ސަރުކާރުން މިސާލު ނަގަނީ އުމަރު ބިން އަބްދުލް އަޒީޒްގެ ހަޔާތްޕުޅުން، އެކަމަކު ދައުލަތުގެ ވަސީލަތް ނަހަމަ ގޮތުގައި ބޭނުން ކުރުމުގައި އަވަދިނެތި!

ރައީސް ޑރ.މުހައްމަދު މުއިއްޒު ސަރުކާރުގައި ކޮރަޕްޝަނަށް ކުޑަކޮށް ވެސް ޖާގައެއް ނުދެއްވާނެ ކަމަށް އެމަނިކުފާނު ތަކުރާރުކޮށް ވިދާޅުވެފައިވެ އެވެ. މިނިސްޓްރީތަކާއި، ކުންފުނިތަކުގެ ވެރިންގެ ގޮތުގައި އައްޔަން ކުރައްވާނީ ވެސް އެމަނިކުފާނުގެ އިރުޝާދުގެ ދަށުން މަސައްކަތް ކުރާ ބޭފުޅުން ކަމަށް ވިދާޅުވެފައިވެ އެވެ. ގައުމުގެ ކަންކަން ކުރެއްވުމުގައި އިސްލާމީ ތާރީހުގައި ކަންކަން ހިނގާފައިވާ ގޮތާއި، އިސްލާމީ ލީޑަރުން ވެރިކަން ކުރެއްވި ގޮތަށް ބައްލަވާނެ ކަމަށް ވިދާޅުވެފައިވެ އެވެ. 

އެގޮތުން މި ސަރުކާރުގެ ބޭފުޅުން ވެސް ވަރަށް ބޮޑަށް ރައީސް މުއިއްޒަށް ތައުރީފު ކުރައްވައި، އިސްލާމީ ތާރީޚު ދުއް އެންމެ އަމާނާތްތެރި ގޮތުގައި ވެރިކަން ކުރެއްވި ހަލީފާއިން ކަމަށްވާ އުމަރު ބިން އަބްދުލް އަޒީޒް ފަދަ ބޭބޭފުޅުންގެ ވާހަކަ ދައްކަވާ މިސާލު ޖައްސަވަ އެވެ. ނަމަވެސް އުމަރު ބިން އަބްދުލް އަޒީޒަކީ  މަސައްކަތުގައި އިންނަވައި، އާއްމު މީހަކު އަމިއްލަ ބޭނުމެއްގައި ބައްދަލު ކުރެއްވުމަށް އައުމުން ފުޅި ބައްތި ނިއްވަވާލެއްވި ބޭފުޅެކެވެ. އެއީ އެފުޅި ބައްތީގައި ސަރުކާރުގެ ތެޔޮ ހުރުމުން އެމަނިކުފާނު އަމަލު ކުރެއްވި ގޮތެވެ. އެހާވެސް އަމާނަތްތެރި ބޭފުޅެކެވެ. 

ނަމަވެސް މިސަރުކާރުގައި ކަން ހިނގަނީ މިހެންތޯ އެވެ.  މިސަރުކާރަށް ދެއަހަރަށް ވުރެ ގިނަ ދުވަސްވެގެން ދިޔައިރު، ކޮރަޕްޝަންގެ ގިނަ މައްސަލަތަކެއް ފެންމަތިވެގެން ދިޔަ އެވެ. ދައުލަތުގެ ވަސީލަތްތައް ނަހަމަ ގޮތުގައި ބޭނުން ހިފާ މައްސަލަ ވެސް އެހާމެ ބޮޑެވެ. މަގާމުގެ ނާޖާއިޒު ފައިދާ ނަގައި، ނުފޫޒު ފޯރުވައި، އެ މަންފާ ހޯދުމުގައި ހައްދެއް ނެތޭ ބުންޏަސް ދޮގަކަށް ނުވާނެ އެވެ.

