ސަރުކާރުން ރިސޯޓުތަކެއް ތަރައްގީކޮށް ރައްޔިތުންގެ އެކައުންޓަށް ޑޮލަރު ވައްދާނެ ކަމަށް ރައީސް މުއިއްޒު ވައުދު ވެވަޑައިގެންފި
މި އިންވެސްޓްމަންޓުން ދިވެހި ރައްޔިތުންގެ އެކައުންޓަށް ފައިސާ ޖަމާވާން ފަށާނީ 2030 ވަނަ އަހަރުން ފެށިގެންކަން ފާހަގަކުރައްވައި ރައީސް މުއިއްޒު ވިދާޅުވީ މި މަޝްރޫއުގެ ދަށުން ތަރައްގީ ކުރާ ރިސޯޓުތަކުން ލިބޭ ފައިދާ ދިވެހި ރައްޔިތެއްގެ އައިޑީކާޑު އޮތް ކޮންމެ މީހަކަށް އަހަރުން އަހަރަށް ލިބޭ މާލީ މަންފާ ލިބޭނެ ކަަމަށް.
ވެލައްސަރު ރިސޯޓް. | ގެޓީ އިމޭޖަސް
ސަރުކާރުން ކުންފުންޏެއް ހަދައި ކުރިއަށް އޮތް 3 އަހަރުގެ ތެރޭގައި މަދުވެގެން 10 ރިސޯޓު ތަރައްގީކޮށް ދިވެހި ކޮންމެ ރައްޔިތެއްގެ އެކައުންޓަށް ބޭރު ފައިސާ ޖަމާ ކުރަން ފައްޓަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ބުރާސްފަތި ދުވަހު ރިޔާސީ ބަޔާން އިއްވަވަމުން ރައީސް މުއިއްޒު ވިދާޅުވީ ރާއްޖޭގައި ފަތުރުވެރިކަމުގެ ސިނާއަތު ރަސްމީކޮށް ފެށިގެން އައީ މީގެ 54 އަހަރު ކުރިން ކަމަށާއި، އެއީ 1972 ވަނަ އަހަރު ކަމަށެވެ. ނަމަވެސް މި ސިނާއަތަށް ބައިގަރުނަށްވުރެ ގިނަ ދުވަސްވީއިރު ވެސް މި ދާއިރާއިން ދިވެހި ހުރިހާ ރައްޔިތުންގެ ޖީބަށް ސީދާ ގޮތެއްގައި އެންމެ ލާރިއެއް ވެސް ލިބޭނެ އެއްވެސް މަގެއް އެއްވެސް ސަރުކާރަކުން ފަހިކޮށް ދީފައި ނުވާ ކަމަށް އެމަނިކުފާނު ވިދާޅުވި އެވެ.
މި ސިނާއަތަކީ ރާއްޖޭގެ އިގްތިސާދުގައި އެންމެ ބޮޑު ދައުރެއް އަދާ ކުރާ ސިނާއަތްކަން ފާހަގަކުރައްވައި ރައީސް މުއިއްޒު ވިދާޅުވީ މިއީ ރާއްޖޭގެ ގުދުރަތީ ރީތިކަން ކަމުގައިވާ ރީތި ގޮނޑުދޮށްތަކާ ފަޅުތަކާ ފަރުތަކާ ރަށްތައް ގުދުރަތީ އެސެޓްތައް ދިގު މުއްދަތަކަށް އެންމެ ބޮޑަށް ބޭނުން ކުރަމުންދާ އަދި މަދު ހާލަތެއްގައި މެނުވީ އިޔާދަ ނުކުރެވޭ ވަރުގެ ބޮޑެތި ބަދަލުތަކެއް އެސެޓްތަކަށް ގެނެސްފައިވާ އަދި ގެންނަމުންދާ ސިނާއަތް ކަމަށެވެ.
އެހެންކަމުން މި ގުދުރަތީ އެސެޓްތަކުގެ ހަގީގީ ވެރިން ކަމުގައިވާ ދިވެހި ހުރިހާ ލޮބުވެތި ރައްޔިތުންނަށް ސީދާ އާމްދަނީއެއް ލިބޭނެ މަގެއް ނިޒާމީ ގޮތެއްގައި ހަމަޖެހިގެން ދިއުމަކީ އެންމެ އަދުލުވެރި ގޮތް ކަމަށް ރައީސް މުއިއްޒު ވިދާޅުވި އެވެ. އަދި ވިދާޅުވީ ކުރިއަށް އޮތް 3 އަހަރުގެ ތެރޭގައި މަދުވެގެން 10 ރިސޯޓު ރާއްޖޭގައި ތަރައްގީ ކުރާނެ ކަމަށެވެ.
