ކާށިދޫ އިން ގޯލްޑަަން ފުޓްސަލް ޗެލެންޖު ކާމިޔާބު ކޮށްފި
މުބާރާތުގެ ޗެމްޕިއަންކަން ކާށިދޫ އިން ހޯދިއިރު، އެ ޓީމުން ވަނީ މިއަހަރުގެ މުބާރާތުގެ އަތޮޅު ފައިނަލް އަދި ޒޯން ފައިނަލްގައި ވެސް ކުޅެފަ އެވެ. ނަމަވެސް، އެ ދެ ފައިނަލް އިން ވެސް ކާށިދު ވަނީ ބަލިވެފަ އެވެ.
ރައީސުލްޖުމްހޫރިއްޔާގެ ނައިބު ޙުސެއިން މުޙައްމަދު ލަތީފް، މުބާރާތުގެ ޗެމްޕިއަން ޓީމަށް ތަށި ހަވާލު ކޮށްދެއްވަނީ
ގޯލްޑަން ފުޓްސަލް ޗެލެންޖުގެ ފައިނަލްގައި ހދ.ނައިވާދޫގެ މައްޗަށް ކުރި ހޯދައި, ކ.ކާށިދޫ އިން މުބާރާތުގެ ޗެމްޕިއަންކަން ހޯދައިފި އެވެ.
އަންގާރަ ދުވަހުގެ ރޭ ހުޅުމާލޭ ރެހެންދި ފުޓްސަލް ދަނޑުގައި ކުޅުނު ފައިނަލް މެޗު ކާށިދޫ އިން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ވެސް ކާށިދޫ އިން ވަނީ ތިން ލަނޑު ޖަހައިގެން ލީޑު ނަގައިފަ އެވެ.
މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ކާށިދޫ އިންނެވެ. މެޗުގައި އެ ޓީމަށް ލީޑު ނަގައިދިނީ އަޖުލާން ޢަބްދުލް ޙަންނާން އެވެ. އޭގެ ފަހުން ނައިވާދޫ އިން ވަނީ ލަނޑެއް ޖަހައި ނަތީޖާ ހަމަހަމަ ވެސް ކޮށްފަ އެވެ. އެއީ އަޙުމަދު ޙަމީދު ޖެހި ލަނޑުންނެވެ.
އޭގެ ފަހުން މެޗުގައި ދެ ވަނަ ފަހަރަށް ކާށިދޫ އަށް ލީޑު ނަގައިދިނީ ޢަބްދުﷲ ސުޒޭރު އެވެ. އޭގެ ފަހުން ކާށިދޫގެ ތިން ވަނަ ލަނޑެއް ޖަހައި ލީޑު ފުޅާ ކޮށްދިނީ އަޖުލާން އެވެ. މެޗުގެ ދެ ވަނަ ހާފުގައި ކާށިދޫގެ ހަތަރު ވަނަ ލަނޑު ޖެހީ ސުޒޭރު އެވެ.
މުބާރާތުގެ ޗެމްޕިއަންކަން ކާށިދޫ އިން ހޯދިއިރު، އެ ޓީމުން ވަނީ މިއަހަރުގެ މުބާރާތުގެ އަތޮޅު ފައިނަލް އަދި ޒޯން ފައިނަލްގައި ވެސް ކުޅެފަ އެވެ. ނަމަވެސް، އެ ދެ ފައިނަލް އިން ވެސް ކާށިދު ވަނީ ބަލިވެފަ އެވެ. އަދި މިއީ ކާށިދޫ އިން ގޯލްޑަން ފުޓްސަލް ޗެލެންޖު ކާމިޔާބު ކުރި ފުރަތަމަ ފަހަރެވެ.
