ޕެނަލްޓީގައި މޮޅުވެ، އޭދަފުށިން ޗެރިޓީ ޝީލްޑު ކާމިޔާބު ކޮށްފި
4 ޖެނުއަރީ 2026 | އާދީއްތަ 04:28މިއީ އޭދަފުށިން ގޯލްޑަން ފުޓްސަލް ޗެލެންޖުގެ ޗެރިޓީ ޝީލްޑު ކާމިޔާބު ކުރި ފުރަތަމަ ފަހަރު. މިދިޔަ އަހަރުގެ ޗެރިޓީ ޝީލްޑު މެޗުގައި ވެސް އޭދަފުށިން ވަނީ ވާދަކޮށްފަ އެވެ. ނަމަވެސް، އެ ފަހަރުގެ މެޗުގައި ވަނީ ލ.ގަމު އަތުން ބަލިވެފައި
އޭދަފުށިން ޗެރިޓީ ޝީލްޑު އުފުލާލަނީ
ގޯލްޑަން ފުޓްސަލް ޗެލެންޖުގެ ޗެރިޓީ ޝީލްޑު މެޗުގައި ކ.ކާށިދޫގެ މައްޗަށް ކުރި ހޯދައި، ބ.އޭދަފުށިން ޝީލްޑު ކާމިޔާބު ކޮށްފި އެވެ.
ހޮނިހިރު ދުވަހުގެ ރޭ ރެހެންދި ފުޓްސަލް ދަނޑުގައި ކުޅުނު ޗެރިޓީ ޝީލްޑު މެޗު އޭދަފުށިން ކާމިޔާބު ކުރީ ޕެނަލްޓީ ޖަހައިގެންނެވެ. މެޗުގައި އެއްވެސް ޓީމަކަށް ލަނޑެއް ޖެހިފައި ނުވުމުން، ނަތީޖާ ނެރުމަށް ޖެހި ޕެނަލްޓީ އޭދަފުށިން ކާމިޔާބު ކުރީ 3-1 އިންނެވެ.
އޭދަފުށީގެ ތިން ޕެނަލްޓީ ކާމިޔާބު ކުރީ އަލީ ނަސީމް، އިބްރާހީމް ޝަރީފް އަދި އުނައިޝް ޒުބެއިރު އެވެ. އެ ޓީމުގެ އަޙުމަދު ފާތިންގެ ޕެނަލްޓީ ކާމިޔާބެއް ނުވި އެވެ. ކާށިދޫ އަށް ކާމިޔާބު ކުރެވުނީ އަޖުލާން ޢަަބްދުލް ޙަންނާންގެ ޕެނަލްޓީ އެކަންޏެވެ. އެ ޓީމުގެ ޢަބްދުﷲ ސުޒެއިރު، އަޙުމަދު މަޖީދު އަދި އިލްވާން މުޙައްމަދުގެ ޕެނަލްޓީ ކާމިޔާބެއް ނުވި އެވެ. އޭދަފުށީގެ ކީޕަރު މުޙައްމަދު ޝާން ވަނީ އެ ތިން ޕެނަލްޓީ ވެސް މަތަކޮށްފަ އެވެ.
މިއީ އޭދަފުށިން ގޯލްޑަން ފުޓްސަލް ޗެލެންޖުގެ ޗެރިޓީ ޝީލްޑު ކާމިޔާބު ކުރި ފުރަތަމަ ފަހަރެވެ. މިދިޔަ އަހަރުގެ ޗެރިޓީ ޝީލްޑު މެޗުގައި ވެސް އޭދަފުށިން ވަނީ ވާދަކޮށްފަ އެވެ. ނަމަވެސް، އެ ފަހަރުގެ މެޗުގައި ވަނީ ލ.ގަމު އަތުން ބަލިވެފަ އެވެ.
މިއަހަރުގެ ޗެރިޓީ މެޗުގެ ފައިސާ ވެސް ހަދިޔާ ކުރުމަށް ނިންމާފައި ވަނީ ފަލަސްޠީނުގެ ރައްޔިތުންނަށެވެ. ޗެރިޓީ މެޗުގެ ފައިސާގެ އިނާމަކީ 25،000 (ފަންސަވީސް ހާސް) ރުފިޔާ އެވެ.
