ދިގުރަށު ގޮނޑުދޮށުން ނަޖިސް ބޭރުވީ ނަރުދަމާ ހޮޅިއެއް ފަޅައިގެން ދިއުމުން، އެކަން އެދުވަހު ހައްލު ކުރި: ކައުންސިލް
އދ. ދިގުރަށުގެ ފަތުރުވެރިންނަށް ހާއްސަ ސަރަހައްދެއްގައި ނަޖިސް ބޭރުވާ މަންޒަރު ދައްކުވައިދޭ ވީޑިއޯއެއް ވައިރަލް ވެ މިލިއަނަކަށް ވުރެ ގިނަ ވިއުސް ލިބިފައިވޭ. މި ހާދިސާ ހިނގީ ނަރުދަމާ ހޮޅިއެއް ފަޅައިގެން ދިއުމުން ކަމަށާއި އެ ދުވަހު އެކަން ހައްލު ކޮށްފައިވާ ކަމަށް އެ ރަށު ކައުންސިލް ރައީސް ވިދާޅުވި. އެކަމަކު ވީޑިއޯ ވައިރަލް ވަމުން ދާއިރު ސަރުކާރާއި ފަތުރުވެރިކަމުގެ މިނިސްޓްރީން އެއްވެސް އެއްޗެއް ނުބުނާތީ ގިނަ ބަޔަކު ކަންބޮޑުވުން ފާޅުކުރަމުން ދޭ.
އދ. ދިގުރަށް - ދިގުރަށުގެ ފަތުރުވެރިންނަށް ހާއްސަ ސަރަހައްދެއްގައި ނަޖިސް ބޭރުވާ މަންޒަރު ދައްކުވައިދޭ ވީޑިއޯއެއް ވައިރަލް ވަނީ ވެފަ. | ވިޒިޓް މޯލްޑިވްސް
ގިނަ ބައެއްގެ ފާޑުކިއުން އަމާޒުވި އދ. ދިގުރަށުގައި ފަތުރުވެރިންނަށް ޚާއްސަ ކޮށްފައިވާ ގޮނޑުދޮށުން ނަޖިސް ބޭރުވާ ވީޑިއޯ އިން ފެންނަނީ އެރަށު ނަރުދަމާ ހޮޅިއެއް ފަޅައިގެން ދިއުމުން ނަޖިސް ބޭރުވި މަންޒަރު ކަމަށާ އެ ހޮޅި އަށް ދިމާވި މައްސަލަ ހަމަ އެ ދުވަހު ހައްލު ކޮށްފައިވާނެ ކަމަށް އެ ރަށު ކައުންސިލް ގެ ރައީސް އިބްރާހިމް އުސްމާން ވިދާޅުވެއްޖެ އެވެ.
އދ. ދިގުރަށުގައި ފަތުރުވެރިންނަށް ހާއްސަކޮށްފައިވާ ގޮނޑުދޮށުގައި ނަޖިސް ބޭރުވާ ވީޑިއޯއެއް ސޯޝަލްމީޑިއާގައި އާއްމުވެ އެތައް މިލިއަން ވިއުސް އެއް އެ ވީޑިއޯ އަަށް ވަނީ ލިބިފަ އެވެ. އަދި މުޅި ދުނިޔޭގެ ސަމާލުކަން އެ ވީޑިއޯއަށް ލިބިފައިވާ އިރު އެ ވީޑިއޯ އިން ފެންނަނީ ދިވެހިންގެ ފަތުރުވެރިކަމުގެ ރީތި ނަން ކިލަނބުކޮށްލާ ފަދަ ކަންތައްތަކެކެވެ.
ކެނެރީ އައިލެންސް އަށް ނިސްބަޔްވާ ސޯޝަލް މީޑިއާ އިންފްލުއެންސަރ، ޑޭވިޑް ސެގޫރާ އޭނާ ގެ އިންސްޓަގްރާމް އެކައުންޓުން ކުރި ޕޯސްޓަށް 6 މިލިއަނަށް ވުރެ ގިނަ ވިއުސް ލިބިފައި ވެ އެވެ. ވީޑީއޯގައި އޭނާ ބުނެފައި ވަނީ މި ހުރެވުނީ ދުނިޔެމަތީ ސުވަރުގޭގައި ކަމަށް ހީވެދާނެ ކަމަށެވެ. ނަމަވެސް އެ ތަނަށް ނަޖިސް ބޭރުވަމުންދާ ކަން ފާހަގަކޮށް އޭނާ ވަނީ އެކަމަށް ވަރަށް ބޮޑަށް ފާޑު ކިޔާފަ އެވެ. އެ ވީޑިއޯ ނަގާފައިވާ ސަރަހައްދަކީ ދިގުރަށުގެ ފަތުރުވެރިންނަށް ހާއްސަ ކޮށްފައިވާ ސަރަހައްދެވެ.
މިކަމާ ގުޅިގެން ރާއްޖެއެމްވީ އިން ސުވާލު ކުރުމުން އެ ރަށު ކައުންސިލް ގެ ރައީސް ގެ ރައީސް އިބްރާހިމް އުސްމާން ވިދާޅުވީ އެ ވީޑިއީ އިން ފެންނަނީ އެ ރަށު ރައްޔިތުން އަޅާފައިވާ ނަރުދަމާ ހޮޅިއެއް ފަޅައިގެން ދިއުމުން އެ ސަރަހައްދަށް ނަޖިސް ބޭރުވާ މަންޒަރު ކަމަށެވެ. އަދި އެ ހަމަ އެ ދުވަހު އެކަން ކައުންސިލްގެ ސަމާލު ކަމަށް އައިސްފައިވާ ކަމަށާ އެ ދުވަހުން ދުވަހަށް އެ މައްސަލަ ހައްލު ކޮށްފައިވާ ކަމަށެވެ.
މި މައްސަލަ އެ ރަށު ކައުންސިލުން ހައްލު ކޮށްފައިވާއިރު ވެސް ވައިރަލް ވަމުންދާ މި ވީޑިއޯ އާ ގުޅިގެން ސަރުކާރުން މިހާތަނަށް ވެސް އެއްޗެއް ބުނެފައި ނުވާތީ ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ. އަދި މީގެ ސަބަބުން ރާއްޖޭގެ ފަތުރުވެރިކަމުގެ ސިނާއަތަށް ގެއްލުން ލިބިދާނެ ނަމަވެސް ފަތުރުވެރިކަމާ ބެހޭ މިނިސްޓްރީ އިން ވެސް މިކަމާ އަޅާނުލާތީ ގިނަ ބަޔަކު ދަނީ މިނިސްޓްރީ އަށް ވެސް ވަރަށް ބޮޑަށް ފާޑު ކިޔަމުންނެވެ.
