ވެމްކޯ މުވައްޒަފުންގެ ޕެންޝަން ފައިސާ ފަންޑަށް އަދިވެސް ޖަމާ ނުވޭ
ވެމްކޯއިން އެންމެ ފަހުން ޕެންޝަނަށް ފައިސާ ދައްކާފައިވަނީ 2024 އޮކްޓޫބަރު 16 ގައި ކަމަށާއި އޭގެފަހުން 14 މަސް ވެސް ފައިސާ ދައްކާފައި ނުވާކަން އިންފޮމޭޝަން ކޮމިޝަނަރުގެ އޮފީހުން ހާމަކޮށްފައިވެ. ވެމްކޯއިން ބުނެފައިވަނީ 20 މިލިއަން ރުފިޔާ ޕެންޝަނަށް ޖަމާނުކުރެވެނީ ކޭޝް ފްލޯ ތާށިވުމާއި އެކި ފަރާތްތަކަށް ފައިސާ ނުދައްކާތީ ކަމަށް.
ވެމްކޯ ގެ މެނޭޖިންގ ޑިރެކްޓަރު މުޖުތަބާ ޖަލީލް | ރާއްޖެ އެމްވީ
ސަރުކާރު ހިއްސާވާ ކުންފުނި، ވޭސްޓް މެނޭޖުމެންޓު ކޯޕަރޭޝަން (ވެމްކޯ) މުވައްޒަފުންގެ ޕެންޝަން ފައިސާ ޕެންޝަން ފަންޑަށް އަދިވެސް ޖަމާ ނުވާކަން ހާމަވެއްޖެ އެވެ.
ވެމްކޯގައި މަސައްކަތް ކުރާ މުވައްޒަފުންގެ ޕެންޝަން ފައިސާ ފަންޑަށް ޖަމާނުވާކަން ހާމަވީ ރައީސް ޑރ. މުހައްމަދު މުޢިއްޒު ހުޅުމާލެ ފޭސް 1 ގެ ރައްޔިތުންނާ ބައްދަލުކުރައްވާ ބޭއްވި ބައްދަލުވުމުގައި އެ ކުންފުނީގެ މުވައްޒަފަކު އެވާހަކަ އެ ބައްދަލުވުމުގައި ދެއްކުމުންނެވެ.
ކުންފުނިތަކުން އެންމެ ފަހުން ޕެންޝަނަށް ފައިސާ ދެއްކި ތާރީޚުތަކާއި ދެއްކި ފައިސާގެ އަދަދު ހޯދުމަށް އެދުމުން އެ މައުލޫމާތު އިންފޮމޭޝަން ކޮމިޝަނަރުގެ އޮފީހުން ވަނީ ހިއްސާ ކޮށްފަ އެވެ.
އެ އޮފީހުން ހާމަ ކޮށްފައިވާ މައުލޫމާތުން އެނގޭ ގޮތުގައި ވެމްކޯ އިން އެންމެ ފަހުން ޕެންޝަނަށް ފައިސާ ދައްކާފައި ވަނީ މިދިއަ 2024 ވަނަ އަހަރުގެ އޮކްޓޫބަރު މަހުގެ 16 ވަނަ ދުވަހުގަ އެވެ. އޭގެ ފަހުން 14 މަސް ފާއިތުވި އިރު އެންމެ މަހަކު ވެސް އެ ކުންފުނިން ޕެންޝަނަށް ފައިސާ ދައްކާފަ އެއް ނުވެ އެވެ.
ވެމްކޯގެ މުވައްޒަފުންގެ ޕެންޝަން ފައިސާ ފަންޑަށް އަދިވެސް ޖަމާކޮށްފައި ނުވާތީ ރާއްޖެއެމްވީ އިން އެ ކުންފުނީގެ އެމްޑީ މުޖުތަބާ ޖަލީލަށް ގުޅުމުން ފޯނަށް ޖަވާބު ދެއްވާފައެއް ނުވެ އެވެ.
މިކަމާގުޅިގެން މީގެކުރިން ވެމްކޯ އިން މީގެ ކުރިން ބުނީ، ވެމްކޯގެ މުވައްޒަފުންގެ ރިޓަޔަމެންޓް ޕެންޝަނަށް ގަވާއިދުން ފައިސާ ޖަމާނުކުރެވެނީ، އެކި ފަރާތްތަކުން ހޯދާފައިވާ ހިދުމަތްތަކަށް ފައިސާ ނުދައްކާތީކަމަށެވެ. އަދި ކޭޝް ފްލޯ ތާށިވެފައިވާތީ، ވެމްކޯގެ މުވައްޒަފުންގެ ރިޓަޔަމެންޓް ޕެންޝަނަށް 20 މިލިއަން ރުފިޔާއަށް ވުރެ ބޮޑު އަދަދެއް ޖަމާނުކުރާކަން، މައުލޫމާތު ހޯދައި ލިބިގަތުމުގެ ހައްގުގެ ދަށުން އަމިއްލަ މީހަކަށް ދިން މައުލޫމާތުތަކުން ވަނީ ހާމަވެފަ އެވެ.
އެކަމާ ގުޅިގެން، ފޭސްބުކްގައި ވެމްކޯއިން އާންމުކުރި ބަޔާނެއްގައި ބުނީ، ކުންފުނީގެ ހިންގުމުގެ ހަރަދުތަކުގެ ތެރޭގައި މުވައްޒަފުންގެ މުސާރަ އާއި އެހެންނިހެން އިނާޔަތްތައް ދެމުން ގެންދަނީ، އެ ކުންފުންޏަށް ލިބޭ އާމްދަނީ އާއި ސަރުކާރުން ދޭ ސަބްސިޑީގެ ފައިސާއިން ކަމަށެވެ. ވެމްކޯއިން ބުނީ ފައިސާ ހޯދުމުގައި ފިނޭންސް މިނިސްޓްރީ އާއެކު ވެސް ދަނީ މަޝްވަރާތައް ކުރެވެމުން ކަމަށެވެ.
