އައު ސްޓޭޑިއަމް އެއް އެޅުމަށް 25 މިލިއަން ޑޮލަރު ހަމަޖެހިފައި ވަނިކޮށް، ގްރާންޓެއް ނުލިބިގެން ދަނޑު އެޅުމުގެ މަސައްކަތް ނުކުރެވި އޮތް ކަމަށް ވަޒީރު ވިދާޅުވެއްޖެ
މީގެ ކުރިން ވަޒީރު ރާފިއު ވެސް ވިދާޅުވެފައި ވަނީ އިންޑިއާ ސަރުކާރުގެ މަޝްވަރާގެ މަތިން، އެލްއޯސީގެ ދަށުން ސްޓޭޑިއަމްގެ މަސައްކަތް ކުރިއަށް ގެންދަމުން އަންނަ ކަމަށް. އެގޮތުން 2024 ވަނަ އަހަރުގެ ސެޕްޓެމްބަރު މަހުގެ 10 ވަނަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވަޒީރު ވިދާޅުވެފައި ވަނީ، ހުޅުމާލެ އަށް ސްޓޭޑިއަމް ބަދަލު ކުރީ އިންޑިއާ ސަރުކާރުގެ މަޝްވަރާ އާއެކު ކަމަށް.
ކުޅިވަރު ވަޒީރު ޢަބްދުﷲ ރާފިޢު | ކުޅިވަރާއި ހަށިހެޔޮކަމާ ބެހޭ ވުޒާރާ
ރާއްޖޭގައި ރަސްމީ ދަނޑުގެ ގޮތުގައި ބޭނުން ކުރަމުން އަންނަ ގަލޮޅު ދަނޑުގެ ބަދަލުގައި، އައު ސްޓޭޑިއަމެއް އެޅުމަށް އިންޑިއާ ސަރުކާރުގެ ލައިން އޮފް ކްރެޑިޓް (އެލްއޯސީ) އިން ބަޖެޓު ހަމަޖައްސާފައި ވަނިކޮށް، ގަލޮޅު ދަނޑު މަރާމާތު ކުރުމުގެ މަސައްކަތަށް ބަޖެޓު ހޯދުމުގެ މަސައްކަތް ކުރަމުން އަންނަ ކަމަށް ކުޅިވަރު ވަޒީރު ޢަބްދުﷲ ރާފިޢު ވިދާޅުވެއްޖެ އެވެ.
ކުރީގެ ރައީސް އިބްރާހީމް މުޙައްމަދު ސޯލިހުގެ ސަރުކާރުގައި އިންޑިއާ އިން ވަނީ ރާއްޖެ އަށް 40 މިލިއަން ޑޮލަރުގެ އެލްއޯސީއެއް ހަމަޖައްސައިފަ އެވެ. އޭގެ ތެރެއިން ގަލޮޅު ދަނޑު މަރާމާތު ކުރުމަށް ބޭނުންވާ 25 މިލިއަން ޑޮލަރު ވެސް އޭރު އޮތީ ހަމަޖައްސައިފަ އެވެ. އެއާ އެކު އޭރު ވަނީ ދަނޑުގެ ކުރެހުން ނިންމައި، ބިޑުގެ މަރުޙަލާ ވެސް ނިންމައިފަ އެވެ.
ރައީސް ސޯލިހުގެ ސަރުކާރު ބަދަލުވީއިރު އެ މަސައްކަތް އޮތީ ބަޔަކާ ހަވާލު ކުރުމާ ހަމައަށް ގެންގޮސްފަ އެވެ. ނަމަވެސް، އެ މަސައްކަތް އޭރު މަޑު ޖައްސާލާފައި އޮތީ ސަރުކާރު ބަދަލުވުމަށް ގާތް ގަނޑަކަށް މަސް ދުވަހަށް ވެފައި އޮތުމުންނެވެ. ނަމަވެސް، އައު ސަރުކާރާ އެކު އެ މަސައްކަތް ބަޔަކާ ހަވާލުކޮށްގެން ކުރިއަށް ގެންދެވޭ ވަރަށް ކަންކަން އޮތީ ނިންމައިފަ އެވެ.
ދާދި ފަހުން ރާއްޖޭގެ އޮންލައިން ނޫހަކަށް ދެއްވި އިންޓަވިޔުއެއްގައި ވަޒީރު ރާފިޢު ވިދާޅުވީ، ސްޓޭޑިއަމެއް ހެދުމަކީ ވަރަށް ބޮޑު ބަޖެޓެއް ބޭނުންވާ ކަމެއް ކަމަށެވެ. މި ސަރުކާރުން މިހާރު ނިންމާފައި ވަނީ ގަލޮޅު ދަނޑު މިހާރު ހުރި ތަނުގެ ބަދަލުގައި، ހުޅުމާލެ އަށް ބަދަލު ކުރުމަށެވެ. އެގޮތުން އައު ސްޓޭޑިއަމް ޤާއިމު ކުރުމަށް ހަމަޖެހިފައި ވަނީ ހުޅުމާލޭ ފޭސް އެކެއްގަ އެވެ.
ވަޒީރު ވިދާޅުވީ އައު ސްޓޭޑިއަމެއް ޤާއިމު ކުރުމަށްޓަކައި ފަންޑެއް ހޯދުމުގެ މަސައްކަތް ކުރަމުން އަންނަ ކަމަށެވެ. އެގޮތުން ޗައިނާ އާއި ސައުދީ އަރަބިއްޔާ އިން ވެސް ގްރާންޓެއް ހޯދައިގެން އެކަން ކުރެވޭތޯ ބަލަމުން އަންނަ ކަމަށް ވިދާޅުވި އެވެ. އެއާ އެކު ވަޒީރު ވިދާޅުވީ ކޮންމެ ވެސް ތަނަކުން ފަންޑިން ހަމަ ޖެހޭނެ ކަމަށާއި، އެކަމުގެ ފެހި ސިގްނަލް ލިބިފައިވާ ކަމަށެވެ.
މީގެ ކުރިން ވަޒީރު ރާފިއު ވެސް ވިދާޅުވެފައި ވަނީ އިންޑިއާ ސަރުކާރުގެ މަޝްވަރާގެ މަތިން، އެލްއޯސީގެ ދަށުން ސްޓޭޑިއަމްގެ މަސައްކަތް ކުރިއަށް ގެންދަމުން އަންނަ ކަމަށެވެ. އެގޮތުން 2024 ވަނަ އަހަރުގެ ސެޕްޓެމްބަރު މަހުގެ 10 ވަނަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވަޒީރު ވިދާޅުވެފައި ވަނީ، ހުޅުމާލެ އަށް ސްޓޭޑިއަމް ބަދަލު ކުރީ އިންޑިއާ ސަރުކާރުގެ މަޝްވަރާ އާއެކު ކަމަށެވެ.
އެ ދުވަހު ވަޒީރު ވިދާޅުވެފައި ވަނީ އެ ޕްރޮޖެކްޓާ އެކު ހަތަރު ސަރަހައްދެއްގައި ސިންތެޓިކް ޓްރެކް އަޅާނެ ކަމަށެވެ. އަދި ޓޭބަލް ޓެނިސް (ޓީޓީ) އިންޑޯ ހޯލަކާއި، ބާސްކެޓު އިންޑޯ ހޯލެއް އަދި އިތުރު ވޮލީ ކޯޓެއް ވެސް އަޅާނެ ކަމަށް ވަޒީރު އެ ދުވަހު ވިދާޅުވެފައިވެ އެވެ.
