17 ރަށެއްގެ ކުޅިވަރު މަޝްރޫއުތައް ހިންގަން ހަވާލު ކުރީ ސިފައިންގެ ކުންފުނި ސިވެކްއާ
ކުޅިވަރު ވުޒާރާ އިން ސިވެކްއާ ހަވާލު ކޮށްފައިވާ 20 މަޝްރޫއުގެ ތެރޭގައި ފުޓްސަލް ދަނޑުތައް ޤާއިމު ކުރުމާއި، ހޭންޑު ބޯޅަ ކޯޓު ޤާއިމު ކުރުމާއި، ވޮލީ ކޯޓު ޤާއިމު ކުރުމާއި، ސްވިމިން ޓްރެކް ޤާއިމު ކުރުން އަދި ފުޓުބޯޅަ ދަނޑު ޤާއިމު ކުރުން ފަދަ މަޝްރޫއުތައް ހިމެނޭ.
ސިފައިންގެ ވެލްފެއާ ކުންފުނި، ސިވެކްއާ ކުޅިވަރު މަޝްރޫއުތައް ހަވާލު ކުރުމަށް ބޭއްވި ރަސްމިއްޔާތުގެ ތެރެއިން
ކުޅިވަރު ވުޒާރާ އިން ރާއްޖޭގެ 17 ރަށެއްގައި ހިންގާ ކުޅިވަރުގެ މަޝްރޫއުތައް ހިންގުމަށް، ސިފައިންގެ ވެލްފެއާ ކުންފުނި (ސިވެކް)އާ ހަވާލު ކޮށްފި އެވެ.
ރާއްޖޭގެ 17 ރަށެއްގައި ކުޅިވަަރުގެ 20 މަޝްރޫއެއް ހިންގުމަށް ކުޅިވަރު ވުޒާރާ އިން ސިވެކްއާ ހަވާލު ކޮށްފައި ވަނީ މިދިޔަ ހަފުތާގެ އަންގާރަ ދުވަހުގެ ރޭ އެވެ. ސިފައިންގެ ގޭގައި ބޭއްވި އެ ރަސްމިއްޔާތުގައި ކުޅިވަރު ވުޒާރާގެ ފަރާތުން އެއްބަސްވުމުގައި ސޮއި ކޮށްފައި ވަނީ، އެ ވުޒާރާގެ ސްޓޭޓް މިނިސްޓަރު މުޙައްމަދު ދިލްޝާން ޢަބްދުﷲ އެވެ. އަދި ސިވެކްގެ ފަރާތުން ސޮއި ކޮށްފައި ވަނީ އެ ކުންފުނީގެ މެނޭޖިން ޑިރެކްޓަރު ކާނަލް އަޙުމަދު ޒުބެއިރު އެވެ.
އެ ރަސްމިއްޔާތުގައި ކުޅިވަރު ވަޒީރު ޢަބްދުﷲ ރާފިޢު (ރާއްޕެ) ވެސް ވަނީ ބައިވެރިވެ ވަޑައިގެންފަ އެވެ. އޭގެ އިތުރުން އެ ވުޒާރާގެ އެހެން އިސްވެރިންނާއި، ރައްޔިތުންގެ މަޖިލީހުގެ މެމްބަރުން ވެސް ވަނީ ބައިވެރިވެ ވަޑައިގެންފަ އެވެ.
ކުޅިވަރު ވުޒާރާ އިން ސިވެކްއާ ހަވާލު ކޮށްފައިވާ 20 މަޝްރޫއުގެ ތެރޭގައި ފުޓްސަލް ދަނޑުތައް ޤާއިމު ކުރުމާއި، ހޭންޑު ބޯޅަ ކޯޓު ޤާއިމު ކުރުމާއި، ވޮލީ ކޯޓު ޤާއިމު ކުރުމާއި، ސްވިމިން ޓްރެކް ޤާއިމު ކުރުން އަދި ފުޓުބޯޅަ ދަނޑު ޤާއިމު ކުރުން ފަދަ މަޝްރޫއުތައް ހިމެނެ އެވެ.
