މިމަސް ތެރޭގައި އީއައިއޭގެ މަސައްކަތް ނިމޭނެ ކަމަށް މައުލޫމާތު ލިބިފައިވޭ
ހދ. ނާވައިދޫގެ މިހާރުގެ ބަނދަރު
އެންވަރަޔަމެންޓް އިމްޕެކްޓް އެސެސްމެންޓް (އީއައިއޭ)ގެ މަސައްކަތް ނިމުމާއެކު ހދ. ނާވައިދޫ ބަނދަރުގެ އަމަލީ މަސައްކަތް ފެށޭނެ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ވިދާޅުވެއްޖެއެވެ.
އެރަށުގައި މަސައްކަތްތައް ކުރިއަށްދާ ގޮތް ބައްލަވާލެއްވުމަށްފަހު މީޑިއާތަކަށް މައުލޫމާތު ދެއްވަމުން އާޒިމް ވިދާޅުވީ ނާވައިދޫ ބަނދަރު އަޕްގްރޭޑް ކުރުމުގެ މަސައްކަތް ހަވާލުކޮށްފައިވަނީ ޖެނުއަރީ މަސްތެރޭގައި ކަމަށާއި، އީއައިއޭގެ މަސައްކަތް ހަވާލުކޮށްފައިވަނީ އެހެން ކުންފުންޏަކާ ކަމަށެވެ. ބަނދަރުގެ އަމަލީ މަސައްކަތްތައް ފެށޭނީ އެ މަސައްކަތް ނިމުމުން ކަމަށް އާޒިމް ވިދާޅުވިއެވެ. އާޒިމް ވިދާޅުވީ މިމަސް ތެރޭގައި އީއައިއޭގެ މަސައްކަތް ނިމޭނެ ކަމަށް މައުލޫމާތު ލިބިފައިވާ ކަމަށާއި، އެ މަސައްކަތް ނިމިއްޖެ ކަމުގައިވާނަމަ އޯގަސްޓު މަހުގެ ތެރޭގައި އަމަލީ މަސައްކަތްތައް ފެށިގެންދާނެ ކަމަށެވެ.
މީގެ އިތުރުން އާޒިމް ވިދާޅުވީ މިސަރުކާރުން ތަރައްގީ ކުރާ ހުރިހާ ބަނދަރެއް ނިންމާ ރައްޔިތުންނާ ހަވާލުކުރާނީ އެންމެ ފުރިހަމައަށް ތަރައްގީ ކުރުމަށްފަހު ކަަމަށެވެ. އެގޮތުން ޕޭމަންޓާއި މަގު ބައްތި ޖަހާ ރައްޔިތުން ބޭނުންވާ ގޮތަށް ބަނދަރު އެއްކޮށް ނިންމާނެ ކަމަށް އާޒިމް ވިދާޅުވިއެވެ. އަދި ވިދާޅުވީ ބަނދަރަށް ބަދަލުތަކެއް ނުގެންނަ ކަމަށްވާނަމަ 18 މަސް ތެރޭގައި ބަނދަރުގެ ހުރިހާ މަސައްކަތެއް ނިންމާ ރައްޔިތުންނާ ހަވާލުކުރާނެ ކަމަށެވެ.
ނާވައިދޫ ބަނދަރު އަޕްގްރޭޑް ކުރުމުގެ މަސައްކަތް އެމްޓީސީސީއަށް ހަވާލުކޮށްފައިވަނީ 16 ޖަނުއަރީ 2023 ގައެވެ.
މި މަޝްރޫއުގެ ދަށުން ބަނދަރު ފުން ކުރުން، އައު ބަނދަރު ފުން ކުރުން، ނެރު ފުން ކުރުން، 290 މީޓަރ ބްރޭކްވޯޓަރ ޖެހުން، 10 މީޓަރ ސަބްމާޖް ބްރޭކްވޯޓަރ ޖެހުން، 25 މީޓަރ ގުރޯއިން ޖެހުން، 73.3 މީޓަރ ރިވެޓްމެންޓް ޖެހުން، 231 މީޓަރ އެއްގަމު ތޮށި ޖެހުން، 231 މީޓަރ ސްކޯރިންގ އެޕްރޮން ޖެހުން، 62 މރިންގ ރިންގް ހަރުކުރުން އަދި ރޭންޕެއް ހެދުން، ކޮންކްރީޓް ޖެޓީއެއް ހެދުން، މަގު ބައްތި ހަރުކުރުން އަދި ޕޭވްމަންޓް ހެދުން ހިމެނެއެވެ.
