ގޯލްޑަން ފުޓްސަލް ޗެލެންޖު: ނައިވާދޫ އާއި ދެއްވަދޫ ފައިނަލް އަށް

މިހާރު ކުރިއަށްދާ ގޯލްޑަން ފުޓްސަލް ޗެލެންޖުގެ ސެމީ ފައިނަލްގެ މެޗުތަކުން މޮޅުވެ، ހދ. ނައިވާދޫ އާއި، ގއ. ދެއްވަދޫ އިން މުބާރާތުގެ ފައިނަލްގެ ޖާގަ ހޯދައިފި އެވެ.

ބުދަ ދުވަހުގެ ރޭ ރެހެންދި ފުޓްސަލް ދަނޑުގައި ކުޅުނު ސެމީ ފައިނަލްގެ ފުރަތަމަ މެޗުގައި ނައިވާދޫ ބައްދަލު ކޮށްފައި ވަނީ، ބ. އޭދަފުއްޓާ އެވެ. މެޗުގެ ފުރިހަމަ ވަގުތު ހަމަވީއިރު ދެ ޓީމު 1-1 އިން އެއްވަރުވެފައި އޮތުމުން، ނަތީޖާ ނެރުމަށް ޖެހީ ޕެނަލްޓީ އެވެ.

މެޗުގައި ފުރަތަމަ ލަނޑު ޖަހައި ލީޑު ނެގީ ނައިވައިދޫ އިންނެވެ. އެ ލަނޑު އެ ޓީމަށް ޖަހައިދިނީ ޢަބްދުﷲ ޝާފިއު (ޝާއްޕެ) އެވެ. ނަމަވެސް، މުޙައްމަދު ފާޞިރު ޖެހި ލަނޑާ އެކު އޭދަފުށިން ވަނީ ނަތީޖާ ހަމަހަމަ ކޮށްފަ އެވެ. ދެ ޓީމު އެއްވަރުވުމުން ނަތީޖާ ނެރުމަށް ޖެހި ޕެނަލްޓީ ނައިވާދޫ އިން ވަނީ ކާމިޔާބު ކޮށްފަ އެވެ.

ދެ ވަނަ ސެމީ ފައިނަލްގައި ދެއްވަދޫ އިން ވަނީ ވިލިމާލޭގެ މައްޗަށް ކުރި ހޯދައިފަ އެވެ.  ދެއްވަދޫ އިން ވަނީ 4-3 އިން ވިލިމާާލޭ ބަލިކޮށް ފައިނަލްގައި ނައިވާދޫއާ ދެކޮޅަށް ކުޅެން ޖާގަ ކަށަވަރު ކޮށްފަ އެވެ. 

މެޗުގައި ދެއްވަދޫގެ ލަނޑުތައް ޖެހީ މުޙައްމަދު އިމްރާން، ހުޒައިފަތު ރަޝީދު، ވިޝާހު ޢަބްދުލް މަޖީދު އަދި އަލީ ހައިޝަމް އެވެ. މެޗުގައި ވިލިމާލޭގެ ލަނޑުތައް ޖެހީ އަލީ ޝިޔާހުގެ އިތުރުން ޢަބްދުﷲ ސަމީހު މޫސާ އެވެ. މީގެ ތެރެއިން ޝިޔާހު ވަނީ ދެ ލަނޑު ޖަހައިފަ އެވެ.

މިއަހަރުގެ މުބާރާތުގެ ފައިނަލް މެޗު އޮންނާނީ ހޮނިހިރު ދުވަހުގެ ރޭ އެވެ.