ބޮޑު ތަފާތަކުން ދެއްވަދޫ ބަލިކޮށް، ނައިވާދޫ އިން ގޯލްޑަން ފުޓްސަލް ޗެލެންޖު ކާމިޔާބު ކޮށްފި

މިއަހަރުގެ ގޯލްޑަން ފުޓްސަލް ޗެލެންޖުގެ ފައިނަލްގައި ގއ.ދެއްވަދޫގެ މައްޗަށް ކުރި ހޯދައި، ހދ.ނައިވާދޫ އިން މުބާރާތުގެ ޗެމްޕިއަންކަން ހޯދައިފި އެވެ. 

ހޮނިހިރު ދުވަހުގެ ރޭ ހުޅުމާލޭ ރެހެންދި ފުޓްސަލް ދަނޑުގައި ކުޅުނު ފައިނަލް މެޗުގައި ނައިވާދޫ އިން ވަނީ 9-3 ގެ ތަފާތު ބޮޑު ނަތީޖާ އަކުން ދެއްވަދޫ ބަލިކޮށްފަ އެވެ. މެޗުގައި ދެއްވަދޫ އިން ލަނޑު ޖަހައި ކުރި ހޯދާފައި ވަނިކޮށް، ނައިވާދޫ އިން ވަނީ ފަހަތުން އަރައި ލީޑު ނަގައިފަ އެވެ. 

މެޗުގައި ދެއްވަދޫ އަށް ލީޑު ނަގައިދިނީ އަޙުމަދު ރާހިލް ރަޝީދު އެވެ. ނަމަވެސް، އަޙުމަދު ޙަލީމް (އައްމަޑޭ) ޖެހި ލަނޑާ އެކު ނައިވާދޫ އިން ނަތީޖާ ހަމަހަމަ ކުރިއިރު، ނައިވާދޫގެ ދެ ވަނަ ލަނޑު ޖަހައި ލީޑު ނަަގައިދިނީ ޢަބްދުﷲ ޝާފިއު (ޝާއްޕެ) އެވެ. އޭގެ ފަހުން ނައިވާދޫގެ ތިން ވަނަ ލަނޑު ޖެހީ މުޙައްމަދު ޔާމީން އެވެ. އަަދި އެ ޓީމަށް ލިބުނު ޕެނަލްޓީ ކާމިޔާބުކޮށް ހަތަރު ވަނަ ލަނޑު ޖެހީ އައްމަޑޭ އެވެ.

ދެ ވަނަ ހާފު ފަށައިގެން ދެއްވަދޫގެ ދެ ވަނަ ލަނޑު ޖެހީ ރާހިލް އެވެ. އެ ލަނޑުގެ ފަހުން ޙުސެއިން މައިޝާން ވަނީ ނައިވާދޫގެ ފަސް ވަނަ ލަނޑު ޖަހައިފަ އެވެ. މެޗުގައި ދެއްވަދޫގެ ތިން ވަނަ ލަނޑު ޖެހީ މުޙައްމަދު އިމްރާން އެވެ. އޭގެ ފަހުން ނައިވާދޫގެ ޝާއްޕެ ވަނީ ދެ ލަނޑު ޖަހައި މެޗުގައި އޭނާގެ ހެޓްރިކް ހަމަ ކޮށްފަ އެވެ. ދެއްވަދޫގެ މައިޝާން ވެސް ދެ ވަނަ ލަނޑެއް ޖެހިއިރު، އަނެއް ލަނޑު ޖެހީ ޢަބްދުﷲ ވިސާމް އެވެ. 

މިއީ ނައިވާދޫ އިން ގޯލްޑަން ފުޓްސަލް ޗެލެންޖު ކާމިޔާބު ކުރި ފުރަތަމަ ފަހަަރެވެ. މީގެ ކުރިން މިދިޔަ އަހަރުގެ ފައިނަލްގައި އެ ޓީމު ވާދަ ކޮށްފައި ވީ ނަމަވެސް، އެ ފަހަރު ވަނީ ކ.ކާށިދޫއާ ވާދަކޮށް ބަލިވެފަ އެވެ.