އޭސީސީން އެމްއެންޔޫގެ މުވައްޒަފުންގެ ނަޒާހަތްތެރިކަން ކުރިއެރުވުމުގެ މަސައްކަތް ކުރަނީ
މި އެއްބަސްވުމުގެ ދަށުން މުވައްޒަފުން ހޭލުންތެރިކުރުވުމުގެ ޕްރޮގްރާމްތައް ހިންގުމާއި، އަމާނާތްތެރިކަން އިތުރުކުރުމަށް ބޭނުންވާ ކޯސްތައް ފަރުމާކުރުމުގެ އިތުރުން ނަޒާހަތްތެރިކަމާ ގުޅޭ ދިރާސާތައް ކުރުމަށް ވަނީ ނިންމާފައި. މިއީ ދައުލަތުގެ މުއައްސަސާތަކުގައި ކޮރަޕްޝަނުގެ ހިރާސް ކުޑަކޮށް، ނަޒާހަތްތެރިކަމުގެ ސިފަ އަށަގެންނެވުމަށް އެޅުނު މުހިންމު ފިޔަވަޅެއް ކަމަށް އޭސީސީން ބުނޭ.
ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންނާއި، މުވައްޒަފުން ކެންޕަސް ބޭރުގައި ހަރަކާތްތެރިވަނީ. | އެމްއެންޔޫ
އެންޓި ކޮރަޕްޝަން ކޮމިޝަން (އޭސީސީ)ން ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ)ގެ މުވައްޒަފުންގެ ނަޒާހަތްތެރިކަން ކުރިއެރުވުމުގެ މަސައްކަތް ކުރުމަށް އެއްބަސްވުމުގައި ސޮއިކޮށްފި އެވެ.
އާދިއްތަ ދުވަހު، އޭސީސީއާ އެމްއެންޔޫއާ ދެމެދު ވަނީ އެއްބަސްވުމެއްގައި ސޮއިކޮށްފަ އެވެ.
މި އެއްބަސްވުމުގައި އޭސީސީގެ ފަރާތުން ސޮއިކުރެއްވީ ކޮމިޝަންގެ ރައީސް އާދަމް ޝާމިލް އެވެ. އަދި އެމްއެންޔޫގެ ފަރާތުން ސޮއި ކުރެއްވީ ވައިސް ޗާންސެލަރ ޑރ.އާއިޝަތު ޝެހެނާޒް އާދަމް އެވެ.
އޭސީސީން ބުނީ، މި އެއްބަސްވުމުގެ މައިގަނޑު މަގުސަދަކީ ކޮރަޕްޝަން ވިޔަނުދިނުމަށްޓަކައި ދެ މުއައްސަސާ ގުޅިގެން ކުރެވޭނެ މަސައްކަތް ދެނެގަނެ އެކަންކަން ހާސިލް ކުރުމާއި، ކޮމިޝަނުން ދޭ ލަފާ ތަންފީޒު ކުރުމުގައި ގުޅިގެން މަސައްކަތް ކުރުމާއި ފަންނީ އެހީތެރިކަން ބަދަލުކުރުމުގައި ހަރުދަނާ ނިޒާމެއް ގާއިމް ކުރުން އެއްބަސްވުމުގައި ހިމެނޭ ކަމަށެވެ.
މީގެ އިތުރުން އޭސީސީން ބުނީ، މި އެއްބަސްވުމުގެ ދަށުން އޭސީސީން އެމްއެންޔޫގެ މުވައްޒަފުންގެ ނަޒާހަތްތެރިކަން ކުރިއެރުވުމަށް މަހާސިންތާތަކާއި ވާކްޝޮޕްތައް ބޭއްވުމުގައި އެހީތެރިކަން ފޯރުކޮށްދޭނެ ކަމަށާއި، ކަރަޕްޝަން ހުއްޓުވުމަށް ދައުލަތުގެ އިދާރާތަކާއި މަދަނީ ޖަމިއްޔާތަކަށް ހޭލުންތެރި ކުރުވުމުގެ ޕްރޮގްރާމްތައް އެމްއެންޔޫއާ ގުޅިގެން ހިންގުމާއި ދައުލަތް ހިންގުމުގައި އަމާނާތްތެރިކަން އިތުރު ކުރުމަށް ބޭނުންވާ ކޯސްތައް ފަރުމާކޮށް ހިންގުން ހިމެނޭ ކަމަށެވެ. އެމްއެންޔޫގެ ފަރާތުން ސިޔާސަތުތަކާއި އިސްތިރާޖީތައް އެކުލަވާލުމުގައި ކަރަޕްޝަން ވިޔަނުދިނުމަށް ކޮމިޝަނާއެކު ގުޅިގެން މަސައްކަތް ކުރުމާއި އެންޓި ކޮރަޕްޝަން ސިޔާސަތުތައް ތައްޔާރު ކުރުމުގައި ބޭނުންވާ ފަންނީ ލަފާ ފޯރުކޮށްދިނުން ހިމެނޭ ކަމަށް އޭސީސީން ބުނެ އެވެ. އަދި ނަޒާހަތްތެރިކަމާ ގުޅޭ ދިރާސާތައްކޮށް ޖަރނަލްތައް ޝާއިއު ކުރުމުގައި ވެސް ޔުނިވަރސިޓީއަށް އެހީތެރިވާނެ ކަމަށް އެކޮމިޝަނުން ބުނެ އެވެ.
އޭސީސީން ބުނީ، މި އެއްބަސްވުމަކީ ކަރަޕްޝަނާ ދެކޮޅަށް ކުރާ މަސައްކަތް އިތުރަށް ހަރުދަނާކޮށް ދައުލަތުގެ އެކި ދާއިރާތަކުން ކަރަޕްޝަނުގެ ހިރާސް ކުޑަ ކުރުމަށް އެޅުނު މުހިންމު ފިޔަވަޅެއް ކަމަށެވެ. މި އެއްބަސްވުމުގެ ދަށުން ހިންގޭ ތަމްރީނުތަކާ ކުރެވޭ ދިރާސާތަކުގެ ސަބަބުން މުޖުތަމައުގައި ނަޒާހަތްތެރިކަމުގެ ސިފަ އަށަގެންނެވުމަށް ބޮޑު ބާރަކަށްވާނެ ކަމަށް ވެސް ކޮމިޝަނުން ބުނެފައިވެ އެވެ.
