިޔާސީ އިންތިޚާބު ފަސް ކުރުމަށް ސަރުކާރުން ދަނީ މަސައްކަތް ކުރަމުން: މައުރޫފް

ރައްޔިތުންނަށް އޮޅުވާލައިގެން ރެފަރެންޑަމްގެ ނަމުގައި މަޖިލީހުގެ ދައުރު ދިގުކޮށް، ރިޔާސީ އިންތިޚާބު ފަސް ކުރުމަށް ސަރުކާރުން މަސައްކަތް ކުރަމުންދާ ކަމަށާއި އެ އަވައިގައި ޖެހިގެން ނުވާނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.

އޭނާ އެފަދައިން ވިދާޅުވީ އެމްޑީޕީ ހަރުގެ ޖަލްސާގައި ވާހަކަދައްކަވަމުންނެވެ. 

މައުރޫފް ވިދާޅުވީ ރިފަރެންޑަމްގެ ނަމުގައި ދިވެހީން ޤަބޫލު ކުރާ ޤާނޫނުއަސާސީ އާއި މުޅި ޑިމޮކްރަސީ އާއި މުޅި މި ނިޒާމް ފުނޑާލުމަށް ރައީސް މުއިއްޒު މަސައްކަތް ކުރައްވާ ކަަމަށެވެ. ދައުރު ކުރު ކުރުމަށް ރިފަރެންޑަމް ނަގާ ކަމަށް މަންޒަރު ދެއްކުމަށް ފަހު ފަހުން މަޖިލީސް މެދުވެރިކޮށް މަޖިލީހުގެ ދައުރު ދިގު ދަންމާލާ، ރިޔާސީ އިންތިޚާބު ފަސް ކުރުމުގެ ވިސްނުން ސަރުކާރުން ގެންގުޅެމުންދާ ކަމަށް އޭނާ ވިދާޅުވި އެވެ. އޭނާ ވިދާޅުވީ މިހާރު ސަރުކާރުން މަސައްކަތް ކުރަނީ ރެފަރެންޑަމް އެއްގެ ނަމުގައި މުޅި ނިޒާމް ގަޑުބަޑުކޮށްލުމަށް ކަމަށެވެ.

"ދައުުރު ކުރުކުރާށޭ ކިޔާފައި ހުވާކުރުން އަވަސް ކުރާނެ. މިހާރު އޮތް މަޖިލީހުގެ ދައުރު 6 މަސް ދުވަސް ކުރުކޮށްލަނީ އޭ ބުނާނެ. މިހެން ހެދީމަ ހީވަނީ ހަރަދު ކުޑަކުރަނީ އޭ. މި އަވައިގައި ޖެހިގެން ނުވާނެ .ފުށިދިއްގަރު ފަޅޭ އިންޑިއާ ސިފައިންނޭ ކިޔައިގެން މީގެ ކުރިން ވެސް މިކަހަލަ ދަޅަ އެއްގައި ދިވެހީން ޖެއްސި." އޭނާ ވިދާޅުވި އެވެ.

މިއީ ހައްތަހާވެސް، އިންތިޚާބުތައް އޮޅުވާލާ އެއްކޮށްލުމުގެ ވިސްނުމުގައި ކުރާ ކަންތައްތަކެއް ކަމަށް މައުރޫފް ވިދާޅުވި އެވެ. އެގޮތުން މަޖިލީހުގެ ދައުރު ކުރުކޮށްލާ ކަމަށް ދެއްކުމަށް ފަހު، ފަހުން ޤާނޫނު އަސާސީ އަށް މުޅިން އެއާއި އިދިކޮޅު އިސްލާހެއް ގެންނާނެ ކަމަށް މައުރޫފް ވިދާޅުވި އެވެ.

ސަރުކާރުގެ ވިސްނުމަކީ ޕީއެންސީގެ މެޖޯރިޓީ ބޭނުންކޮށްގެން ރައްޔިތުންގެ މަޖިލީސް މެދުވެރިކޮށް،  2030 އާއި ހަމަ އަށް ރިޔާސީ އިންތިޚާބު ފަސްކޮށްލާ، ވެރިކަމުގެ ދައުރު ދިގުދަންމާލާނެ ކަަމަށް މައުރޫފް ވިދާޅުވި އެވެ. އަދި އެ ބަދަލާއި އެކު އެކީގައި މަޖިލީހުގެ ދައުރު ވެސް އިތުރު 2 އަހަރަށް ދިގު ދަންމާލާނެ ކަމަށް އޭނާ ވަނީ ވިދާޅުވެފަ އެވެ. 

"މިއީ ކޮންސްޕިރަސީ ތިއަރީއެކޭ ހީވެދާނެ. ޤާނޫނުއަސާސީ އަސް އިސްލާހު ގެންނާނެ 3 އިންތިޚާބު އެއްކޮށްލަން. އެއީ ކައުންސިލް އިންތިޚާބާއި، ރިޔާސީ އިންތިޚާބާއި، މަޖިލިސް އިންތިޚާބު 2023ގައި އޮންނަނީ. ޤާނޫނު އަސާސީ އަށް ގެންނަ އިސްލާހެއް ރައީސް ތަސްދީގު ނުކުރެއްވީމަ ރިފަރެންޑަމް އަކަށް ދާ ގޮތަށް، ރިފަރަންޑަމްގެ ޤާނޫނު ބަދަލު ކުރާނެ. މާޗް 20ގެ ކުރިން ބަދަލު ކުރާނެ." އޭނާ ވިދާޅުވި އވެ. 

މީގެ އިތުރުން މައުރޫފް ވިދާޅުވީ މި ވަރުގެ ޚުދުމުހުތާރު ވެރިކަމަކުން މިފަދަ ކަމެއް ނުކުރާނެ ކަމަށް ހީކޮށްގެން ނުވާނެ ކަމަށެވެ. އަދި ރަނގަޅަށް ދިރާސާ އެއް ހަދައިފިއްޔާ މުޅި އޭޝިއާ ސަރަހައްދުގައި ވެސް ރައީސް ޑރ.މުއިއްޒު އަށް ވުރެ ދޮގު ހަދާ މީހެއް ވެރި އެއްގެ ގޮތުގައި ނެތް ކަމަށް މައުރޫފް ވިދާޅުވި އެވެ. އެކަމުން ސަލާމަތް ވޭތޯ ދިވެހީން ގިނަ ގިނައިން ދުއާ ކުރަން ޖެހޭ ކަމަށް އޭނާ ވަނީ ވިދާޅުވެފަ އެވެ.