މިކަމާ މެދު ކެބިނެޓްގައި މަޝްވަރާކޮށް ސަރުކާރުން މިހާރު ނިންމާފައިވަނީ ސަރުކާރުގެ ކުންފުންޏެއް މެދުވެރިކޮށް ކުރިއަށް އޮތް ތިން އަހަރު ދުވަހުގެ ތެރޭގައި މަދުވެގެން 10 ރިސޯޓު ތަރައްގީ ކޮށް އެރިސޯޓުތަކުން ފައިދާ ގޮތުގައި ލިބޭ ބޮޑު ބައެއް ހަމަ އެއްވެސް ރައްޔިތެއް ބާކީ ނުކޮށް ރާއްޖޭގެ ކޮންމެ ރައްޔިތެއްގެ ބޭންކް އެކައުންޓަށް ހަމަހަމަ ކަމާއެކު އަހަރަކު އެއްފަހަރު ބޭރު ފައިސާއިން ޖަމާކޮށް ދޭނަން. އަދި ދިވެހި ރާއްޖޭގެ ކޮންމެ ރައްޔިތަކީ މި މަޝްރޫއުގެ ދަށުން ތަރައްގީ ކުރެވޭ ހުރިހާ ރިސޯޓެއްގެ ހިއްސާދާރެއް ކަމުގައި ހަމަހަމަ ކަމާއެކު ގާނޫނަކުން ކަނޑައަޅާ ހަމަޖައްސާނަން.ރައީސް ޑރ. މުހައްމަދު މުއިއްޒު
މި އިންވެސްޓްމަންޓުން ދިވެހި ރައްޔިތުންގެ އެކައުންޓަށް ފައިސާ ޖަމާވާން ފަށާނީ 2030 ވަނަ އަހަރުން ފެށިގެންކަން ފާހަގަކުރައްވައި ރައީސް މުއިއްޒު ވިދާޅުވީ މި މަޝްރޫއުގެ ދަށުން ތަރައްގީ ކުރާ ރިސޯޓުތަކުން ލިބޭ ފައިދާ ދިވެހި ރައްޔިތެއްގެ އައިޑީކާޑު އޮތް ކޮންމެ މީހަކަށް އަހަރުން އަހަރަށް ލިބޭ މާލީ މަންފާ ލިބޭނެ ކަަމަށެވެ.
އަންދާޒާ ކުރެވެނީ މި އިވެސްޓްމަންޓު ދިވެހި ރައްޔިތުންގެ އެކައުންޓަށް ފައިސާ ޖަމާވާން ފަށާނީ 2030 ވަނަ އަހަރުން ފެށިގެން ކަމަށް. ހިސާބު ހާދާލާއިރު އެވްރެޖްކޮށް ކޮންމެ ރައްޔިތެއްގެ އެކައުންޓަށް އިރާދަކުރެއްވިއްޔާ އަހަރަކު މަދުވެގެން 400 ޑޮލަރު ޖަމާވަގެންދާނެ. މިސާލަކަށް 5 މެންބަރުންގެ އާއިލާއެއް ނަމަ، އެ އާއިލާގެ ކޮންމެ މެންބަރެއް މަދުވެގެން 10 ރިސޯޓުގެ ޝެއަރ ހޯލްޑަރަކަށް ވުމުގެ އިތުރުން އެއާއިލާއަކަށް އަހަރަކު މަދުވެގެން އިރާދަކުރެއްވިއްޔާ 2000 އެމެރިކާ ޑޮލަރު ލިބިގެންދާނެ. މިކަން ހަގީގަތަކަށް ހެދުމަށް ކުރަން ޖެހޭ ކަންކަން ވަރަށް ހަލުހި ކަމާއެކު އިރާދަކުރެއްވިއްޔާ ކުރިއަށް ގެންދާނަން.ރައީސް ޑރ. މުހައްމަދު މުއިއްޒު
ރާއްޖޭގެ އިގްތިސާދުގެ މައި ތަނބު ކަމަށްވާ، ފަތުރުވެރިކަމުގެ ސިނާއަތަށް މީގެ ކުރިން ސަރުކާރުން ވަނުމަށް މަސައްކަތް ކޮށްފައިނުވެ އެވެ. މި ސިނާއަތަށް އިންވެސްޓްކޮށްގެން ވިޔަފަރި ހިންގަމުންދަނީ އަމިއްލަ ވިޔަފާރިވެރިންނެވެ.