ސިވެކްއާ ހަވާލު ކޮށްފައިވާ 20 މަޝްރޫއުގެ ތަފްސީލު:
1. އދ.ފެންފުށީ ފުޓްސަލް ދަނޑުގެ ޓާފް ބަދަލު ކުރުން.
2-. އދ.އޮމަދޫ ހޭންޑު ބޯޅަ ކޯޓު ޤާއިމު ކުރުން.
3. ބ.ކަމަދޫ ފުޓްސަލް ދަނޑު ތަރައްޤީ ކުރުން.
4. ފ.ދަރަނބޫދޫ ފުޓްބޯޅަ ދަނޑު ތަރައްޤީ ކުރުން.
5. ފ.ދަރަނބޫދޫ ވޮލީ ކޯޓު ޤާއިމު ކުރުން.
6. ގއ.ކަނޑުހުޅުދޫ ފުޓްސަލް ދަނޑުގެ ފެންސް މަރާމާތު ކުރުން.
7. ހއ.ދިއްދޫ ސްވިމިން ޓްރެކް ޤާއިމު ކުރުން.
8. ހދ.މަކުނުދޫ ފުޓުބޯޅަ ދަނޑު ތަރައްޤީ ކުރުން.
9. ހދ.ނެއްލައިދޫ ފުޓުބޯޅަ ދަނޑުގެ ލައިޓިން ސިސްޓަމް ޤާއިމު ކުރުން.
10. މ.ވޭވަށު ފުޓްސަލް ދަނޑު ތަރައްޤީ ކުރުން.
11. ނ.ހޮޅުދޫ މަލްޓި ޕާޕަސް (ހޭންޑްބޯޅަ/ފުޓްސަލް) ދަނޑު ޤާއިމު ކުރުން.
12. ނ.ކެނދިކުޅުދޫ ފުޓްސަލް ދަނޑު ތަރައްޤީ ކުރުން.
13. ނ.ޅޮހި ފުޓުބޯޅަ ދަނޑުގެ ލައިޓިން ސިސްޓަމް ޤާއިމު ކުރުން.
14. ނ.ޅޮހި މަލްޓި ޕާޕަސް (ހޭންޑްބޯޅަ/ފުޓްސަލް) ދަނޑު ޤާއިމު ކުރުން.
15. ނ.ޅޮހި އައުޓްޑޯ ވޮލީ ކޯޓު ޤާއިމު ކުރުން.
16. ނ.މަގޫދޫ ފުޓުބޯޅަ ދަނޑު ތަރައްޤީ ކުރުން.
17. ނ.މަނަދޫ އައުޓްޑޯ ވޮލީ ކޯޓު ޤާއިމު ކުރުން.
18. ނ.މިލަދޫ ފުޓުބޯޅަ ދަނޑުގެ ލައިޓިން ސިސްޓަމް ޤާއިމު ކުރުން.
19. ނ.ވެލިދޫ މަލްޓި ޕާޕަސް (ހޭންޑްބޯޅަ/ފުޓްސަލް) ދަނޑު ޤާއިމު ކުރުން.
20. ވ.ފުލިދޫ ފުޓްސަލް ދަނޑު ތަރައްޤީ ކުރުން.
ކުޅިވަރު ދާއިރާގެ މަޝްރޫއުތައް ހިންގުމަށް ސިވެކްއާ ހަވާލު ކޮށްފައިވާއިރު، މިއީ ކުޅިވަރުގެ މަޝްރޫއުތައް ހިންގުމަށް ސިވެކްއާ ހަވާލު ކުރި ފުރަތަމަ ފަހަރެވެ. މި ސަރުކާރުން ރަށް ރަށުގައި ފިޓްނަސް ސެންޓަރުތައް ޤާއިމު ކުރުމަށް ވެސް ހަވާލު ކޮށްފައި ވަނީ، މޯލްޑިވްސް އެއާޕޯޓްސް ކޮމްޕެނީ ލިމިޓެޑު (އެމްއޭސީއެލް)އާ އެވެ. މީގެ އިތުރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ވެސް ވަނީ ބައެއް މަޝްރޫއުތައް ހަވާލު ކޮށްފަ އެވެ.