މި އަހަރުގެ ޖެނުއަރީ މަހު ފެންމަތިވެގެން ދިޔައީ ރާއްޖެ އަށް ގޭސް އެތެރެކުރާ ސަރުކާރު ކުންފުނި، މޯލްޑިވް ގޭސް އިން ގޭހުގެ ޝިޕްމަންޓަކަށް ދެއްކި 250،000 ޑޮލަރު ގެއްލުވާލި ކަމަށް ގިނަ ބަޔަކު ތުހުމަތު ކުރާ އެ ކުންފުނީގެ މެނޭޖިންގ ޑިރެކްޓަރު އަބްދުﷲ މުހައްމަދު އެ ކުންފުނީގެ ދޯންޏާއި ކުންފުނީގެ ވަސީލަތްތަކުގެ ނަހަމަ ބޭނުންކޮށްގެން މަސްދަތުރު ދާ މައްސަލަ އެވެ. މި މައްސަލައަކީ  2025 ވަނަ އަހަރު ވެސް ފެންމަތިވި މައްސަލަ އެކެވެ.

މިއާއެކު ގިނަ ކުންފުނިތަކުގައި ވެރިން ދައުލަތުގެ ކާރު ނަހަމަ ބޭނުން ކުރާ ކަމަށް މައުލޫމާތު ލިބިފައިވެ އެވެ. މީގެ ތެރޭގައި ފުލުހުންނާއި، ސިފައިންގެ ބޭފުޅުން ދައުލަތުގެ ކާރުކޮޅު އަމިއްލަ ބޭނުމަށް ބޭނުންކުރާ އަޑުތައް ވަނީ ފެތުރިފަ އެވެ.

އިތުބާރުހުރި ފަރާތަކުން މައުލޫމާތު ދިން ގޮތުގައި ކަސްޓަމްސްގެ ކޮމިޝަނަރ ޖެނެރަލް އޮފް ކަސްޓަމްސް ފާތިމަތު ދިޔާނާ މިހާރު ހުންނެވީ ޗުއްޓީގަ އެވެ. ނަމަވެސް އަބަދުވެސް ދައުލަތުގެ ކާރުކޮޅު އެކަމަނާގެ ގޭގެ ދޮރުމަތީގައި އޮންނަން ޖެހޭ ކަމަށާއި، ދައުލަތުގެ ކާރުކޮޅު ނަހަމަ ގޮތުގައި ބޭނުން ކުރާ ކަމަށް ތުހުމަތު ކޮށްފައިވެ އެވެ. 

މީގެ އިތުރުން ކަސްޓަމްސްގައި ޑެޕިއުޓީންގެ ގޮތުގައި ތިއްބަވާ ބޭފުޅުން ވެސް ބަހުގައި ޚިދުމަތް ދޭ އުސޫލުން، އާއިލާ މީހުންނާއި، ރައްޓެހިންނަށް ދައުލަތުގެ ކާރުކޮޅު ގައި ދަތުރު ކޮށްދޭ ކަމަށް ތުހުމަތު ކޮށްފައިވެ އެވެ. ދަރިން ސްކޫލަށް ގެންދިއުމާއި، މަސައްކަތު މީހުން ގެއަށް ގެންދިއުމާއި، ބާޒާރު ކުރުމުގެ އިތުރުން ވެސް އަމިއްލަ ކަންކަމުގައި ދައުލަތުގެ ކާރުކޮޅު ބޭނުން ކުރުމުގައި އޮތީ ހައްދުން ނައްޓާފައި ކަމަށް އެތަންތަނުގައި މަސައްކަތް ކުރާ މުވައްޒަފުންގެ އިތުރުން އާއްމު ރައްޔިތުން ދަނީ ބުނަމުންނެވެ. 

ދައުލަތުގެ ވަސީލަތްތަކާއި މުދާ ނަހަމަ އަމިއްލަ ބޭނުމަށް ބޭނުން ކުރަމަކީ ކޮރަޕްޝަނެވެ. މިކަން މިގޮތަށް ކުރުމުގެ ކުޑަ ވެސް ޖާގައެއް ގާނޫނުން ގައި ވެސް ދީފައިނުވެ އެވެ. ނަމަވެސް ފާޅުކަން ބޮޑު ގޮތެއްގައި މިކަންކަން ކުރަމުންދާއިރު، އެކަން ހުއްޓުވާނެ އިދާރާއެއް ތަހުގީގު ކުރާނެ ބަޔަކު ނެތުމަކީ ވެސް މިގައުމު ކޮރަޕްޝަންގެ ހާއްޔަކަށް ވެއްޓިފައިވާކަމުގެ ހެއްކެވެ.