ދިވެހި ރުފިޔާ އިން ސަރވިސް ޗާޖު ދިނުމުގައި ދިމާވާ މައްސަލަތަކަށް ހައްލު ގެނައުމަށް، ޤާނޫނަށް އިސްލާހެއް ހުށަހަޅައިފި

ދިވެހި ރުފިޔާ އިން ސަރވިސް ޗާޖު ދިނުމަށް ހައްލު ގެނައުމަށް ވަޒީފާ އާއި ބެހޭ ޤާނޫނަށް އިސްލާހެއް ހުށަހަޅައިފި އެވެ.

ކެންދޫ ދާއިރާގެ މެމްބަރު މައުރޫފް ޒާކިރު، ވަޒީފާ އާއި ބެހޭ ޤާނޫނަށް ހުށަހެޅުއްވި އިސްލާހުގައި ހިމަނާފައި ވަނީ ވަޒީފާ އާއި ބެހޭ ޤާނޫނުގެ 52 ވަނަ މާއްދާގެ 2 ވަނަ ނަމްބަރުގެ ފަހަތަށް އަކުރެއް އިތުރުކުރުމަށެވެ.

ޓޫރިޒަމް ހިދުމަތްދޭ ތަންތަނަށް އެމްއެމްއޭ އިން ޑޮލަރު މާރުކުރުން އެންމެ ފުރަތަމަ ލާޒިމުކުރީ ގަވާއިދަކުންނެވެ. ނަމަވެސް ފަހުން ވަނީ އެކަމާ ގުޅޭ ގާނޫނެއް ފާސްކުރުމަށްފަހު އެއަށް އަމަލުކުރަން ވަނީ ފަށާފަ އެވެ. އެއާއި އެކު ބައެއް ރިސޯޓްތަކުން ވަނީ ސަރވިސް ޗާޖު ޑޮލަރުން ދިނުން ހުއްޓާލާ ދިވެހި ރުފިޔާ އިން އެ ފައިސާ ދޭން ފަށާފަ އެވެ.

މި ބިލު ހުށަހެޅުމުގެ މަގްސަދަނީ ފަތުރުވެރިކަމުގެ ދައިރާގައި ހަރަކާތްތެރިވާ ވިޔަފާރިތަކުން ނަގާ ސަރވިސް ޗާޖު މުވައްޒަފުންގެ މެދުގައި ހަމަހަމަކަމާއި އެކު ބަހަން ވާނެ ކަމަށް ބުނި ނަމަވެސް ސަރވިސް ޗާޖު މާރުކޮށް ދިވެހި ރުފިޔާ އިން ފައިސާ ދެމުންދާތީ، ޤާނޫނުން ފަތުރުވެރިކަމުގެ ދާއިރާގެ މުވައްޒަފުންނަށް ކަށަވަރުކޮށްދީފައިވާ ސަރވިސް ޗާޖު ލިބޭކަން ކަށަވަރުކޮށްދިނުން ކަަމަށެވެ.

އެ ބިލުގައި ހިމަނާފައި ވަނީ ސަރވިސް ޗާޖުގެ ގޮތުގައި ނަގާ ފައިސާގެ ތެރެއިން މުވައްޒަފުންނަށް ބަހަން ޖެހޭ ފައިސާ ގެ ބާވަތް ބަދަލުކުރުމަށް ވަޒީފާ ދޭ ފަރާތުން އެ ފައިސާ ދިވެހި ފައިސާ އަށް މާރުކޮށްގެން ނުވާނެ ކަމަށް ބުނެފަ އެވެ. އަދި ސަރވިސް ޗާޖު ބެހުމުގައި މުވައްޒަފުންނަށް ދޭން ވާނީ ސަރވިސްޗާޖުގެ ގޮތުގައި އެ ފައިސާ ލިބުނު ބާވަތުން ކަމަށް ބުނެފައިވެ އެވެ.

މީގެ އިތުރުން ފަތުރުވެރިކަމުގެ ސިނާއަތުގައި ހިންގާ ވިޔަފާރިތަކުން ޚިދުމަތް ފޯރުކޮށްދިނުމުގައި މަސައްކަތްކުރާ މުވައްޒަފަކު ވަޒީފާ އަދާކުރަނީ ވަގުތީ އެއްބަސްވުމެއް ނުވަތަ ތިން ވަނަ ފަރާތެއްގެ މުވައްޒަފެއްގެ ގޮތުގައި ކަމަށް ވީ ނަމަވެސް، ފަތުރުވެރިންނަށް ދޭ ޚިދުމަތެއް ސީދާ ގޮތުން ފޯރުކޮށްދޭ ނަމަ އެފަދަ މުވައްޒަފުންނަށް ވެސް ސަރވިސް ޖާގު ދިނުމުގައި ތަފާތުކޮށްގެން ނުވާނެ ކަމަށް ވަނީ ބުނެފަ އެވެ.